Ezekyele 46:1-24
46 “Mfumu Mwinē Lupusa Lonso Yehova wanena namino amba: ‘Kibelo kya kipango kya munda kitadidile kutunduka+ kikekala kishite+ mafuku asamba a mingilo,+ ino kikashitulwa mu difuku dya Sabato ne mu difuku dya kweji katenta.
2 Mfumu ukatwelela ku dishinda dya ku kibidi kya pa kibelo,+ kadi ukemana dya ku ñunji ya kibelo. Babitobo bakalambula kyamulambu kyandi kisōkwe kituntulu ne bitapwa byandi bya kipwano, ebiya ukevukwila pa lukala lwa pa kibelo kupwa katambe. Inoko kibelo kekikashitwepo kufika ne ku kyolwa.
3 Kadi bantu ba ntanda’ya nabo bakevukwila ku meso a Yehova pa ntwelelo ya kibelo’kya mu Masabato ne mu makweji katenta.+
4 “‘Kyamulambu kisōkwe kituntulu kikaleta mfumu kudi Yehova mu difuku dya Sabato, kikekala kya twana twa mikōko tulume tusamba twampikwa bulema ne mukōko mulume wampikwa bulema.+
5 Kyamulambu kya miseke kikekala kya Efa* umo ku mukōko mulume ne byonso byabwanya kuleta ku twana twa mikōko tulume, pamo ne hina* umo wa māni ku efa ne efa.+
6 Mu difuku dya kweji katenta, kyamulambu kikekala kya ñombe mulume mwana wampikwa bulema wa mu luombe, ne twana twa mikōko tulume tusamba, ne mukōko mulume umo; byonso bikekala byampikwa bulema.+
7 Ukalambula kyamulambu kya miseke kya efa umo ku ñombe mwana, ne efa umo ku mukōko mulume, ne byonso byabwanya kuleta ku twana twa mikōko tulume. Kadi ufwaninwe kulambula hina umo wa māni ku efa ne efa.
8 “‘Shi mfumu katwela, ukatwelela ku dishinda dya ku kibidi kya pa kibelo, kadi ukatambila ku dishinda dimo dyonka.+
9 Kadi shi bantu ba ntanda’ya abaiya ku meso a Yehova mu kitatyi kya masobo,+ boba batwelela ku kibelo kya kungala+ mwanda wa kutōta bakatambila ku kibelo kya kunshi,+ kadi boba batwelela ku kibelo kya kunshi bakatambila ku kibelo kya kungala. I kutupu muntu nansha umo ukajokela mu dishinda dya kibelo kyatwelele’ko, mwanda bakatambila ku kibelo kyobatadidile’ko.
10 Ino mfumu udi mu bukata mwabo, aye ukatwela kitatyi kyobatwela, kadi ukatamba kitatyi kyobatamba.
11 Pa masobo ne mu bitatyi bya masobo, kyamulambu kya miseke kikekala kya efa umo ku ñombe mulume mwana, ne efa umo ku mukōko mulume, ne byonso byabwanya kuleta ku twana twa mikōko tulume, pamo ne hina wa māni ku efa ne efa.+
12 “‘Shi mfumu waleta kyamulambu kisōkwe kituntulu+ nansha bitapwa bya kipwano bu kyamulambu kya kwilanga kudi Yehova, kibelo kitadidile kutunduka kikamushitwilwa, ukaleta kyamulambu kyandi kisōkwe kituntulu ne bitapwa byandi bya kipwano monka mwaletelanga’byo mu difuku dya Sabato.+ Shi watambe, kibelo kikashitwa.+
13 “‘Ukaleta difuku ne difuku kana ka mukōko kalume kampikwa bulema ka mwaka umo ne kwika bu kyamulambu kisōkwe kituntulu kudi Yehova.+ Ukalonga namino lubanga ne lubanga.
14 Lubanga ne lubanga, ukaleta pamo na kino’ki kipindi kimo kya pa bipindi bisamba bya efa bu kyamulambu kya miseke, ne kipindi kimo kya pa bipindi bisatu bya hina wa māni a kukusa ku bukula bupēla bu kyamulambu kya miseke kya nyeke kudi Yehova. Kino’ki i kitungo kya myaka na myaka.
15 Bafwaninwe kuleta kana ka mukōko kalume, ne kyamulambu kya miseke, ne māni lubanga ne lubanga bu kyamulambu kisōkwe kituntulu kya nyeke.’
16 “Mfumu Mwinē Lupusa Lonso Yehova wanena namino amba: ‘Shi mfumu wape bandi bana bonso kyabuntu bu bupyani, kikekala ke kintu kya bandi bana. I kintu kyabo kya bupyani.
17 Ino shi wape mwingidi wandi kyabuntu kya mu bupyani bwandi, kikekala kya mwingidi’wa kufika ne mu mwaka wa bwanapabo;+ kupwa kikajokela kudi mfumu. Enka bupyani bwa bandi bana bo bukekala bwabo lonso.
18 Mfumu kakaselapo bupyani bo-bonso bwa bantu na kwibayata kintu kyabo ku bukomo. Ukapa bandi bana bupyani bwa mu bintu byandi, amba muntu nansha umo wa mu bantu bami aleke kupangwa ku kintu kyandi.’”
19 Penepo wauntwejeja ku kitwelelo+ kyadi kubwipi na kibelo kyenda ku byumba bya kudīla’mo bijila* bya babitobo, byadi bitadidile kungala,+ namona’ko kifuko kunyuma dya kushika.
20 Waunena’mba: Kino’ki kyo kifuko kikatēkela’ko babitobo kyamulambu kya mambo ne kyamulambu kya bubi, kadi ye kobakasōkela kyamulambu kya miseke,+ amba baleke kulupwila kintu nansha kimo mu kipango kya panja ne kusambwila* bantu buujila.”+
21 Wauntambijija mu kipango kya panja, wampityija ku mafinko aná a kipango, namona kipango ku difinko ne difinko dya kipango kya panja.
22 Ku mafinko aná a kipango kwadi tubipango tutyetutye, twa maboko* 40 mu bula ne maboko 30 mu bunkimbwa. Tonso tuná twadi na bukata bumo.*
23 Kwadi milomo* kufulakufula konso kwa ato tuná, kadi munshi mwa milomo mwadi bifuko byūbake mwa kutēkela byamulambu.
24 Penepo waunena amba: “Ano’a ye mobo mwa kutēkela bengidi ba ku tempelo kitapwa kya bantu.”+
Kunshi kwa Dyani
^ Tala Mbwejo B14.
^ Tala Mbwejo B14.
^ Nansha’mba “byumba bijila.”
^ Kishima pa kishima i, “kupandula.”
^ Kino kifunkila pa maboko malampe. Tala Mbwejo B14.
^ Nansha’mba “Tonso tuná ne bupunga bwa mafinko ato byadi na bukata bumo.”
^ Nansha’mba “milongo.”
