Ezekyele 44:1-31
44 Waunjokejeja ku dishinda dya ku kibelo kya panja kya kipandulwe kitadidile kutunduka,+ kadi kyadi kishite.+
2 Penepo Yehova waunena’mba: “Kino kibelo kikekala nyeke kishite. Kekikashitulwapo, kadi i kutupu muntu nansha umo ukatwelela’po; mwanda Yehova, Leza wa Isalela, watwelela’po,+ o mwanda kifwaninwe kwikala nyeke kishite.
3 Ino mfumu ukashikata’mo mwanda wa kudya mukate ku meso a Yehova,+ ke-pantu aye i mfumu. Ukatwelela pa kibidi kya pa kibelo, kadi ukatambila’po.”+
4 Penepo waunselela dya ku kibelo kya kungala kumeso kwa tempelo. Ami amba ntale, namona ntumbo ya Yehova yayula mu tempelo ya Yehova.+ Ebiya napona mpala pa nshi.+
5 Penepo Yehova waunena’mba: “Mwanā muntu, tá mutyima,* tadija, kadi ivwana senene bintu byonso byonkulombola pa mwanda wa bitungo ne bijila bya tempelo ya Yehova. Tá mutyima bya binebine ku kitwelelo kya tempelo ne pa kutambila ponso pa kipandulwe.+
6 Ukanena njibo mitomboke ya Isalela amba, ‘Mfumu Mwinē Lupusa Lonso Yehova wanena namino amba: “A njibo ya Isalela, bilongwa byenu bya munyanji bibabwanina papo.
7 Pomutweja beni ba kubulwa kutwela kwisao mu mutyima ne ku ngitu mu kipandulwe kyami, bakobakanyanga tempelo yami. Muletanga byakudya byami, māni ne mashi, kipwano kyami papo kityibike pa mwanda wa bilongwa byenu byonso bya munyanji.
8 Kemutalangapo bintu byami bijila.+ Ino mubatūla bantu bakwabo batale mingilo mu kipandulwe kyami.”’
9 “‘Mfumu Mwinē Lupusa Lonso Yehova wanena namino amba: “I kutupu mweni nansha umo ushikete mu Isalela wa kubulwa kutwela kwisao mu mutyima ne ku ngitu ukatwela mu kipandulwe kyami.”’
10 “‘Ino bene Levi basāsukile kulampe nami kitatyi kyasāsukile Isalela kondi+ kebalonda bilezaleza byabo bya mukenye* bakangula bipa bya kilubo kyabo.
11 Kadi bakekala bengidi ba mu kipandulwe kyami ba kutala bibelo bya tempelo+ ne ba kwingila ku tempelo. Bakatapila bantu kyamulambu kisōkwe kituntulu ne kitapwa, kadi bakemana ku meso a bantu mwanda wa kwibengidila.
12 Byobebengidile ku meso a bilezaleza byabo bya mukenye ne kwikala bu kikukaja kya kulongeja Isalela bubi,+ o mwanda nebatulwila kuboko kwami natyipe mutyipo,’ i Mfumu Mwinē Lupusa Lonso Yehova unena, ‘kadi bakangula bipa bya kilubo kyabo.
13 Kebakamfwenapo kwingila bu babitobo bami nansha kufwena ku kintu kyami kyo-kyonso kijila nansha kijila nakampata, kadi bakafwijibwa bumvu pa mwanda wa bintu bya munyanji byobalongele.
14 Ino nkebatūla ke ba kutala mingilo ya tempelo, kutala mingilo yayo ne bintu byonso bifwaninwe kulongwa’mo.’+
15 “‘Ino babitobo bene Levi bana ba Zadoki,+ boba badi batala mingilo ya kipandulwe kyami kitatyi kyasāsukile bene Isalela kondi,+ bakamfwena mwanda wa kuñingidila, kadi bakemana ku meso ami mwanda wa kunambula māni+ ne mashi,’+ i Mfumu Mwinē Lupusa Lonso Yehova unena.
