Ezekyele 7:1-27
7 Kinenwa kya Yehova kyaiya monka kondi amba:
2 “Ino abe, mwanā muntu, Mfumu Mwinē Lupusa Lonso Yehova wanena ntanda ya Isalela namino amba: ‘Mfulo! Mfulo ibaiya pa mafinko aná a ntanda.
3 Pano mfulo idi podi, kadi nsa kulekelela bulobo bwami podi, ne kadi nsa kukutyibila mambo mwendele mashinda obe ne kukwita wishintulwile pa bilongwa byobe byonso bya munyanji.
4 Diso dyami kedikakwivwaninapo bulanda; kadi nkikakukwatyilwapo lusa,+ mwanda nkakuletela byobya bilupuka ku mashinda obe, kadi ukangula bipa bibi bya bilongwa byobe bya munyanji.+ Ebiya ukayuka’mba ami ne Yehova.’+
5 “Mfumu Mwinē Lupusa Lonso Yehova wanena namino amba: ‘Tala! Kyamalwa, kyamalwa kekyamwekele kyakyo kīya.+
6 Mfulo īyanga; mfulo ikāya; ikakubūkila.* Tala! Īyanga.
7 Kyaba kyobe* kibafika, abe ushikete mu ntanda. Kitatyi kyakyo kīya, difuku dibafwena.+ Kudi kavutakanya, ino kekudipo nsadi ya tusepo pa ngulu.
8 “‘Nsa kukupungulwila bukalabale bwami+ panopano ponka, kadi nsa kulekelela ne pa mfulo bulobo bwami podi,+ ne kadi nsa kukutyibila mambo mwendele mashinda obe ne kukwita wishintulwile pa bilongwa byobe byonso bya munyanji.
9 Diso dyami kedikakwivwaninapo bulanda; kadi nkikakukwatyilwapo lusa.+ Nkakuletela byobya bilupuka ku mashinda obe, kadi ukangula bipa bibi bya bilongwa byobe bya munyanji. Ebiya ukayuka’mba ami, Yehova, nakukupila.+
10 “‘Tala, difuku! Tala, dyadyo dīya!+ Kyaba kyobe* kibafika; mukombo ubatōya maluba kadi ditatu* dibamena.
11 Lūma lubatambe mu mukombo wa bubi.+ Abo kebakapandepo ne bupeta bwabo ne bibumbo byabo ne ntumbo yabo mine.
12 Kitatyi kikāya, difuku dikafika. Yewa upota kakisangala, kadi yewa upoteja kakidila, mwanda kudi bukalabale pa kibumbo kyabo kyonso.*+
13 Mwanda yewa upoteja kakajokelapo ku kyokya kipotejibwe, nansha shi būmi bwandi bubapande, mwanda kimonwa kidi pa kibumbo kyonso. I kutupu muntu ukajoka, kadi pa mwanda wa kilubo kyandi,* i kutupu muntu ukalama būmi bwandi.
14 “‘Abaile kimpungidi,+ kadi muntu ense i mwiteakanye, ino kekudipo nansha umo wenda ku bulwi, mwanda bukalabale bwami budi pa kibumbo kyonso.+
15 Kipete kidi panja,+ kipupo kya misongo ne kipupo kya nzala bidi munda. Ense udi mu ntanda ukafwa ku kipete, kadi kipupo kya nzala ne kipupo kya misongo bikakuba boba badi mu kibundi.+
16 Bantu babo bashele’ko bōmi balonga buninge bwa kupanda bakenda ku ngulu, kadi ense ukabinza pa kilubo kyandi pamo bwa bankutyi ba misanza.+
17 Maboko abo onso akakōka, kadi manwi abo onso akasūma mema.*+
18 Abavwala masāka,+ kadi kutetema kubebakwata.* Muntu ense ukafwijibwa bumvu, kadi mutwe onso ukekala dibala.*+
19 “‘Bakela ndalama yabo mu bipito, kadi olo yabo ikekala ke kya munyanji kobadi. Ndalama yabo ne olo yabo kebikabwanyapo kwibapandija mu difuku dya bukalabale bwa Yehova.+ Abo* kebakekutapo, kadi kebakayujapo bifu byabo, mwanda ibaikala ke* kikukaja kilengeja kilubo kyabo.
20 Betatwidile buya bwa bya kwidyangula nabyo byabo,* kadi balongele nabyo bankishi ba munyanji, bilezaleza byabo bya mukenye.+ O mwanda nkeilonga ke kintu kya munyanji kobadi.
21 Nkeipāna* mu kuboko kwa beni bu kikwatwa ne kudi babi ba pa ntanda bu kitūtwa, kadi bakeikobakanya.
22 “‘Nkebavundamina,+ kadi bakakobakanya kifuko kyami kifyame,* bangivi nabo bakatwela’mo ne kwikikobakanya.+
23 “‘Longa muyololo,*+ mwanda ntanda ibayula butyibi bwa mashi+ kadi kibundi kibayula lūma.+
24 Nkaleta mizo mibimibi,+ kadi ikayata mobo abo ke ayo,+ nkafudija mitatulo ya bantu bakomokomo, kadi bipandulwe byabo bikakobakanibwa.+
25 Pakāya malwa abo, bakakimba ndoe, ino keikekala’kopo.+
26 Kukāya kyamalwa kyoki ke kyoki, ne mwanda ou ke ou, kadi bantu bakakimba kimonwa kwa mupolofeto,+ ino kijila* kya kitobo kikoneka pamo ne madingi a bakulumpe mene.+
27 Mulopwe ukadila madilo,+ kadi mfumu ukavwala kutyumukwa mutyima,* maboko a bantu ba ntanda akazakala luzakalo. Nkebalongela mwendele mashinda abo, kadi nkebatyibila mambo monka mobatyibila mambo. Ebiya bakayuka’mba ami ne Yehova.’”+
Kunshi kwa Dyani
^ Kishima pa kishima i, “ikakulangukila.”
^ Bibwanika padi i, “Nkata wa bimuna.”
^ Nansha’mba “kibutakwe.”
^ Bibwanika padi i, “Nkata wa bimuna.”
^ Ko kunena’mba, boba bapota bintu ne boba bebipoteja kebakamwena’mopo, mwanda bonakani bukāya pobadi abo bonso.
^ Bibwanika padi i, “na kilubo kyandi.”
^ Ko kunena’mba, kwisukwila pa mwanda wa moyo.
^ Ko kunena’mba, mitwe yabo ikatendwa mu madilo.
^ Kishima pa kishima i, “kubebapūta.”
^ Nansha’mba “Myuya yabo.”
^ Ko kunena’mba, ndalama yabo ne olo yabo.
^ Ko kunena’mba, bintu byabo bya olo ne ndalama.
^ Ko kunena’mba, ndalama ne olo yabo yobadi bapunga nayo bilezaleza.
^ Mobimwekela kifunkila pa kipindi kya munda kya kipandulwe kya Yehova.
^ Ko kunena’mba, miyololo ya bu musungi.
^ Nansha’mba “bulombodi.”
^ Nansha’mba “masala.”
