Ezekyele 47:1-23
47 Penepo waunjokeja ku kibelo kya tempelo,+ namona’ko mema akuka dya kutunduka atamba munshi mwa lukala lwa pa kibelo kya tempelo,+ mwanda kumeso kwa tempelo kwadi kutadidile kutunduka. Mema adi akuka atamba munshi, ku mutamba wa lundyo lwa tempelo, kunshi kwa kisōkelo.
2 Ebiya wauntambijija mu dishinda dya ku kibelo kya kungala,+ wañendeja panja ne kufulakufula kufika ne ku kibelo kya panja kitadidile kutunduka,+ namona mema apunguluka ku mutamba wa lundyo.
3 Muntu’wa pa kutambila dya kutunduka na lukamba lwa kupima nalo mu kuboko kwandi,+ wapima maboko* 1 000, waumpityija mu mema; mema adi mu tumpo.*
4 Ebiya wapima maboko makwabo 1 000, waumpityija mu mema, afika mu manwi.
Wapima maboko makwabo 1 000, waumpityija’mo, mema afika mu kifuka.
5 Aye pa kupima maboko makwabo 1 000, kadi ke kamunonga konkibwanyapo kwabuka lwa nshi, mwanda mema adi malampe alomba muntu kusumba,* kamunonga ka mema kekabwanyapo kwabukwa lwa nshi.
6 Wangipangula’mba: “Mwanā muntu, le ubamone kino’ki?”
Kupwa wañendeja ne kunjokeja ku mbadi ya kamunonga.
7 Ami pa kujoka, namona mityi mingi ku mbadi ya kamunonga mitamba yonso ibidi.+
8 Penepo waunena’mba: “Ano mema akukilanga dya ku ntanda ya kutunduka kadi atūkilanga mu Alaba,*+ atwela mu dijiba. Ao pa kutwela mu dijiba,+ mema adi’mo akondapwa.
9 Bipangwa* byūmi byenda kitānda bikekala konso kukukila mema’a.* Kukekala mwita mungi wa lui, mwanda ano mema akakuka’ko. Mema a dijiba akondapwa, kadi kintu kyonso kikekala kyūmi kokwa konso kwenda kamunonga.
10 “Babiluwe ba lui bakemana kufula kwao tamba ku Ene-Ngedi+ kutūla ku Ene-Kelaimi, kwine kukekala kifuko kya kwanika’po makonde a nkokwa. Kukekala mwita wa miswelo mingi, pamo bwa mwita wa mu Dijiba Dikatampe.*+
11 “Dikekala na bifuko bya kinyanjinyanji ne bifuko bya bitekateka, bino’bi kebikondapwapo. Bikashilwa mwepo.+
12 “Mityi ya miswelo yonso idibwa’ko ikamena ku mbadi yonso ibidi ya kamunonga. Mani ayo keakomepo; kadi keikatunyapo kupa bipa. Ikapa bipa bipya kweji ne kweji, mwanda mema ayo atambanga ku kipandulwe.+ Bipa byayo bikekala bu byakudya, mani ayo nao akondapa.”+
13 Mfumu Mwinē Lupusa Lonso Yehova wanena namino amba: “Ino’i yo ntanda yomukapa bisaka 12 bya Isalela bu ntanda ya bupyani, Yosefa ukekala na bipindi bibidi.+
14 Mukapyana’yo ne kupebwa bipindi bya muswelo umo.* Natyipile kupa bakulutuba benu+ ino ntanda, pano ibemupebwa* bu bupyani.
15 “Uno’u o mukalo wa ntanda ku mutamba wa kutunduka: Wendanga tamba ku Dijiba Dikatampe ku dishinda dya Hetelone+ dya ku Zedada,+
16 Hamata,+ Belota,+ ne Shibelaimi, udi pa bukata bwa ntanda ya Damakasa ne ntanda ya Hamata, kutūla ne ku Hazele-Hatikona, udi kubwipi na mukalo wa Haulane.+
17 Mukalo ukenda tamba ku dijiba kutūla ku Hazala-Enona,+ ku mukalo wa Damakasa kutunduka, ne mukalo wa Hamata.+ Uno’u o mukalañano wa kungala.
18 “Mutamba wa kutunduka upitanga pa bukata bwa Haulane ne Damakasa ne ku Yodano pa bukata bwa Ngileade+ ne ntanda ya Isalela. Mukapima tamba ku mukalo kutūla ne ku dijiba dya kutunduka.* Uno’u o mukalañano wa kutunduka.
19 “Mukalañano wa kunshi* ukekala tamba ku Tamala kutūla ne ku mema a Medibote-Kadesha,+ kufika ne ku Kinekaneka* ne ku Dijiba Dikatampe.+ Uno’u o mukalañano wa kunshi.*
20 “Mutamba wa kushika i Dijiba Dikatampe, tamba ku mukalo kufika ne ku kifuko kītadidile na Lebo-Hamata.*+ Uno’u o mukalañano wa kushika.”
21 “Mukeabanya ino ntanda mu bukata mwenu, mu bisaka 12 bya Isalela.
22 Mukeabila’yo bu bupyani mu bukata mwenu, banwe ne beni bashikatanga nenu babutwidile bana mu bukata mwenu; kadi bakekala komudi pamo bwa bantu babutulwe bene Isalela. Bakatambula bupyani mu bisaka bya Isalela pamo nenu.
23 Mukapa mweni wa kibundi bupyani mu ntanda ya kisaka kwashikete,” i Mfumu Mwinē Lupusa Lonso Yehova unena.
Kunshi kwa Dyani
^ Kino kifunkila pa maboko malampe. Tala Mbwejo B14.
^ Nansha’mba “mu tukukunyu.”
^ Nansha’mba “koila, kusaila.”
^ Nansha’mba “dilungu dya musanza.”
^ Nansha’mba “Myuya.”
^ Kishima pa kishima i, “tuminonga tubidi.”
^ Ko kunena’mba, Meditelanea.
^ Kishima pa kishima i, “Mukapyana’yo, umo ne umo pamo’nka na mwanabo.”
^ Kishima pa kishima i, “ibemuponena.”
^ Ko kunena’mba, Dijiba Difwe.
^ Kishima pa kishima i, “mutamba wa kunshi dya kunshi.”
^ Ko kunena’mba, Kinekaneka kya Edipito.
^ Kishima pa kishima i, “mutamba wa kunshi dya kunshi.”
^ Nansha’mba “kibelo kya Hamata.”