16 ‘Abo bo bakatwela mu kipandulwe kyami, bakafwena ku meza ami mwanda wa kuñingidila,+ kadi bakatala mingilo yabo yobañingidila.+
17 “‘Pobatwela mu bibelo bya kipango kya munda, bakavwala bivwalwa bya bukonge.+ Kebakavwalapo myoya pobengila mu bibelo bya kipango kya munda nansha panja pakyo.
18 Bakavwala bivwalwa bya ku mutwe bya bukonge ku mitwe yabo, kadi tuputula twa bukonge tukapūta bifuka byabo.+ Kebakavwalapo kintu nansha kimo kibaputumija.
19 Kumeso kwa abo kutambila mu kipango kya panja—kipango kya panja mudi bantu—bakavūla bivwalwa byobadi bengila+ nabyo ne kwibitūla mu byumba bya kudīla’mo bijila.*+ Kupwa bakavwala bivwalwa bikwabo, kutyina’mba bakasambwila* bantu buujila na bivwalwa byabo.
20 Kebafwaninwepo kukolola ku mitwe+ yabo nansha kulepeja nywene yabo ku mutwe. Bafwaninwe kutenda nywene ku mitwe yabo.
21 Babitobo kebafwaninwepo kutoma vinyu kitatyi kyobatwela mu kipango kya munda.+
22 Kebafwaninwepo kusonga mukaji wa kishala nansha mwana-mukaji mulubulwe;+ ino babwanya kusonga mujike wa ku lutundu lwa Isalela nansha mukaji wa kishala wa kitobo.’+
23 “‘Bakalombola bantu bami mwishidile kintu kijila na kya bitupu; kadi bakebafundija mwishidile kintu kya disubi na kyampikwa disubi.+
24 Bakekala bu batyibi mu kisambo;+ bafwaninwe kutyiba mambo mwendele mutyibilo wami wa mambo.+ Bafwaninwe kulama bijila byami ne bitungo byami bitala masobo+ ami onso ne kupandula masabato ami.
25 Kebafwaninwepo kufwena muntu mufwe, shi bitupu bakekala ba disubi. Inoko, babwanya kwisubija pa mwanda wa shabo, inabo, mwana mwana-mulume, mwana mwana-mukaji, mwanabo mwana-mulume, nansha mwanabo mwana-mukaji kasongelwe.+
26 Kadi kitobo pa kupwa kutōkejibwa, bakamubadila mafuku asamba-abidi.
27 Difuku dyakatwela mu kifuko kijila, mu kipango kya munda, mwanda wa kwingila mu kifuko kijila, ukalambula kyamulambu kyandi kya bubi,’+ i Mfumu Mwinē Lupusa Lonso Yehova unena.
28 “‘Kadi buno bo bukekala bupyani bwabo: Ami ye bupyani bwabo.+ Kemukebapepo kintu mu Isalela, mwanda amiwa ye kintu kyabo.
29 Abo bo bakadya kyamulambu kya miseke,+ kyamulambu kya bubi, ne kyamulambu kya mambo,+ kadi kintu kyonso kitūdīlwe mingilo ikola mu Isalela kikekala kyabo.+
30 Bipa bilumbuluke kutabuka bya mu bipa byonso bibajinji byele ne kyabuntu kyenu kya miswelo yonso kikekala kya babitobo.+ Kadi mukapa kitobo byangulwa bibajinji bya byakudya byenu bya nsekenseke.+ Kino kikalengeja dyese dikale pa bantu ba mu mobo enu.+
31 Babitobo kebakadipo koni nansha nyema mwifwile nansha musasamunwe.’+
Kunshi kwa Dyani
^ Kishima pa kishima i, “tūla mutyima obe.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “byumba bijila.”
^ Kishima pa kishima i, “bakapandula.”
