Isaya 44:1-28
44 “Pano teja, abe Yakoba mwingidi wami,Ne abe Isalela, onatonga.+
2 Yehova,Mulongi obe ne Mwine wakupungile,+Mwine wakukweshe tamba munda,* wanena namino amba:
‘Kokikwatwa moyo, abe mwingidi wami Yakoba,+Ne abe Yeshulune,*+ onatonga.
3 Mwanda nkapungulwila mema padi wa kyumwa*+Ne kukukija tuminonga pa nshi myūmu.
Nkapungulwila mushipiditu wami pa lutundu* lobe+Ne dyese dyami pa bobe bana.
4 Kadi bakamena pamo bwa mu biyombo bibishi,+Pamo bwa mityi ya myelebi kubwipi na tuminonga twa mema.
5 Umo ukanena’mba: “Ami ne wa Yehova.”+
Mukwabo nandi ukeityila pa dijina dya Yakoba,Ungi nandi ukalemba pa kuboko kwandi amba: “Wa bene wa Yehova.”
Kadi ukeinika dijina dya Isalela.’
6 Yehova,Mulopwe wa Isalela+ ne Mukūdi wandi,+ Yehova wa bibumbo wanena namino amba:
‘Ami ne mubajinji kadi ne wa mfulo.+
I kutupu Leza mukwabo poso’nka ami.+
7 Le i ani udi pamo bwa ami?+
Nabya esambe, anene ne kuleta bukamoni ku meso ami!+
Tamba kitatyi kyonatūdile’ko bantu ba kala,Banene bintu bikāya’koNe byobya bikalongeka.
8 Kemwakityinai,Kadi kemwakapungilai moyo.+
Mwene nalombwele muntu ne muntu momudi ne kwimusapwila’kyo kumeso kwa kitatyi?
Banwe mwi bami batumoni.+
Le kudi Leza mukwabo kutalula’mo ami?
Aa, i kutupu Dibwe+ dikwabo; nkiyukilepo nansha umo.’”
9 Boba bonso balonga bankishi basōnge i ba bitupu,Kadi bintu byabo byobasenswe kebikekalapo na kamweno.+
Kebamwenepo* kintu nansha kuyuka kintu+ pamo’nka bwa batumoni babo,O mwanda boba bebalongele bakafwijibwa bumvu.+
10 Le i ani wapungile leza nansha kusungulula nkishi wa kyuma*Kabwanyapo kumuletela kamweno?+
11 Talai! Bapwani nandi bonso bakafwijibwa bumvu!+
Basendwe i bantu bitupu.
Bebunge abo bonso, bemane.
Bakatuyuka ne kufwijibwa bumvu bonso pamo.
12 Yewa ufula, ufulanga kyuma pa makala na kingidilwa kyandi.*
Wikitōtola na bitotwa,Wikifula na kuboko kwandi kwa bukomo.+
Kupwa waivwana nzala kadi bukomo bwandi bwapwa;Katomangapo mema kadi ukōkanga.
13 Yewa usōnga mutyi utamunanga lukamba lwa kupima nalo, ushika kya kusōnga na lupemba lutyila.
Wikiseneja na kakōlo ne kwikishika na kompa.
Wikilonga mu kimfwa kya muntu,+Na buya bwa muntu,Mwanda wa kikale mu njibo.*+
14 Kudi muntu udi na mwingilo wa kutēta mityi ya sedele.
Utonga mutyi kampanda, mutyi wa shene,Kadi weuleka ukome mu mityi ya mu ditó.+
Wakuna mutyi wa mweloni, mvula nandi weutamija.
15 Kupwa waikala ke mutyi wa muntu wa kwakija nao mudilo.
Wayata’ko kipindi kimo kya kota;Wabanza mudilo kasōka mikate.
Ino kadi walonga’ko ne leza kamutōta.
Wekisōnga ke nkishi musōnge, kaevukwila ku meso andi.+
16 Kipindi kyao kimo wekisōka mu mudilo;Waosha nakyo mwita, wadya’o, ebiya waikuta.
Kadi waota’ko mudilo kanena’mba:
“Ee! Naote pomandila mudilo.”
