Ezekyele 39:1-29
39 “Kadi abe, a mwanā muntu, nena bupolofeto padi Koka,+ mulombole amba, ‘Mfumu Mwinē Lupusa Lonso Yehova wanena namino amba: “Nsa kulwa nobe, abe Koka, mfumu mukatampe* wa Mesheke ne Tubala.+
2 Nsa kukujokeja ne kukwendeja kadi nkakutambija ku bipindi bya kulampe bininge bya kungala+ nkukandije pa ngulu ya Isalela.
3 Nkakupila buta bobe bwa miketo budi mu kuboko kobe kwa lunkuso ne kuponeja miketo yobe idi mu kuboko kobe kwa lundyo.
4 Ukaponena pa ngulu ya Isalela,+ abe ne bibumbo byobe byonso bya basola ne bantu bakekala nobe. Nkakupāna bu byakudya ku byoni bya miswelo yonso bipoya ne ku banyema ba ntanda.”’+
5 “‘Ukaponena mu ntanda,+ mwanda nesambe’kyo,’ i Mfumu Mwinē Lupusa Lonso Yehova unena.
6 “‘Kadi nkatuma mudilo padi Makoka ne pa boba bekalanga na mutyima-ntenke+ pa bisanga, ebiya bakayuka’mba ami ne Yehova.
7 Nkayukanya dijina dyami dijila mu bantu bami bene Isalela, kadi nkikalekapo dijina dyami dijila dikobakanibwe monka; penepo mizo ikayuka’mba ami ne Yehova,+ Mwine Ujila mu Isalela.’+
8 “‘Bine, kīyanga, kadi kikafikidila,’ i Mfumu Mwinē Lupusa Lonso Yehova unena. ‘Dino’di dyo difuku dyonanenene.
9 Bekadi ba bibundi bya Isalela bakatamba ne kwakija mudilo na byabulwi—mangabo matyematye* ne mangabo makatampe, mata a miketo ne miketo, impebwe ya divita* ne misungu. Kadi bakākija nabyo mudilo+ myaka isamba-ibidi.
10 Kebikebalombepo kusela mityi mu ntanda nansha kukongakanya nkuni mu mató mwanda bakākija mudilo na byabulwi.’
“‘Bakayata bikwatwa ku boba bebayete bikwatwa ne kutūta boba badi bebatūta,’ i Mfumu Mwinē Lupusa Lonso Yehova unena.
11 “‘Mu dyodya difuku, nkapa Koka+ kifuko kya kujīka’mo mu Isalela, mu musanza wa boba benda kutunduka kwa dijiba, nao ukajika kashinda ka boba bapita’mo. Mo mobakajīka Koka ne bibumbo byandi byonso bikatampe, kadi bakewita bu Musanza wa Hamona-Koka.*+
12 Njibo ya Isalela ikebajīka mu myeji isamba-ibidi mwanda wa kusubula ntanda.+
13 Bantu bonso ba ntanda bakebajīka, kino kikebaletela ntumbo mu difuku dyonketumbija,’+ i Mfumu Mwinē Lupusa Lonso Yehova unena.
14 “‘Kukatūlwa bantu ba kupita mu ntanda kyaba ne kyaba ne kujīka imbidi ishele pa ntanda, mwanda wa kwiisubula. Bakakimba’nka kukimba myeji isamba-ibidi.
15 Boba bapita mu ntanda shi abamone mukupa wa muntu, bakashimika kiyukeno kufula. Ebiya boba batūdilwe mwanda wa kujīka bakeujīka mu Musanza wa Hamona-Koka.+
16 Kukekala ne kibundi kitwa bu Hamōna.* Kadi bakasubula ntanda.’+
17 “Ino abe, mwanā muntu, Mfumu Mwinē Lupusa Lonso Yehova wanena namino amba: ‘Nena byoni bya miswelo yonso ne banyema bonso ba ntanda’mba, “Mwibungei mwiye. Mwibungei mujokoloke kitapwa kyami kyonemulongolwela, kitapwa kikatampe pa ngulu ya Isalela.+ Mukadya mwita ne kutoma mashi.+
18 Mukadya mwita wa bantu bakomokomo ne kutoma mashi a bamfumu ba ntanda—mikōko milume, twana twa mikōko, bambuji ne bañombe—banyema bonso banune ba Bashane.
19 Mukadya binune dyē ne kutoma mashi kufika ne byomukolwa kitapwa kyonemulongolwedile.”’
20 “‘Mukekuta ku meza ami tubalwe ne bakandanga pa makalo, bantu bakomokomo ne ba bulwi ba miswelo yonso,’+ i Mfumu Mwinē Lupusa Lonso Yehova unena.
21 “‘Nkamwekeja ntumbo yami mu mizo, kadi mizo yonso ikamona butyibi bonafikidija ne bukomo* bonalombola mu bukata mwabo.+
22 Tamba dyodya difuku, njibo ya Isalela ikayuka’mba ami ne Yehova Leza wabo.
23 Kadi mizo ikayuka’mba njibo ya Isalela yaendele mu bu misungi mwanda wa kilubo kyabo abo bene, mwanda kebankōkelepo.+ Penepo nebafya mpala yami+ ne kwibapāna ku balwana nabo,+ kadi bonso bapona ku kipete.
24 Nebalongele mwendele disubi dyabo ne kujilula kwabo, kadi nebafya mpala yami.’
25 “O mwanda Mfumu Mwinē Lupusa Lonso Yehova wanena namino amba: ‘Nkajokeja misungi ya Yakoba+ ne kufwila njibo yonso ya Isalela lusa;+ kadi nkalwila* dijina dyami dijila na bupyasakane.+
26 Shi abapu kufwijibwa bumvu mwanda wa kubulwa kunkōkela, bakashikata na mutyima-ntenke mu yabo ntanda,+ kwampikwa muntu nansha umo wa kwibakwatyija moyo.+
27 Shi nebajokeja ku bantu ne kwibakongakenya pamo tamba ku matanda a balwana nabo,+ nkepandula mu bukata mwabo ku meso a mizo mingimingi.’+
28 “‘Bakayuka’mba ami ne Yehova Leza wabo ponkebatuma mu bu misungi mu bukata mwa mizo ne ponkebajokeja ku yabo ntanda, kwampikwa kushiya muntu nansha umo kunyuma.+
29 Nkikebafipo monka mpala yami,+ mwanda nkapungulwila mushipiditu wami pa njibo ya Isalela,’+ i Mfumu Mwinē Lupusa Lonso Yehova unena.”
Kunshi kwa Dyani
^ Nansha’mba “mfumu mukulu.”
^ Kangabo, divule kaselwanga na boba bela miketo.
^ Bibwanika padi i, “tumikobe.”
^ Nansha’mba “Musanza wa Bibumbo Bikatampe bya Koka.”
^ Ko kushintulula’mba “Bibumbo Bikatampe.”
^ Kishima pa kishima i, “kuboko.”
^ Kishima pa kishima i, “nkalamata ndamatyidile.”
