Isaya 14:1-32
14 Mwanda Yehova ukafwila Yakoba lusa,+ kadi ukatonga monka Isalela.+ Ukebekadija* mu yabo ntanda,+ kadi beni ba kibundi bakelunga nabo ne kulamata ku njibo ya Yakoba.+
2 Bantu bakebasela ne kwibatwala ku kifuko kyabo, njibo ya Isalela ikebayata ke bengidi babo+ bana-balume ne bana-bakaji mu ntanda ya Yehova; kadi bakakwata boba bebakwete bu misungi, kadi bakatādila boba badi bebaningila mingilo.*
3 Mu difuku dikakupa Yehova kukōkolokwa ku masusu obe ne ku lupotopoto lobe ne ku bupika bukomo bobakumunine,+
4 ukapituluka luno lukindi padi* mulopwe wa Babiloni amba:
“Bine yewa wadi uningila bakwabo mingilo* wafika ku mfulo!
Bine kumweshibwa malwa kubapu!+
5 Yehova watyumuna lusonde lwa babi,Mukombo wa balopwe,+
6 Yewa ukupila bantu na bukalabale bikupilwa kebipu,+Yewa unekenya mizo na bulobo ne kwiipangapanga kitatyi kyonso.+
7 Pano ntanda yonso ibakōkolokwa, kukambakanibwa mpika.
Bantu abaela nsadi ya tusepo.+
8 Enka ne mityi ya jenevidiye nayo ibakusangela,Pamo ne mityi ya sedele ya Lebanona.
Keinena’mba, ‘Kashā upona,I kutupu muntu utētanga mityi wiya kwitutēta.’
9 Enka ne Kibundu* kine munshi kibajinaMwanda wa kukutundaila poiya.
Pa mwanda wa abewa, kibalangula boba bampikwa bukomo mu lufu,Bendeji bonso ba kasusu* ba pa ntanda.
Kibaimika balopwe bonso ba mizo pa mpona yabo.
10 Abo bonso besamba, kebakunena’mba,‘Le nobe ubazoza pamo bwa batwe?
Le ubaikala pamo bwa batwe?
11 Mitatulo yobe ibatūkila mu Kibundu,*Kuvuma kwa byombanwa byobe bya myonji.+
Munshi mobe i muyule bivinyu enka bwa butanda,Kadi byolo kyo kya kwipūta kyobe.’
12 Yō ubapone mūlu,Abe weñenya, mwanā kibanga!
Yō ubaponejibwa panshi,Abe muntu wadi unekenya mizo!+
13 Wanenene mu mutyima obe amba, ‘Nkakanda mūlu.+
Nkemika lupona lwami peulu pa ñenyenye ya Leza,+Kadi nkashikata pa lūlu lwa kubungakena’ko,Mu bipindi bya kulampe bininge bya kungala.+
14 Nkakanda peulu pa nsongo ya makumbi;Nkeifwana na Mwine wa Peulu Mwine.’
15 Inoko, abewa ukatūkijibwa mu Kibundu,*Munshi bininge mwa kīna.
16 Boba bakumona bakakubambila meso sō;Bakakubandaula senene, kebanena’mba,‘Le uno ye muntu wadi utenkanya ntanda,Wadi uzakaja malopwe,+
17 Waalamwine ntanda ikelwe na bantu ke mu ntanda mutuputupuNe kuponeja bibundi byayo,+Wapelele kulekelela bakutwa bandi bende kwabo?’+
18 Balopwe bakwabo bonso ba mizo,Bine, abo bonso balēle mu ntumbo,Ense mu kibundu* kyandi.
19 Ino abe ubaelwa pampikwa kibundu,Pamo bwa mutombo* obashikilwe,Muvwikwe batapwe batapilwe na kipete,Batūkilanga ku mabwe a mu kīna,Pamo bwa umbidi mufwe mutyampwe na mayo.
20 Kukelungapo nabo mu kibundu,Mwanda waonakenye ntanda yobe,Waipaile bantu bobe.
Lutundu lwa banonga-bibi kelukatelwapo monka nansha dimo.
21 Longololai pa kwipaila bandi banaPa mwanda wa mambo a bakulutuba babo,Kutyina’mba bakemana ne kukwata ntandaBayuje ntanda na bibundi byabo.”
22 “Nkemana kwibatamba’dyo,”+ i Yehova wa bibumbo unena.
“Kadi nkatukija mu Babiloni dijina ne bashele’ko ne bana ne lutundu,”+ i Yehova unena.
23 “Kadi nkamwalamuna ke kīkalo kya banungu ne ntanda ya bijiba, nkakomba’mo na lweyo lwa kutukija nalo fututu,”+ i Yehova wa bibumbo unena.
24 Yehova wa bibumbo watyipe amba:
“Monka monasakila, kikalongeka,Kadi monka monakwatyila butyibi, kikafikidila.
25 Nkavingakanya mwine Ashidia mu yami ntanda,Kadi nkamutyampa mu ngulu yami.+
Lupungu lwandi lukebatalulwa,Kadi kiselwa kyandi kikatalulwa pa kipuji kyabo.”+
26 Buno bo butyibi bwakwatyilwa* ntanda yonso,Kadi kuno ko kuboko kōlwelwe* pa mizo yonso.
27 Mwanda Yehova wa bibumbo wakwata butyibi,Le i ani ubwanya kwibukankaja?+
Kuboko kwandi i kōlole,Le i ani ubwanya kwikukonya?+
28 Mu mwaka wafwile Mulopwe Ahaza,+ kwaelelwe uno musapu amba:
29 “Kokasangala abe Fidishitia, nansha umo modi,Mwanda’po’tu mukombo wa yewa wadi ukukupila ubatyumunwa.
Ke-pantu ku muji wa nyoka+ kukatamba nyoka wa bulembe,+Kadi lutundu lwandi lukekala nyoka utumbuka wa mudilo.*
30 Kitatyi kikadya bana babedi ba bantu bapēlulweNe kikalāla balanda na mutyima-ntenke,Ami nkepaya muji obe na kipupo kya nzala,Kadi kyokya kikashala’ko kikepaibwa.+
31 Yoyokota miyoa, abe kibelo! Dila, abe kibundi!
Bonso badi modi bakatyumukwa mutyima, abe Fidishitia!
Mwanda mwishi ou wiya kungala,Kadi mu milongo yandi ya basola i kutupu nansha umo ushele kulampe.”
32 Le bakalondolola mikendi ya muzo namani?
Amba Yehova waala kyalwilo kya Ziona,+Ne amba bantu bapēlulwe ba bantu bandi bakanyemena’mo.
Kunshi kwa Dyani
^ Nansha’mba “Ukebapa kukōkolokwa.”
^ Nansha’mba “bakapita babo ba mingilo.”
^ Nansha’mba “ukakolomona.”
^ Nansha’mba “kapita wa mingilo.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Kishima pa kishima i, “Bambuji balume.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Kishima pa kishima i, “njibo.”
^ Nansha’mba “musambo.”
^ Kishima pa kishima i, “madingi adingilwa.”
^ Nansha’mba “kutengele kukupila.”
^ Nansha’mba “nyoka wa bulembe wa lubilo.”
