Ezekyele 37:1-28
37 Kuboko kwa Yehova kwadi pondi, Yehova wansela na mushipiditu wandi wantūkija mu bukata mwa dilungu dya musanza,+ kadi mwadi muyule mikupa.
2 Wampityija kufulakufula kwayo konso, namona’mba kwadi mikupa mingi ilēle mu dilungu dya musanza, kadi yadi myūmu tē.+
3 Wangipangula’mba: “Mwanā muntu, le ino mikupa ibwanya kwikala monka myūmi?” Ponkapo nanena’mba: “A Mfumu Mwinē Lupusa Lonso Yehova, abe ye uyukile.”+
4 Penepo waunena’mba: “Nena bupolofeto pa ino mikupa, kadi wiinene amba, ‘A mikupa myūmu, tejai kinenwa kya Yehova:
5 “‘Mfumu Mwinē Lupusa Lonso Yehova wanena ino mikupa amba: “Nkatweja umpuya momudi, kadi mukekala monka bōmi.+
6 Nkatūla mijilo ne mwita pomudi, kadi nkemupūta kikoba ne kutūla umpuya momudi, kadi mukekala monka bōmi; penepo mukayuka’mba ami ne Yehova.”’”
7 Penepo nanena bupolofeto monka mobansoñaninye. Ami pa kunena’tu bupolofeto, kwaikala lunwa, lunwa lwa lupumo, kadi mikupa yaanza kwibunga, mukupa na mukupa.
8 Penepo namona mijilo ne mwita byaiya poidi, kadi kikoba kyebipūta. Ino mwadi kemwaikele umpuya.
9 Ebiya waunena’mba: “Nena bupolofeto ku kivula. A mwanā muntu nena bupolofeto, nena kivula’mba, ‘Mfumu Mwinē Lupusa Lonso Yehova wanena namino amba: “A kivula,* iya ku mvula iná, kadi pukumina bano bantu baipailwe, amba bekale monka bōmi.”’”
10 Penepo nanena bupolofeto monka mwaansoñaninye, kadi umpuya* watwela’mo, baikala bōmi kebemene na maulu abo,+ kyadi kibumbo kikatampe bininge.
11 Ebiya waunena’mba: “Mwanā muntu, ino mikupa i njibo yonso ya Isalela.+ Banenanga’mba, ‘Mikupa yetu i myūmu, kadi lukulupilo lwetu lubaoneka.+ Tubatyibwe’ko lonso.’
12 O mwanda nena bupolofeto, wibasapwile amba, ‘Mfumu Mwinē Lupusa Lonso Yehova wanena namino amba: “Nsa kushitula bibundu+ byenu ne kwimutambija mu bibundu byenu, banwe bantu bami, ne kwimuselela ku ntanda ya Isalela.+
13 Penepo mukayuka’mba ami ne Yehova ponkashitula bibundu byenu ne kwimutambija mu bibundu byenu, banwe bantu bami.”’+
14 ‘Nkatūla mushipiditu wami momudi kadi mukekala monka bōmi,+ nkemutūla mu ntanda yenu; penepo mukayuka’mba ami mwine, Yehova, nesambe’kyo kadi nalonga’kyo,’ i Yehova unena.”
15 Kinenwa kya Yehova kyaiya monka kondi amba:
16 “Kadi abe, a mwanā muntu, yata kipindi kya mutyi ulembe’po amba, ‘Kya Yuda ne kya bantu ba Isalela badi nandi.’*+ Kupwa yata kipindi kikwabo kya mutyi ulembe’po amba, ‘Kya Yosefa, kipindi kya mutyi kya Efelaimi, ne njibo yonso ya Isalela idi nandi.’*+
17 Kupwa wibifwenye kyoki ne kyoki amba bikale ke kipindi’tu kimo kya mutyi mu kuboko kobe.+
18 Shi bantu bobe* abakwipangula’mba, ‘Ubulwepo kwitulombola mushintulwila bino bintu?’
19 wibalombole amba, ‘Mfumu Mwinē Lupusa Lonso Yehova wanena namino amba: “Nkayata kipindi kya mutyi kya Yosefa, kidi mu kuboko kwa Efelaimi, ne bisaka bya Isalela byadi nabyo, nkebilamika ku kipindi kya mutyi kya Yuda; nkebyalamuna ke kipindi kimo kya mutyi,+ kadi bikekala ke kimo mu kuboko kwami.”’
20 Bipindi bya mutyi byokalemba’po, bikekala mu kuboko kobe amba bebimone.
21 “Ebiya wibasapwile amba, ‘Mfumu Mwinē Lupusa Lonso Yehova wanena namino amba: “Nkasela bene Isalela mu mizo mobendele, kadi nkebakongakanya ku mitamba yonso ne kwibaleta ku yabo ntanda.+
22 Nkebalamuna ke muzo umo mu ntanda’ya,+ pa ngulu ya Isalela, kadi mulopwe umo ukebabikala abo bonso,+ kebakekalapo monka bu mizo ibidi; kadi kebakabanibwapo monka mu malopwe abidi.+
23 Kebakesubijapo kadi monka na bilezaleza byabo bya mukenye* ne na bilongwa byabo bya munyanji ne kujilula kwabo konso.+ Nkebanyongolola ku kubulwa kikōkeji kwabo konso kwebalongeje bubi, kadi nkebasubula. Bakekalanga bantu bami, nami nkekalanga Leza wabo.+
24 “‘“Mwingidi wami Davida ukekalanga mulopwe wabo,+ kadi abo bonso bakekalanga na mukumbi umo.+ Bakanangila mu mutyibilo wami wa mambo, kadi bakalama senene bitungo byami.+
25 Bakekalanga mu ntanda yonapele mwingidi wami, Yakoba, mwashikete bakulutuba benu,+ kadi bakekalanga’mo nyeke,+ abo ne babo bana* ne bana ba babo bana;+ kadi Davida ukekalanga wabo mfumu nyeke.+
26 “‘“Nkasamba nabo kipwano kya ndoe;+ kikekalanga kipwano kya nyeke nabo. Nkebashimatyija ne kwibavudija+ kadi nkatūla kipandulwe kyami mu bukata mwabo nyeke.
27 Pema* wami ukekalanga nabo,* ami nkekalanga Leza wabo, nabo bakekalanga bantu bami.+
28 Penepo mizo ikayuka’mba ami, Yehova, napandula Isalela pakekala kipandulwe kyami mu bukata mwabo nyeke.”’”+
Kunshi kwa Dyani
^ Nansha’mba “umpuya; mushipiditu.”
^ Nansha’mba “mushipiditu.”
^ Nansha’mba “balunda nandi.”
^ Nansha’mba “balunda nandi.”
^ Kishima pa kishima i, “bana bana-balume ba bantu bobe.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Kishima pa kishima i, “bana bana-balume.”
^ Nansha’mba “Kīkalo; Njibo.”
^ Nansha’mba “pobadi.”
