Ezela 1:1-11

  • Lubila lwa Mulopwe Kilusa lwa kūbakulula tempelo (1-4)

  • Kuteakanya kujoka kwa misungi tamba ku Babiloni (5-11)

1  Pa kufikidija kinenwa kya Yehova kyanenene Yelemia,+ mu mwaka mubajinji wa Kilusa+ mulopwe wa Peleshia, Yehova watunwine mushipiditu wa Kilusa mulopwe wa Peleshia eleje lubila mu bulopwe bwandi bonso, welulemba+ ne kwilulemba’mba: 2  “Kilusa mulopwe wa Peleshia wanena namino amba, ‘Yehova Leza wa mūlu waumpe malopwe onso a pano pa ntanda,+ kadi waumpe ne mwingilo wa kumūbakila njibo mu Yelusalema,+ udi mu Yuda. 3  Ense udi mu bukata mwenu wa ku bantu bandi bonso, Leza wandi ekale nandi, kadi akande ku Yelusalema, udi mu Yuda, akobakulule njibo ya Yehova Leza wa Isalela—aye i Leza wa bine—njibo yandi yadi mu Yelusalema.* 4  Yewa ense wikele bu mweni,+ konso kwadi, bamukwashe kudi balondakani nandi,* bamupe ndalama ne olo,* bintu ne bimunanwa, pamo ne kyamulambu kya kwilanga mwanda wa njibo ya Leza wa bine+ yadi mu Yelusalema.’” 5  Penepo mitwe ya mobo a bashandya Yuda ne Benjemani ne babitobo ne bene Levi—yewa ense watunwinwe mushipiditu wandi na Leza wa bine—weteakanya kukanda akobakulule njibo ya Yehova, yadi mu Yelusalema. 6  Boba bonso badi bebajokolokele bebakwasha, bebapa* bipungwa bya ndalama ne bya olo, ne bintu, ne bimunanwa, ne bintu bya bulēme, kutentekela pa byamulambu byonso bya kwilanga. 7  Mulopwe Kilusa watambija ne bipungwa bya mu njibo ya Yehova byaselele Nebukaneza ku Yelusalema webitūla mu njibo ya leza wandi.+ 8  Kilusa mulopwe wa Peleshia webilupula mu bwendeji bwa Miteledate mulami wa byabulēme, mwine wabadīle’byo Sheshabazala*+ mfumu wa Yuda. 9  Bino’bi byo bintu byabadilwe: Bintu 30 bya olo bidi bwa bilala, bintu 1 000 bya ndalama bidi bwa bilala, bintu 29 bya kupingakanya, 10  ngeso mityemitye 30 ya olo, ngeso mityemitye 410 ya ndalama, ne bipungwa bikwabo 1 000. 11  Bipungwa byonso bya olo ne bya ndalama byadi 5 400. Sheshabazala wakanda na bino byonso kitatyi kyobatambije misungi+ mu Babiloni yaenda ku Yelusalema.

Kunshi kwa Dyani

^ Bibwanika padi i, “udi mu Yelusalema.”
^ Kishima pa kishima i, “bana-balume ba mu kifuko kyandi.”
^ Nansha’mba “nsahabu.”
^ Kishima pa kishima i, “bakomeja maboko abo.”
^ Pakwabo i Zelububele mu Eza 2:2; 3:8.
BISONEKWA BIJILA—BWALAMUNI BWA NTANDA MIPYA (2018)
Ezela 1
Kiluba
Tanga Bible pa Entelenete
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt p. 40