Ezela 5:1-17
5 Penepo ba mupolofeto Hakai+ ne Zekadia+ munkanā Ido+ banena bupolofeto kudi Bayuda badi mu Yuda ne mu Yelusalema, mu dijina dya Leza wa Isalela wadi pobadi.
2 Po paanjile ba Zelububele+ mwanā Shityile ne Yeshua+ mwanā Yehozadake kūbakulula njibo ya Leza,+ yadi mu Yelusalema; kadi bapolofeto ba Leza badi nabo, bebakwasha’ko.+
3 Mu kine kitatyi’kya Tatenai mbikavu wa ntanda ya Bukila bwa Munonga* ne Shetale-Bozenai ne bengidi nabo baiya kobadi kebebepangula’mba: “Le i ani wemusoñanya kūbaka ino njibo ne kupwa kino kyūbakwa?”*
4 Penepo bebepangula’mba: “Le bantu bōbaka kino kyūbakwa, abo majina i bāni?”
5 Ino Leza wadi ulamine* bakulumpe ba Bayuda,+ kadi kebebakankejepo kufika ne byatuminwe musapu kudi Dadiusa, ne byajokele kilembwa kya mulopwe pa uno mwanda.
6 Uno’u o mukanda mutentule watumine Tatenai mbikavu wa ntanda ya Bukila bwa Munonga ne Shetale-Bozenai ne bengidi nandi, bambikavu batyebatye ba ntanda ya Bukila bwa Munonga, kudi Mulopwe Dadiusa;
7 bamutumīne musapu, kadi balembele namino amba:
“Kudi Mulopwe Dadiusa:
“Ndoe yonso ikale nobe!
8 Mulopwe ayuke amba twaendele ku ntanda ya bubikavu ya Yuda ku njibo ya Leza mukatampe, yūbakwanga na mabwe makatampe majokoloje pa kifuko’kya, kadi mityi itentekwanga pa mumbu. Mwingilo wingilwanga lubilo na bantu kadi wendanga kumeso mwanda wa bukomo bwabo.
9 Penepo twaipangwile bakulumpe babo amba: ‘Le i ani wemusoñanya kūbaka ino njibo ne kupwa kino kyūbakwa?’*+
10 Kadi twebepangwile majina abo mwanda wa tukulombole, amba tulembe majina a bana-balume bebendeja.
11 “Abo betulondolwele namino amba: ‘Batwe twi bengidi ba Leza wa mūlu ne panshi, kadi tūbakululanga njibo yaubakilwe kepadi myaka mivule, yaubakile mulopwe wa Isalela wapwa’yo.+
12 Inoko, batata byobalobeje Leza wa mūlu,+ webapēne mu kuboko kwa Nebukaneza+ mulopwe wa Babiloni, mwine Kaladea, watūtyile ino njibo+ ne kuselela bantu mu Babiloni bu misungi.+
13 Ino, mu mwaka mubajinji wa Kilusa mulopwe wa Babiloni, Mulopwe Kilusa wasoñenye amba ino njibo ya Leza yubakululwe.+
14 Ne kadi, Mulopwe Kilusa watambije mu tempelo ya Babiloni bipungwa bya olo ne bya ndalama bya mu njibo ya Leza byaselele Nebukaneza ku tempelo ya mu Yelusalema waenda nabyo ku tempelo ya Babiloni.+ Bapele’byo muntu umo witwa bu Sheshabazala,*+ obatūdile bu mbikavu+ kudi Kilusa.
15 Kilusa wamunena’mba: “Sela bino bipungwa. Enda ukebitūle mu tempelo idi mu Yelusalema, kadi njibo ya Leza yubakululwe pa kifuko poyadi dibajinji.”+
16 Penepo uno Sheshabazala waiya, waala byalwilo bya njibo ya Leza,+ idi mu Yelusalema; kadi tamba penepa kufika ne pano ikyubakwa keyapwile.’+
17 “Nanshi, shi i biyampe ku meso a mulopwe, bakimbe mu kibīko kya byabulēme bya bulopwe mwamo mu Babiloni, mwanda wa kuyuka shi Mulopwe Kilusa wasoñenye bobakulule yoya njibo ya Leza idi mu Yelusalema;+ kadi butyibi bwa mulopwe pa uno mwanda betutumine’bo.”
Kunshi kwa Dyani
^ Nansha’mba “Bukila bwa Ufalete.”
^ Nansha’mba “ano makomba.”
^ Kishima pa kishima i, “diso dya Leza wabo dyadi pa.”
^ Nansha’mba “ano makomba.”
