Ezela 4:1-24
4 Balwana na Yuda ne Benjemani+ pa kwivwana’mba misungi+ yajokele yayo yubakila Yehova Leza wa Isalela tempelo,
2 ponkapo bafwena Zelububele ne mitwe ya mobo a bashabo kebebanena’mba: “Longai tūbake nenu; mwanda batwe netu tutōtanga* Leza wenu+ pamo bwa banwe, kadi tumutapilanga bitapwa tamba mu mafuku a Esala-Hadone+ mulopwe wa Ashidia, mwine wetuselēle kuno.”+
3 Ino Zelububele, ne Yeshua ne mitwe mikwabo ya mobo a bashandya Isalela bebatentulula’mba: “Kemudipo na lupusa lwa kūbaka netu njibo ya Leza wetu,+ mwanda batwe bene tusa kūbakila’yo Yehova Leza wa Isalela, monka mwetusoñaninye Kilusa mulopwe wa Peleshia.”+
4 Penepo bantu ba ntanda’ya badi batyumuna* bantu ba Yuda mutyima ne kwibaseleja mutyima kūlu amba baleke kūbaka.+
5 Bakebalobela badingidi ba kuvutakanya mpango+ yabo mu mafuku onso a Kilusa mulopwe wa Peleshia kufika ne mu bulopwe bwa Dadiusa+ mulopwe wa Peleshia.
6 Ku ngalwilo kwa bulopwe bwa Ahaswelusa, balemba mukanda wa kusambila bekadi ba Yuda ne ba Yelusalema.
7 Kadi mu mafuku a Alatazelekishishi mulopwe wa Peleshia, ba Bishilame, Miteledate, Tabele ne bengidi nandi bakwabo balembela Mulopwe Alatazelekishishi; baalamwine mukanda’wa mu Kialamia,+ beulemba na masomo a Kialamia.*
8 * Lehumi muludiki mukulu ne Shimishai musonekeji balembela Mulopwe Alatazelekishishi mukanda pa mwanda wa Yelusalema amba:
9 (Wadi utamba kudi Lehumi muludiki mukulu ne Shimishai musonekeji ne bengidi nabo bakwabo, batyibi ne bambikavu batyebatye, balembi, bantu ba Eleke,+ bene Babiloni, bekadi ba Susa,+ ko kunena’mba bene Elama,+
10 ne mizo mikwabo yobaselele bu misungi kudi Asenapala mukatampe kadi mulēmekibwe, webashikatyija mu bibundi bya Samadia,+ bakwabo nabo mu ntanda ya Bukila bwa Munonga,* shi ke pano
11 uno’u o mukanda mutentule obakutumina.)
“Kudi Mulopwe Alatazelekishishi, utamba kudi bengidi bobe, bantu ba ntanda ya Bukila bwa Munonga: Shi ke pano
12 mulopwe ayuke amba Bayuda batambile kodi bakandila kuno kotudi abafika ku Yelusalema. Pano bobakululanga kibundi kitomboke kadi kibi, kadi kebapu mumbu+ ne kulongolola byalwilo.
13 Pano mulopwe ayuke amba shi kino kibundi kyubakululwe kadi mumbu yakyo ipwe, nabya kebakaletapo musonko, mulambu+ nansha munyenga, kadi mu bibīko bya byabulēme bya balopwe kemukekalapo kintu.
14 Byotudyanga mwepo wa ku njibo mikatakata* kadi ke kyendele’mopo batwe kumona bintu bya mulopwe byoneka, o mwanda tubatumanya kuyukija mulopwe kino’ki,
15 amba bakimbe mu mukanda wa bilembwa bya bankambo obe.+ Usa kutana mu mukanda wa bilembwa, ujingulule amba kino kibundi i kibundi kitomboke, kiletela balopwe ne matanda a bubikavu* kyaka, kadi mudi bantu bakolomonanga butomboki tamba kala. O mwanda kino kibundi kyaonakanibwe.+
16 Tubayukija mulopwe amba shi kino kibundi kyubakululwe kadi mumbu yakyo ipwe, nabya kukekalapo na lupusa* pa ntanda ya Bukila bwa Munonga.”+
17 Mulopwe watuma musapu kudi Lehumi muludiki mukulu ne Shimishai musonekeji ne bengidi nabo bakwabo badi bashikata mu Samadia ne mu ntanda mikwabo ya Bukila bwa Munonga amba:
“Tubaimunai! Shi ke pano
18 kilembwa kya mulopwe kyomwetutumīne kyatangilwe* senene ku meso ami.
19 Nasoñenye bakimbe, kadi basokwele amba tamba kala kino kibundi kyadi kilwa na balopwe, kadi mwaikele butomboki ne tuvutakanya.+
20 Kwadi balopwe bakomokomo pa Yelusalema badi babikele ntanda yonso ya Bukila bwa Munonga, kadi badi bebafuta musonko, mulambu, ne munyenga.
21 Shi ke pano, soñanyai babo bantu baleke mwingilo, amba kibundi kileke kūbakululwa kufika ne byonkaleta kishima.
22 Tai mutyima mwakelwa kulonga kintu pa uno mwanda, kutyina’mba bintu bya mulopwe byakonekela’ko.”+
23 Penepo kilembwa kitentule kya Mulopwe Alatazelekishishi pa kupwa kutangwa ku meso a Lehumi ne Shimishai ne bengidi nabo, baenda bukidibukidi ku Yelusalema kudi Bayuda, bebakankaja ku bukomo.
24 Po paimene mwingilo wa njibo ya Leza, yadi mu Yelusalema; kadi waimene kufika ne mu mwaka wa bubidi wa bulopwe bwa Dadiusa mulopwe wa Peleshia.+
Kunshi kwa Dyani
^ Kishima pa kishima i, “tukimbanga.”
^ Kishima pa kishima i, “bazozeja makasa a.”
^ Bibwanika padi i, “wadi mulembe mu Kialamia kupwa bewalamuna.”
^ Eza 4:8 kutūla ku 6:18 walembelwe dibajinji mu Kialamia.
^ Nansha’mba “Bukila bwa Ufalete.”
^ Nansha’mba “Byotutambulanga mfutwa yetu ku njibo mikatakata.”
^ Nansha’mba “buludiki bwa bipindi bya ntanda.”
^ Kishima pa kishima i, “kipindi.”
^ Bibwanika padi i, “kyaalamwinwe kupwa kyatangwa.”
