Hakai 1:1-15
1 Mu mwaka wa bubidi wa Mulopwe Dadiusa, mu kweji wa busamba, mu difuku dibajinji dya kweji, kinenwa kya Yehova kya kusapwila Zelububele+ mbikavu wa Yuda, mwanā Shityile ne Yoshua kitobo mukatampe mwanā Yehozadake kyaiya kupityila kudi Hakai*+ mupolofeto amba:
2 “Yehova wa bibumbo wanena namino amba, ‘Bano bantu banenanga’mba, “Kitatyi kya kūbaka*+ njibo* ya Yehova kekyabwene.”’”
3 Kadi kinenwa kya Yehova kyaiya monka kupityila kudi Hakai+ mupolofeto amba:
4 “Le kino i kitatyi kya banwe kushikata mu mobo enu malongwe na mbao milumbuluke, ayo ino njibo’ko misalwe?+
5 Shi ke pano Yehova wa bibumbo wanena namino amba, ‘Tai mutyima ku* mashinda enu.
6 Mukunanga nkunwa mingi, ino mwangula bityetye.+ Kudya mudyanga, ino kwikuta mpika. Kutoma mutomanga, ino kutondwa mpika. Kuvwala muvwalanga, ino kwivwana kyanga mpika. Yewa wingila nandi welanga mfutwa yandi mu kafuko ka bipunzubipunzu.’”
7 “Yehova wa bibumbo wanena namino amba, ‘Tai mutyima ku* mashinda enu.’
8 “‘Kandai ku lūlu mukasele mityi.+ Ubakai njibo,+ amba neiloelelwe kadi ntumbijibwe ntumbo,’+ i Yehova unena.”
9 “‘Mwadi mutengele bivule ino mubatambula bityetye; kadi pomutweja’byo mu njibo, nami nebipēpulanga.+ Mwanda waka?’ i Yehova wa bibumbo unena. ‘Mwanda njibo yami i misalwe, ino muntu ense momudi ujokoloka utele mutyima’nka ku yandi njibo.+
10 O mwanda madiulu adi peulu penu keanokejepo lumé, ne ntanda nayo keyaletelepo bipa byayo.
11 Kadi nadi ndeta mulanga pa ntanda, ne pa ngulu, ne pa miseke, ne pa vinyu mipya, ne pa māni, ne pa byobya bimena pa nshi, ne pa bantu ne pa bimunanwa, ne pa mingilo yonso ya makasa enu.’”
12 Zelububele+ mwanā Shityile+ ne Yoshua kitobo mukatampe mwanā Yehozadake,+ ne bantu bonso bashele’ko baivwana diwi dya Yehova Leza wabo ne binenwa bya Hakai mupolofeto, mwanda Yehova Leza wabo wamutumine; penepo bantu baanza kutyina Yehova.
13 Penepo Hakai mukendi wa Yehova, wasapwila bantu uno musapu mwendele mwingilo wamupēle Yehova amba: “‘Ami ngidi nenu,’+ i Yehova unena.”
14 Ebiya Yehova walangula mushipiditu+ wa Zelububele mbikavu wa Yuda+ mwanā Shityile, ne mushipiditu wa Yoshua+ kitobo mukatampe mwanā Yehozadake, ne mushipiditu wa bantu bonso bashele’ko; baiya kebengila ku njibo ya Yehova wa bibumbo, Leza wabo.+
15 Dyadi difuku dya 24 dya kweji wa busamba mu mwaka wa bubidi wa Mulopwe Dadiusa.+
Kunshi kwa Dyani
^ Ko kushintulula’mba “Mubutulwe pa Masobo.”
^ Nansha’mba “kūbakulula.”
^ Nansha’mba “tempelo.”
^ Nansha’mba “Tai bininge milangwe ku.”
^ Nansha’mba “Tai bininge milangwe ku.”
