Ezekyele 4:1-17
4 “Ino abe, mwanā muntu, sela kidiki wikitūle ku meso obe. Ufwatule’po kibundi—Yelusalema.
2 Wikitēkele kasāla,+ wikyubakile lubumbu lwa kasāla,+ wikilongele dibunda,+ wikitūdile mankambi, kadi wikijokoloje na bipungwa bya kutūta nabyo.+
3 Yata kininga kya kyuma, wikitūle pamo bwa lubumbu lwa kyuma pa bukata bwa abe ne kibundi. Ebiya utadije’mo mpala yobe, nakyo kikatēkelwa kasāla; ukekitēkela kasāla. Kino’ki kyo kiyukeno ku njibo ya Isalela.+
4 “Ebiya ukalādila ku lubavu lwa lunkuso ne kutūla mambo a njibo ya Isalela podi.*+ Ukasela mambo abo mu mafuku mavule olādile ku lubavu lobe.
5 Kadi nkakutungila mafuku 390, adingakene na myaka ya mambo abo,+ ukasela mambo a njibo ya Isalela.
6 Ufwaninwe kubwanya’o.
“Kupwa ukalāla musunsa wa bubidi, ku lubavu lwa lundyo, kadi ukasela mambo a njibo ya Yuda+ mu mafuku 40. Nakupe difuku dimo mwaka, difuku dimo mwaka.
7 Kadi ukatadija mpala yobe ku kasāla ka Yelusalema+ na kuboko kobe pululu, ufwaninwe kwikinenena bupolofeto bubi.
8 “Tala! Nkakukuta myonji kutyina wakalamuka ku lubavu lumo ke lubavu lukwabo kufika ne byobwanya mafuku a kasāla kobe.
9 “Kadi ukayata ñano, mebele a buluba, nkunde mikata, nkunde mityemitye, luku, ne nkunki wibitūle mu kintu kimo, ulonge nabyo mukate obe. Ukadya’o mafuku onso olādile ku lubavu, mafuku 390.+
10 Ukapima ne kudya mashekele 20* a byakudya ku difuku. Ukadya’byo pa bitatyi bitungwe.
11 “Kadi ukatoma mema pa kipimo, kipindi kimo kya pa bipindi bisamba bya hina.* Ukatoma’o pa bitatyi bitungwe.
12 “Ukadya’byo pamo’nka na abe udya mukate mujokoloke wa mebele a buluba; ukosha’byo kumeso abo pa tuvwi tūmu twa bantu.”
13 Yehova wanena monka’mba: “I namino’u mukadīla bene Isalela mikate yabo—ya disubi—mu mizo yonkebapalakenya’mo.”+
14 Penepo nanena’mba: “Ke nankyopo, a Mfumu Mwinē Lupusa Lonso Yehova! Tamba pa busongwalume bwami kufika ne pano, nkyesubije* na kudya mwita wa nyema mwifwile nansha nyema musasamunwe,+ kadi mu kyakanwa kyami kemwatwelele mwita wa disubi.”+
15 Ebiya waunena’mba: “Biyampe, nsa kukuleka wingidije tuvwi twa bañombe pa kyaba kya tuvwi twa bantu, kadi ukasōka’po mukate obe.”
16 Kupwa waunena’mba: “Mwanā muntu, nsa kutalula kibīko kya byakudya* mu Yelusalema,+ bakadya mikate yabo pa kipimo na kuzumbazumba kukatampe,+ kadi bakatoma na nzuba mema abo pa kipimo.+
17 Kino’ki kikalongeka amba babulwe mikate ne mema, betale koku batulumuka kadi bashinike pa mwanda wa kilubo kyabo.
Kunshi kwa Dyani
^ Kishima pa kishima i, “pa alo,” ko kunena’mba, lubavu lwa lunkuso lwa Ezekiele.
^ Kintu kya mangalame 230. Tala Mbwejo B14.
^ Kintu kya bipindi 0,6 bya litele. Tala Mbwejo B14.
^ Nansha’mba “muya wami kewesubije.”
^ Kishima pa kishima i, “kutyumuna mikombo ya mikate.” Ifunkila padi pa mikombo yadi ingidijibwa pa kubīka mikate.