Ezela 9:1-15
9 Bino bintu bipwa’tu kulongeka, bamfumu baumfwena kebanena’mba: “Bantu ba Isalela ne babitobo ne bene Levi kebasonsolokelepo bantu ba matanda ne bilongwa byabo bya munyanji,+ bya bene Kenani, ne bene Hiti, ne bene Pedizi, ne bene Yebushi, ne bene Amone, ne bene Moabu, ne bene Edipito,+ ne bene Amole.+
2 Abayata babo bana bana-bakaji bamo ke babo bakaji ne bakaji ba babo bana.+ Pano abo, lutundu* lujila+ abetyanga na bantu ba matanda.+ Bamfumu ne baledi bampingakani bo babajinji kujilula mu kuno kubulwa kikōkeji.”
3 Ami ngivwana’tu kino, nasana kivwalwa kyami ne kotyi wami wampikwa maboko, netukuna’ko nywene ya ku mutwe wami ne myevu yami, kupwa nashikata mufītwe.
4 Penepo bonso badi balēmekele bininge* binenwa bya Leza wa Isalela baunjokoloka pa mwanda wa kubulwa kikōkeji kwa bantu baselelwe bu misungi, ami papo nshikete mufītwe kufika ne ku kyamulambu kya miseke kya kyolwa.+
5 Ino pa kitatyi kya kyamulambu kya miseke kya kyolwa,+ naimana mu bumvu bwami, na kivwalwa kyami ne kotyi wami wampikwa maboko bisanike, kadi nafukata mu manwi ami, nabāla makasa ami kudi Yehova Leza wami.
6 Kenena’mba: “A Leza wami, bumvu bubankwata kadi netyepelwa pa kutulula mpala yami kodi, a Leza wami, mwanda bilubo byetu bibavula pa mitwe yetu kadi mambo etu abavula kufika ne mūlu.+
7 Tamba mafuku a bakulutuba betu kufika ne dyalelo mambo etu i makatampe;+ kadi pa mwanda wa bilubo byetu, batwe, balopwe betu ne babitobo betu twapēnwe mu kuboko kwa balopwe ba matanda, ku kipete,+ mu bu misungi,+ ku kutūtwa,+ ne ku kuzobejibwa monka mobikadile dyalelo.+
8 Ino pano mu kakitatyi katyetye, katōkwe kabaiya kudi Yehova Leza wetu, waleka bashele’ko bapande kadi wetupe kyepelo* kya mutyima-ntenke mu kifuko kyandi kijila+ amba meso etu eñenye, a Leza wetu, ne kwitupumputumuna bityetye mu bupika bwetu.
9 Mwanda nansha byotudi bapika,+ Leza wetu ketulekelepo mu bupika bwetu, ino wetulombola buswe bwa ndamatyidile ku meso a balopwe ba Peleshia,+ mwanda wa kwitupumputumuna amba twimike njibo ya Leza wetu+ ne kūbakulula masala ayo ne kwitupa lubumbu lwa mabwe* mu Yuda ne mu Yelusalema.
10 “A Leza wetu, pano tunene bika kupwa kwa kino’ki? Mwanda tubaleka mbila yobe,
11 yowetupele kupityila kudi bengidi bobe bapolofeto amba: ‘Ntanda yomwenda kukayata ke yenu i ntanda ya disubi pa mwanda wa disubi dya bantu ba matanda, pa mwanda wa bilongwa byabo bya munyanji byobayujije’mo ku mfulo ne mfulo na disubi dyabo.+
12 Nanshi, kemwakisongejai benu bana bana-bakaji ku babo bana bana-balume, nansha kwitabija babo bana bana-bakaji basongwe na benu bana bana-balume;+ kadi kemufwaninwepo kukimba ndoe yabo nansha bupeta bwabo,+ amba mwikomeje kadi mudye biyampe bya ntanda ne kuyatyila’yo benu bana ke kintu kyabo kya nyeke.’
13 Kadi bino byonso pa kupwa kwitufikila pa mwanda wa bilongwa byetu bibi ne mambo etu makatampe—ke-pantu abewa, abe Leza wetu, kwitulongelepo mwendele kilubo kyetu,+ kadi ubetupandija+—
14 le tutyumune kadi monka mbila yobe ne kusamba kipwano kya kwisonga* na bantu balonga bino bintu bya munyanji?+ Lelo ubulwepo kwitulobela bininge enka ne byowitonakanya fututu, pampikwa nansha umo ushala nansha kupanda?
15 A Yehova Leza wa Isalela, abe wi moloke,+ mwanda tubapande pamo bwa muntu ushele’ko kufika ne dyalelo. Batwe bano ku meso obe na mambo etu, ke-pantu kebibwanikapo kwimana ku meso obe pa mwanda wa kino.”+
Kunshi kwa Dyani
^ Kishima pa kishima i, “lukunwa.”
^ Kishima pa kishima i, “bazakala.”
^ Kishima pa kishima i, “kipopo.”
^ Nansha’mba “lubumbu lwa kukinga.”
^ Nansha’mba “kwisongejana.”
