Ezekyele 42:1-20
42 Penepo wañendeja ku kipango kya panja dya kungala.+ Kadi wanselela ku njibo ya byumba bya kudīla’mo yadi kubwipi na kifuko kidi pululu,+ kungala kwa kyūbakwa kilungile’ko.+
2 Ku kibelo kya kungala yadi na maboko* 100 mu bula, ne maboko 50 mu bunkimbwa.
3 Yadi pa bukata bwa kipango kya munda kyadi na maboko 20 mu bunkimbwa,+ ne panshi palongololwe pa kipango kya panja. Bukōnde bwayo bwadi bwitadidile na bukwabo, kadi bwadi bu maetaje asatu.
4 Kumeso kwa byumba bya kudīla’mo* kwadi pitapita+ wa munda wa maboko 10 mu bunkimbwa ne maboko 100 mu bula,* kadi bibelo byabyo byadi kungala.
5 Byumba bya kudīla’mo bya pangala bya kyūbakwa’kya byadi bityetye kupita byobya bya mu etaje ya munshi ne ya pa bukata, mwanda bukōnde bwadīle’ko kyaba kikatampe.
6 Mwanda adi maetaje asatu, ino keadipo na bikomo pamo na bikomo bya bipango. O mwanda kwadīlwe kyaba kikatampe panshi kutabuka ku etaje ya munshi ne ya pa bukata.
7 Lubumbu lwa mabwe lwa panja kubwipi na byumba bya kudīla’mo dya ku kipango kya panja, lolwa lwadi lutadidile byumba bikwabo bya kudīla’mo, lwadi na maboko 50 mu bula.
8 Mwanda byumba bya kudīla’mo byadi dya ku kipango kya panja byadi na maboko 50 mu bula, ino byobya byadi kampalampala na kipandulwe byadi na maboko 100.
9 Byumba bya kudīla’mo byadi na kitwelelo ku mutamba wa kutunduka kitamba ku kipango kya panja kikanda’ko.
10 Kwadi ne byumba bya kudīla’mo munda mwa* lubumbu lwa mabwe dya kutunduka, kubwipi na kifuko kidi pululu ne kyūbakwa.+
11 Kwadi pitapita kumeso kwabyo pamo bwa yoya ya byumba bya kudīla’mo bya kungala.+ Byadi na bula bumo ne bunkimbwa bumo, kadi byadi na pa kutambila pa muswelo umo ne bupunga bumo. Bibelo byabyo
12 byadi pamo bwa bibelo bya byumba bya kudīla’mo byadi dya kunshi. Kwadi kibelo ku ngalwilo kwa pitapita, kumeso kwa lubumbu lwa mabwe ludi kubwipi nakyo dya kutunduka, kwadi kubwanya kutwelela muntu.+
13 Penepo waunena’mba: “Byumba bya kudīla’mo bya kungala ne byumba bya kudīla’mo bya kunshi byobya bidi kubwipi na kifuko kidi pululu,+ i byumba bya kudīla’mo bijila mudīlanga babitobo bafwenanga kudi Yehova byamulambu bijila nakampata.+ Ye mobatūlanga byamulambu bijila nakampata, kyamulambu kya miseke, kyamulambu kya bubi, ne kyamulambu kya mambo mwanda i kifuko kijila.+
14 Shi babitobo abatwela, kebakatambepo mu kifuko kijila kebenda ku kipango kya panja pampikwa kuvūla bivwalwa byobengilanga nabyo,+ mwanda i bijila. Bakavwala bivwalwa bikwabo mwanda wa kufwena ku bifuko kufikanga bantu bonso.”
15 Aye pa kupwa kupima kifuko kya tempelo ya munda,* wauntambija panja ku kibelo kitadidile kutunduka,+ ebiya wapima kifuko kyonso’kya.
16 Wapima mutamba wa kutunduka na dibungu dya kupima nadyo.* Wadi na mabungu 500 mu bula tamba mutamba umo kutūla ku mutamba mukwabo, mungya dibungu dya kupima nadyo.
17 Wapima mutamba wa kungala, wadi na mabungu 500 mu bula, mungya dibungu dya kupima nadyo.
18 Wapima mutamba wa kunshi, wadi na mabungu 500 mu bula, mungya dibungu dya kupima nadyo.
19 Wajokoloka mutamba wa kushika. Wapima mabungu 500 mu bula na dibungu dya kupima nadyo.
20 Wapima mitamba yakyo iná. Kyadi na lubumbu lwikijokoloke+ lwa mabungu 500 mu bula ne mabungu 500 mu bunkimbwa,+ mwanda wa kusansanya kijila na kya bitupu.+
Kunshi kwa Dyani
^ Kino kifunkila pa maboko malampe. Tala Mbwejo B14.
^ Nansha’mba “byumba.”
^ Mungya Bible wa Kingidiki wa Septante i, “maboko 100 mu bula.” Bilembwa bya Kihebelu bitangwa’mba: “Dishinda dya kuboko kumo.” Tala Mbwejo B14.
^ Kishima pa kishima i, “mu bunkimbwa bwa.”
^ Kishima pa kishima i, “njibo ya munda.”
^ Tala Mbwejo B14.