17 Ino kipindi kikwabo kishele walonga’ko leza, nkishi wandi musōnge.
Wevukwila kwadi ne kumutōta.
Walombela kwadi kanena’mba:
“Mpandije, mwanda abe wi leza wami.”+
18 Kebayukilepo kintu, kebevwanijepo kintu,+Mwanda meso abo i mapūte kadi kebabwanyapo kumona,Mutyima wabo nao keudipo na bujinguludi.
19 I kutupu nansha umo ulanga mu mutyima wandiNansha udi na buyuki nansha ñeni, unena’mba:
“Kipindi kyao kimo nekisōkele mu mudilo,Kadi nasōkele mikate ne kosha mwita wa kudya pa makala akyo.
Le penepo, nkalonga kintu kya munyanji na kipindi kishele’ko?+
Le nkatōta kipingo* kya mutyi kitambile ku uno mutyi?”
20 Udyanga buto.
Mutyima wandi wa bongojani ubamulubija.
Kabwanyapo kwipandija aye mwine,* nansha kunena’mba:
“Le ke bubelapo budi mu kuboko kwami kwa lundyo?”
21 “Vuluka bino bintu, abe Yakoba, ne abe Isalela,Mwanda wi mwingidi wami.
Nakulongele, kadi wi mwingidi wami.+
A Isalela, nkikakwilwapo.+
22 Nkabula kujilula kobe pamo’nka bwa na dikumbi+Ne bubi bobe pamo’nka bwa na dikumbi difīta fututu.
Jokela kondi, mwanda nkakukūla.+
23 A madiulu, elai nsadi ya tusepo,Mwanda Yehova walonga’po kintu!
A munshi mulampe mwa ntanda, tūtai kyungwe kya bushindañani!
A ngulu, elai nsadi ya tusepo,+Ne abe ditó, ne mityi yobe yonso!
Mwanda Yehova wakūla Yakoba,Kadi walombola buya bwandi bwa dyangi pa Isalela.”+
24 Yehova, Mukūdi obe,+Mwine wakulongele tamba powadi munda, wanena namino amba:
“Ami ne Yehova, mwine ulongele bintu byonso.
Natamwine madiulu ami mwine,+Kadi natandabwile ntanda.+
Le i ani onadi nandi?
25 Navutakanya biyukeno bya boba banenakanya bya bitupu,*Kadi ami ye Mwine walamuna bambuki balonge bintu pamo bwa balembakane;+Mwine uvutakanya bantu ba tunanguNe kwalamuna buyuki bwabo ke bulembakane;+
26 Mwine ufikidija kinenwa kya mwingidi wandiKadi ufikidija ne pa mfulo byobya bilaa mikendi yandi;+Mwine unena Yelusalema amba, ‘Bantu bakekala’mo,’+
Ne bibundi bya Yuda amba, ‘Bikōbakululwa,+Kadi nkalongolola masala andi’;+
27 Mwine unena mema malamala’mba, ‘Ūma,Kadi nkōmija minonga yobe yonso’;+
28 Mwine unena Kilusa+ amba, ‘Aye i mukumbi wami,Kadi ukafikidija kiswa-mutyima kyami kyonso+ ne pa mfulo’;Mwine unena Yelusalema amba, ‘Ukōbakululwa,’
Ne tempelo amba, ‘Kyalwilo kyobe kikālwa.’”+
Kunshi kwa Dyani
^ Nansha’mba “tamba kubutulwa.”
^ Ko kushintulula’mba “Moloke Swā,” kitenta kya bulēme kya Isalela.
^ Nansha’mba “ntanda myūmu.”
^ Kishima pa kishima i, “lukunwa.”
^ Ko kunena’mba, bankishi.
^ Nansha’mba “nkishi musungululwe.”
^ Nansha’mba “ntēto yandi.”
^ Nansha’mba “kobo ka tukishi.”
^ Nansha’mba “kipindi kyūmu.”
^ Nansha’mba “kupandija muya wandi.”
^ Nansha’mba “bapolofeto ba bubela.”
