Ezekyele 35:1-15
-
Bupolofeto pa ngulu ya Seila (1-15)
35 Kinenwa kya Yehova kyaiya monka kondi amba:
2 “Mwanā muntu, tadija mpala yobe ku ntanda ya ngulu ya Seīla,+ kadi nena bupolofeto poidi.+
3 Wiinene amba, ‘Mfumu Mwinē Lupusa Lonso Yehova wanena namino amba: “A ntanda ya ngulu ya Seīla, nsa kulwa nobe, kadi nsa kōlola kuboko kwami podi ne kukwalamuna kodi mu ntanda mutuputupu musalwe.+
4 Nkalamuna bibundi byobe ke masala, kadi ukekala kodi mu ntanda mutuputupu musalwe;+ penepo ukayuka’mba ami ne Yehova.
5 Mwanda walombwele mushikwa wa endaenda,+ kadi wapēne bene Isalela ku kipete mu kitatyi kya kyamalwa kyabo, mu kitatyi kya mfuto yabo ya mfulo.”’+
6 “‘O mwanda, bine ne byondi mūmi,’ i Mfumu Mwinē Lupusa Lonso Yehova unena, ‘nkakuteakanya mwanda wa kumwanga mashi, kadi kumwanga mashi kukakulondalonda.+ Byowadi ushikilwe mashi, kumwanga mashi kukakulondalonda.+
7 Nkalamuna ntanda ya ngulu ya Seīla ke mu ntanda mutuputupu musalwe,+ kadi nkatyiba’ko muntu ense upita’mo ne muntu ense ujoka.
8 Nkayuja ngulu yayo na batapwe; kadi boba batapwe na kipete bakapona pa mikuna yobe ne mu misanza yobe ne mu tuminonga tobe tonso.
9 Nkakwalamuna kodi masala a nyeke, kadi bibundi byobe kebikekalwapo;+ penepo mukayuka’mba ami ne Yehova.’
10 “Mwanda wanenene amba, ‘Ino mizo ibidi ne ano matanda abidi akekala ke ami, kadi nkayata onso abidi ke ami,’+ nansha Yehova byawadi’mo,
11 ‘o mwanda bine ne byondi mūmi,’ i Mfumu Mwinē Lupusa Lonso Yehova unena, ‘nkakulongela bintu mungya bulobo ne mukao owalombwele pobadi na mushikwa obe;+ kadi nkeyukanya ami mwine mu bukata mwabo ponkakutyibila mambo.
12 Penepo ukayuka’mba ami mwine Yehova, naivwene bintu byonso bya kibengo byowadi ubenga ngulu ya Isalela powanenene amba, “Ibalāla mu masala kadi ibetupebwa’mba twiisasamune.”*
13 Waunenene bya kibengo, kadi wavudije binenwa byobe bibi kondi.+ Ami nebivwene byonso.’
14 “Mfumu Mwinē Lupusa Lonso Yehova wanena namino amba: ‘Ntanda yonso ikasangala ponkakwalamuna kodi mu ntanda mutuputupu musalwe.
15 Monka mowasangedile padi palēle bupyani bwa njibo ya Isalela mu masala, nobe ye monkakulongela.+ Ukalamuka kodi masala onkaonka, abe ntanda ya ngulu ya Seīla, bine, Edoma ense;+ penepo bakayuka’mba ami ne Yehova.’”
Kunshi kwa Dyani
^ Kishima pa kishima i, “bu byakudya.”
