Ezekyele 8:1-18
8 Penepo mu mwaka wa busamba, mu kweji wa busamba, mu difuku dya butano dya kweji, ponadi nshikete mu yami njibo, bakulumpe ba Yuda nabo bashikete ku meso ami, kuboko kwa Mfumu Mwinē Lupusa Lonso Yehova kwaunkwata mwine’mwa.
2 Ponadi ntala, namona kintu kiifwene na mudilo; kwadi mudilo munshi mwa kyokya kyadi kimweka bwa kifuka kyandi,+ kadi tamba ku kifuka kyandi ne kukanda kyadi kyeñenya, pamo bwa kukelema kwa olo misambakanye na ndalama.+
3 Kupwa waolola kyokya kyadi kimweka bu kuboko, wauntekwina ku kituntu kya nywene ya ku mutwe wami, kadi mushipiditu waunselela pa bukata bwa ntanda ne mūlu, wakantūla ku Yelusalema mu bimonwa bya kwa Leza, ku ntwelelo ya kibelo kya munda+ kitadidile kungala, kwadi kwimene kyelekejo kya* kilezaleza kya mukao kikolomona mukao.+
4 Kadi tala! Ntumbo ya Leza wa Isalela yadi kwine’kwa,+ pamo bwa kyokya kyonamwene mu dilungu dya musanza.+
5 Penepo waunena’mba: “Mwanā muntu, nakwisāshila, tulwila meso obe dya kungala.” Ebiya natulwila meso ami dya kungala, ino kwine’kwa, kungala kwa kibelo kya kisōkelo, kwadi kino kyelekejo kya* mukao pa kitwelelo.
6 Kadi waunena’mba: “Mwanā muntu, le ubamone bintu bibibibi bya munyanji bilonga njibo ya Isalela kuno,+ bintu binsonsolwela kulampe na kipandulwe kyami?+ Ino usa kumona bintu bya munyanji bibi kutabuka bino.”
7 Kupwa waunselela ku kibelo kya kipango, ami’mba ntale namona kipunzu ku lubumbu.
8 Waunena’mba: “Mwanā muntu, nakwisāshila, tubula lubumbu.” Penepo natubula lubumbu, namona kitwelelo.
9 Waunena’mba: “Twela utale bintu bibi kadi bya munyanji byobalonga kuno.”
10 Ebiya natwela kentale, namona bankishi ba miswelo yonso ya bintu bilandala ne banyema ba mukenye+ ne bilezaleza byonso bya mukenye* bya njibo ya Isalela;+ byadi bilongwe ku lubumbu konso.
11 Kadi bakulumpe 70 ba njibo ya Isalela badi bemene ku meso abyo, pamo ne Yazania mwanā Shafana+ wimene mu bukata mwabo. Muntu ne muntu wadi na kya kusōkela’mo ensense mu kuboko kwandi, kadi dilenga dya ensense dya mananshi dyadi dikanda.+
12 Waunena’mba: “Mwanā muntu, lelo ubamone bilonga bakulumpe ba njibo ya Isalela mu fukutu, muntu ne muntu mu byumba bya munda mulombwelwe bilezaleza byandi?* Mwanda banenanga’mba, ‘Yehova ketumwenepo. Yehova washiye ino ntanda.’”+
13 Kadi waunena monka’mba: “Usa kumona bintu bya munyanji bibi mpata kupita ne byobalonga’bi.”
14 Waunselela ku ntwelelo ya kibelo kya kungala kya njibo ya Yehova, namona’ko bana-bakaji bashikete badila leza Tamuza.
15 Waunena kadi amba: “A mwanā muntu, lelo ubamone kino’ki? Usa kumona bintu bya munyanji bibi kutabuka bino’bi.”+
16 Ebiya waunselela ku kipango kya munda kya njibo ya Yehova.+ Kwine’kwa, pa kibelo kya tempelo ya Yehova, pa bukata bwa kibidi kya pa kibelo ne kisōkelo, kwadi kintu kya bantu 25 belele nyuma ku tempelo ya Yehova, mapala abo atadidile kutunduka; badi bevukwila ku dyuba kutunduka.+
17 Waunena’mba: “Mwanā muntu, lelo ubamone kino’ki? Le i mwanda mutyetye ku njibo ya Yuda kulonga bino bintu bya munyanji, kudinga lūma+ mu ntanda ne kunsanshija nyeke? Aba kebo bangolwela musambo* ku mulu wami.
18 O mwanda nkalonga bintu na bukalabale. Diso dyami kedikebevwaninapo bulanda; kadi nkikebakwatyilwapo lusa.+ Nansha shi bele mabila mu matwi ami na diwi ditunduke, nkikebevwanapo.”+
Kunshi kwa Dyani
^ Nansha’mba “nkishi wa.”
^ Nansha’mba “nkishi wa.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Nansha’mba “mu byumba bya munda bya bintu byandi bilumbuluke?”
^ Mobimwekela i musambo wadi wingidijibwa mu butōtyi bwa bilezaleza.
