Ezekyele 32:1-32
32 Kadi mu mwaka wa 12, kweji wa 12, mu difuku dibajinji dya kweji, kinenwa kya Yehova kyaiya monka kondi amba:
2 “Mwanā muntu, imbila Felo mulopwe wa Edipito lwimbo lwa bulanda,* umunene amba,‘Wadi pamo bwa ntambo mwana* wa bukomo mu mizo,Ino ubatalajibwa.
Wadi pamo bwa kipangwa kikatampe kya lui,+ ubulukuta mu minonga yobe,Uvutakanya mema na maulu obe ne kufītyija minonga.’*
3 Mfumu Mwinē Lupusa Lonso Yehova wanena namino amba:
‘Nkakuta bukonde bwami kupityila ku kitango kya mizo mivule,Kadi bakakukoka mu bukonde bwami bwa nkokwa.
4 Nkakushiya pa ntanda;Nkakwela mu ntanda.
Nkalengeja byoni byonso bya mūlu bikutumbe,Nkalengeja banyema ba ntanda ba pa ntanda yonso bakwikute.+
5 Nkela mwita obe pa nguluNe kuyuja misanza na bishele kodi.+
6 Nkabombeja ntanda na mashi obe asūma enka ne pa ngulu,Kadi akayuja tuminonga.’*
7 ‘Pokajimankana nkapūta madiulu ne kufītyija ñenyenye yao.
Nkapūta dyuba na makumbi,Kadi kweji kakamunikapo kitōkeji kyandi.+
8 Nkafītyija bimuni byonso byeñenya mūlu pa mwanda obe,Kadi nkapūta ntanda yobe na fukutu,’ i Mfumu Mwinē Lupusa Lonso Yehova unena.
9 ‘Nkamwesha mityima ya bantu bavule malwa ponkendeja misungi yobe ku mizo mikwabo,Ku matanda okuyukilepo.+
10 Nkakwatyija bantu bavule nzuba,Balopwe babo bakazakala pa mwanda obe ponkabeleñenya kipete ku meso abo.
Bakazakala kyaba kyonso, ense na moyo pa mwanda wa būmi bwandi,Mu difuku dyokapona.’
11 Mwanda Mfumu Mwinē Lupusa Lonso Yehova wanena namino amba:
‘Kipete kya mulopwe wa Babiloni kikāya podi.+
12 Nkaponeja bibumbo byobe bikatampe ku bipete bya ba bulwi bakomokomo,Abo bonso, i mizo yampikwa kafuku kutabuka.+
Bakatūkija mitatulo ya Edipito, kadi bibumbo byandi byonso bikatampe bikakubijibwa.+
13 Nkonakanya bimunanwa byandi byonso kubwipi na mema andi mavulevule,+Kadi i kutupu kulu kwa muntu nansha mukono wa kimunanwa ukavutakanya’o monka.’+
14 ‘Mu kine kitatyi’kya, nkatōkeja mema abo,Kadi nkakukija minonga yabo pamo bwa māni,’ i Mfumu Mwinē Lupusa Lonso Yehova unena.
15 ‘Ponkalamuna Edipito ke mu ntanda mutuputupu musalwe, ntanda mitalulwe’mo byonso byadi biyudile’mo,+Ponkepaya bekadi bonso badi’mo,Bakayuka’mba ami ne Yehova.+
16 Luno i lwimbo lwa bulanda, kadi bantu bakemba’lo binebine;Bana bana-bakaji ba mizo bakemba’lo.
Bakembila’lo Edipito ne bibumbo byandi byonso bikatampe,’ i Mfumu Mwinē Lupusa Lonso Yehova unena.”
17 Penepo mu mwaka wa 12, mu difuku dya 15 dya kweji, kinenwa kya Yehova kyaiya kondi amba:
18 “Mwanā muntu, yoyokota pa mwanda wa bibumbo bikatampe bya Edipito ne kumutūkija mu ntanda ya munshi, aye ne bana bana-bakaji ba mizo mikomokomo, pamo ne boba batūkila mu kīna.*
19 “‘Lelo i ani otabukile buya? Tūka, ulāle pamo na bantu ba kubulwa kutwela kwisao!’
20 “‘Bakapona mu bukata mwa boba batapwe na kipete.+ Aye wapānwa ku kipete; mubululei pamo ne bibumbo byandi byonso bikatampe.
