Ezekyele 41:1-26
41 Penepo wauntweja mu kipandulwe kya panja,* wapima bikomo bya mufula; byadi na maboko* asamba mu bunkimbwa mutamba umo, ne maboko asamba mu bunkimbwa mutamba mukwabo.
2 Kibelo kyadi na maboko dikumi mu bunkimbwa, kadi mumbu ya mufula* ya ku kibelo yadi na maboko atano mutamba umo ne maboko atano mutamba mukwabo. Wapima bula bwakyo, kyadi na maboko 40, bunkimbwa bwakyo nabo maboko 20.
3 Penepo watwela munda,* wapima kikomo kya mufula kya pa kibelo kyadi na mutyika wa maboko abidi, kibelo nakyo kyadi na maboko asamba mu bunkimbwa. Mumbu ya mufula ya ku kibelo yadi* na maboko asamba-abidi.
4 Kupwa wapima kyumba kitadidile ku kipandulwe kya panja, kyadi na maboko 20 mu bula, ne maboko 20 mu bunkimbwa.+ Ebiya waunena’mba: “Kino’ki kyo Kijila Nakampata.”+
5 Penepo wapima lubumbu lwa tempelo, lwadi na mutyika wa maboko asamba. Byumba bya mufula byadi bijokolokele tempelo byadi na maboko aná mu bunkimbwa.+
6 Byumba bya mufula adi maetaje asatu, imo pangala pa mikwabo, na byumba 30 ku etaje ne etaje. Kwadi milomo ijokolokele lubumbu lwa tempelo yadi ikwete byumba bya mufula, amba bikwatyijo bileke kutwela mu lubumbu lwa tempelo.+
7 Ku mitamba yonso ibidi ya tempelo kwadi mwa kupita mwa bitonto-bitonto* mwadi mwenda mubaya pa kukanda ku byumba bya pangala.+ Bukata bwadi bwenda bubaila’ko kutamba ku etaje kutūla ku etaje mikwabo shi muntu utamba ku etaje ya munshi kakanda ku etaje ya pangala na kupityila pa etaje ya pa bukata.
8 Namona’mba kwadi lukala lutunduke kufulakufula konso kwa tempelo, kadi byalwilo bya byumba bya mufula byadi na bula bwa dibungu dituntulu dya maboko asamba kutūla ne ku difinko.
9 Lubumbu lwa panja lwa byumba bya munda lwadi na maboko atano mu bunkimbwa. Kwadi kifuko kya pululu* kufula kwa kyūbakwa kya byumba bya mufula byadi ku tempelo.
10 Pa bukata bwa tempelo ne byumba bya kudīla’mo*+ padi pashele kyaba kya maboko 20 mu bunkimbwa mutamba ne mutamba.
11 Kwadi kibelo pa bukata bwa byumba bya mufula ne kifuko kidi pululu ku mutamba wa kungala ne kibelo kikwabo ku mutamba wa kunshi. Kifuko kidi pululu kyadi na maboko atano mu bunkimbwa, kufulakufula konso.
12 Kyūbakwa kyadi kushika kitadidile ku kifuko kidi pululu kyadi na maboko 70 mu bunkimbwa ne maboko 90 mu bula; lubumbu lwa kyūbakwa lwadi na mutyika wa maboko atano kufulakufula konso.
13 Wapima tempelo, yadi na maboko 100 mu bula. Kifuko kidi pululu, ne kyūbakwa,* ne mumbu yayo nabyo byadi na maboko 100 mu bula.
14 Kumeso kwa tempelo mutamba wa kutunduka ne kifuko kidi pululu byadi na maboko 100 mu bunkimbwa.
15 Wapima bula bwa kyūbakwa kitadidile ku kifuko kidi pululu kunyuma, pamo ne bukōnde bwakyo bwa mitamba ibidi, kyadi na maboko 100.
Wapima ne kipandulwe kya panja, ne kipandulwe kya munda,+ ne bibidi bya pa bibelo bya kipango,
16 pamo ne nkala ya pa bibelo, ne madidisha a makadelema enda atyepa ku mfulo,+ ne bukōnde byadi mu bino bifuko bisatu. Kubwipi na lukala lwa pa kibelo kwadi mbao mibambe+ tamba panshi kutūla ne ku madidisha; kadi madidisha adi mapūtwe.
17 Bipimo byapiminwe peulu pa kibelo ne mu tempelo ya munda ne panja ne lubumbu lonso kufulakufula.
18 Kwadi kupokotwele bakelubi+ ne bifwatulo bya tunkindu,+ kankindu ne kankindu pa bukata bwa bakelubi babidi, kadi kelubi ne kelubi wadi na mapala abidi.
19 Mpala ya muntu yadi itadidile kankindu mutamba umo, mpala ya ntambo* nayo itadidile kankindu mutamba mukwabo.+ Byadi bipokotolwe namino ku tempelo yonso.
20 Ku lubumbu lwa kipandulwe kwadi kupokotwele bakelubi ne bifwatulo bya tunkindu tamba panshi kutūla ne peulu pa kibelo.
21 Ñunji* ya kipandulwe yadi na mitamba iná ya bula bumo.+ Kumeso kwa kifuko kijila* kwadi kintu kidi pamo bwa
22 kisōkelo kya mityi+ kya maboko asatu mu bwimwa ne maboko abidi mu bula. Kyadi na bipanda bya difinko, kadi kitako* kyakyo ne mbavu yakyo byadi bya mityi. Penepo waunena’mba: “Ano’a i meza adi ku meso a Yehova.”+
23 Kipandulwe kya panja ne kifuko kijila byadi na milango ibidi ibidi.+
24 Bibelo byadi na milango ibidi ibidi ijokoloka, kibelo ne kibelo na milango ibidi.
25 Ku milango ya kipandulwe kwadi kulongwe bakelubi ne bifwatulo bya tunkindu, pamo bwa byobya bya ku mumbu.+ Kwadi ne kintu kya mutyi kisomoke* kumeso kwa kibidi kya pa kibelo kya panja.
26 Kwadi ne madidisha a makadelema enda atyepa ku mfulo+ ne bifwatulo bya tunkindu ku mitamba yonso ibidi ya kibidi kya pa kibelo, ne ku byumba bya mufula bya tempelo ne ku bintu bisomoke.
Kunshi kwa Dyani
^ Kishima pa kishima i, “tempelo.” Mu shapita wa 41 ne 42, kino kishima kifunkila pa kipandulwe kya panja (Kijila) nansha pa kipandulwe kyonso (tempelo kubadila’mo Kijila ne Kijila Nakampata).
^ Kino kifunkila pa maboko malampe. Tala Mbwejo B14.
^ Kishima pa kishima i, “mufula.”
^ Ko kunena’mba, mu kipandulwe kya munda, nansha Kijila Nakampata.
^ Kishima pa kishima i, “bunkimbwa bwa kibelo bwadi.”
^ Mobimwekela kifunkila pa lukala lujokoloke.
^ Mobimwekela i kapitapita kajokolokele tempelo.
^ Nansha’mba “byumba.”
^ Ko kunena’mba, kyūbakwa kya kushika kwa kipandulwe.
^ Nansha’mba “ntambo mwana wa manyenze.”
^ Kishima pa kishima i, “Lunji.” Mobimwekela kino kifunkila pa kibelo kya mu Kijila.
^ Mobimwekela kifunkila pa Kijila Nakampata.
^ Kishima pa kishima i, “bula.”
^ Nansha’mba “lukūngu.”