21 “‘Munshi mwa Kibundu,* ba bulwi bakomokomo bakesamba nandi aye ne bakwashi bandi. Bine bakatūka ne kulāla pamo bwa boba ba kubulwa kutwela kwisao, batapwe na kipete.
22 Ashidia udi kwine’kwa na kitango kyandi kyonso. Bibundu byabo bimujokolokele konsokonso, abo bonso bapone ku kipete.+
23 Bibundu byandi bidi munshi mwa kīna,* kadi kitango kyandi i kijokoloke kibundu kyandi konsokonso, abo bonso bepaibwe na kipete, mwanda baletele luzakalo mu ntanda ya bōmi.
24 “‘Elama+ udi kwine’kwa na bibumbo byandi byonso bikatampe bijokolokele kibundu kyandi, abo bonso bapone ku kipete. Abatūkila mu ntanda ya munshi kwa kubulwa kutwela kwisao, boba baletele luzakalo mu ntanda ya bōmi. Pano bakafwijibwa bumvu pamo na boba batūkila mu kīna.*
25 Abamwadila butanda mu bukata mwa batapwe, pamo ne bibumbo byandi bikatampe bijokolokele bibundu byandi. Abo bonso i ba kubulwa kutwela kwisao, batapwe na kipete, mwanda baletele luzakalo mu ntanda ya bōmi; kadi bakafwijibwa bumvu pamo na boba batūkila mu kīna.* Watūlwa mu batapwe.
26 “‘Kwine’kwa ko kudi Mesheke ne Tubala+ ne bibumbo byabo* byonso bikatampe. Bibundu byabo* bimujokolokele konsokonso. Abo bonso i ba kubulwa kutwela kwisao, basabakanibwe na kipete, mwanda baletele luzakalo mu ntanda ya bōmi.
27 Le kebakalālapo pamo na ba bulwi bakomokomo ba kubulwa kutwela kwisao baponene, batūkīle mu Kibundu* na byabulwi byabo bya divita? Kadi bakatūla bipete byabo munshi mwa mitwe* yabo ne bubi bwabo pa mikupa yabo, mwanda bano ba bulwi bakomokomo bazakeje ntanda ya bōmi.
28 Ino abe, ukavingakanibwa mu bukata mwa bantu ba kubulwa kutwela kwisao, kadi ukalāla pamo na boba batapilwe na kipete.
29 “‘Edoma+ udi kwine’kwa, ne balopwe bandi ne bamfumu bandi bonso, nansha byobadi bakomokomo, balādikilwe mu bukata mwa boba batapwe na kipete; nabo bakalāla pamo na boba ba kubulwa kutwela kwisao+ ne na boba batūkila mu kīna.*
30 “‘Kwine’kwa ye kudi bamfumu* bonso ba kungala, pamo ne bene Shidona+ bonso batūkile bya bumvu pamo na batapwe, nansha byobaletele luzakalo na bukomokomo bwabo. Bakalāla ba kubulwa kutwela kwisao pamo na boba batapilwe na kipete kadi bakafwijibwa bumvu pamo na boba batūkila mu kīna.*
31 “‘Felo ukamona bano bonso, kadi ukasengibwa na byobya byonso byafikīle kibumbo kyandi kikatampe;+ Felo ne kibumbo kyandi kyonso kya divita bakatapibwa na kipete,’ i Mfumu Mwinē Lupusa Lonso Yehova unena.
32 “‘Byaaletele luzakalo mu ntanda ya bōmi, Felo ne bibumbo byandi byonso bikatampe bakalādikwa mwanda wa kukōkolokwa pamo na ba kubulwa kutwela kwisao, pamo na boba batapwe na kipete,’ i Mfumu Mwinē Lupusa Lonso Yehova unena.”
Kunshi kwa Dyani
^ Kishima pa kishima i, “minonga yabo.”
^ Nansha’mba “ntambo mwana wa manyenze.”
^ Nansha’mba “lwimbo lwa madilo.”
^ Kishima pa kishima i, “Kadi ukayuja byalo bya tuminonga.”
^ Nansha’mba “kibundu.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “kibundu.”
^ Nansha’mba “kibundu.”
^ Nansha’mba “kibundu.”
^ Kishima pa kishima i, “byandi.”
^ Kishima pa kishima i, “byandi.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Padi bifunkila pa babulwi bajikilwe pamo ne bipete byabo, na ntumbo ya busola.
^ Nansha’mba “kibundu.”
^ Nansha’mba “bendeji.”
^ Nansha’mba “kibundu.”
