Isaya 49:1-26
49 A bisanga, ntejei,A mizo ya kulampe,+ tai mutyima.
Yehova waungityile kumeso kwa kubutulwa.*+
Tamba kitatyi kyonadi munda mwa mama watelele dyami dijina.
2 Walongele kyakanwa kyami pamo bwa kipete kya bui;Waumfya mu mwemba wa kuboko kwandi.+
Wangalamuna kendi muketo munone;Waumfile mu luvungu lwandi.
3 Waunenene amba: “Abe wi mwingidi wami, a Isalela,+Mwine monkalombwela buya bwami bwa dyangi.”+
4 Ino ami nanenene amba: “Naputumine na mingilo bya bitupu.
Napwile bukomo bwami mwanda wa kintu kya bubela, bya bitupu.
Ino na bubine butyibi bwami budi na Yehova,*Kadi mfutwa* yami idi na Leza wami.”+
5 Shi ke pano, Yehova, Mwine wanongele bu mwingidi wandi tamba munda,Waunena njokeje Yakoba kwadi,Amba Isalela akongakanibwe kwadi.+
Nkatumbijibwanga ku meso a Yehova,Kadi Leza wami ukekala ke bukomo bwami.
6 Kadi wanenene amba: “Kudipo’tu’nka bu mwingidi wamiWa kulangula bisaka bya YakobaNe kujokeja bantu ba Isalela balaminwe.
Nakupāna ne bu kitōkeji kya mizo,+Amba lupandilo lwami lufike ne ku mafulo a ntanda.”+
7 Yehova, Mukūdi wa Isalela, Mwine Ujila+ wandi, wanena yewa mufutululwe,*+ yewa obashikilwe kudi muzo, mwingidi wa balopwe namino amba:
“Balopwe bakamona ne kwimana,Kadi bamfumu bakevukwilaPa mwanda wa Yehova, wa binebine,+Mwine Ujila wa Isalela, wakutonga.”+
8 Yehova wanena namino amba:
“Nakulondolwele mu kitatyi kya katōkwe,*+Kadi nakukweshe mu difuku dya lupandilo;+Nadi nkulama’nka kukulama mwanda wa kukupāna bu kipwano kya bantu,+Mwanda wa kulongolola ntanda,Mwanda wa kwibalengeja bapyane bupyani bwabo busalwe,+
9 Mwanda wa kunena bakutwa’mba: ‘Tambai!’+
Ne boba badi mu fukutu+ amba, ‘Mwisokolei!’
Bakadīla mu mashinda,Madyo abo akekala kufula kwa tushinda* tonso toneke.
10 Kebakendapo na nzala, nansha kwikala na kyumwa,+Nansha kyanga kikomokomo nansha dyuba kwibasōka mpika.+
Mwanda Yewa wibafwila lusa ukebendeja,+Kadi ukebakunkwija ku masulo a mema.+
11 Nkalamuna ngulu yami yonso ke dishinda,Kadi mashinda makatampe ami akazunzulwa.+
12 Tala! Bano’ba batambanga kulampe,+Kadi tala! bano’ba batambanga kungala ne kushika,Bano nabo batambanga ku ntanda ya Shinimi.”+
13 A madiulu elai nsadi ya tusepo, ntanda nobe sangala.+
Ngulu isangale na nsadi ya tusepo.+
Mwanda Yehova wasenge bantu bandi,+Kadi wafwila lusa bantu bandi bamweshibwa malwa.+
14 Ino Ziona unenanga’nka kunena amba:
“Yehova wangela,+ kadi Yehova wangilwa.”+
15 Lelo mwana-mukaji ubwanya kwilwa mwana waamushaNansha kuleka kwivwanina lusa mwana wa munda mwandi?
Nansha shi bano bana-bakaji abailwa, ami nkikakwilwapo nansha dimo.+
16 Tala! Ne mukulembe pa makasa ami.
Mumbu yobe idi nyeke ku meso ami.
17 Bobe bana abajoka lubilo.
Boba bakutūtyile ne kukusala bakataluka kodi.
18 Tulula meso obe utale kufulakufula konso.
Abo bonso abebunge pamo.+
Bāyanga kodi.
“Bine ne byondi mūmi,” i Yehova unena,“Ukebavwala abo bonso pamo bwa bya kwidyangula nabyo,Kadi ukekutyila’bo na mwikutyilanga mutundaile.
19 Nansha byaonakanibwe bifuko byobe ne kusadibwa, ne ntanda yobe nayo yaikala mu masala,+Pano ikatyepela bininge boba bekele kwine’kwa,+Kadi boba bakuminine+ bakekala kulampe bininge.+
20 Bana babutwilwe powadi mufwilwe, bakanena mu matwi obe amba,‘Kino kifuko kibauntyepela bininge.
Mpe’ko kyaba pa kwikala.’+
21 Nobe ukanena mu mutyima obe amba,‘Lelo i ani waumbutwila bano’ba,Byondi mwana-mukaji mufwilwe bana kadi ñumba,Muselwe bu musungi kadi mukutwe?
Le i ani watamija bano’ba?+
Tala! Nadi nshele bunka,+Penepo le bano’ba abatambe kwepi?’”+
22 Mfumu Mwinē Lupusa Lonso Yehova wanena namino amba:
“Tala! Nkatulula kuboko kwami pa mizo,Kadi nkashimikila bantu kiyukeno* kyami.+
Bakasela bobe bana bana-balume mu maboko* aboKadi bakasela bobe bana bana-bakaji pa bipuji byabo.+
23 Balopwe bakekala baledi bobe,+Kadi babo bana bana-bakaji bakekala ba kukulelela bana.
Bakevukwila kodi mapala abo pa nshi+Kadi bakalamba luvumbi lwa ku maulu obe,+
Ebiya ukayuka’mba amiwa ne Yehova;Boba bankulupile kebakafwijibwapo bumvu.”+
24 Lelo boba bakwetwe kala babwanya kuyatwa kudi muntu mukomokomo,Nansha misungi ya muntu ususulañana le ibwanya kukūlwa?
25 Ino Yehova wanena namino’mba:
“Nansha ke misungi ya muntu mukomokomo ikayatwa,+Kadi boba bakwetwe na muntu ususulañana bakakūlwa.+
Nkalwa boba bakulwa,+Kadi nkapandija bobe bana.
26 Boba bakususula nkebadisha mwita wa ngitu yabo,Kadi bakakolwa mashi abo pamo bwa vinyu itobala.
Ebiya bantu bonso* bakayuka amba amiwa ne Yehova,+Umpandiji+ obe ne Mukūdi obe,+Nkomokomo wa Yakoba.”+
Kunshi kwa Dyani
^ Kishima pa kishima i, “tamba munda.”
^ Nansha’mba “Yehova ukamingija.”
^ Nansha’mba “mpalo.”
^ Nansha’mba “mufutululwe mu muya.”
^ Nansha’mba “mutyima muyampe.”
^ Bibwanika padi i, “mikuna yonkayonka.”
^ Nansha’mba “mutyi wa kiyukeno.”
^ Kishima pa kishima i, “kyadi.”
^ Kishima pa kishima i, “ngitu yonso.”
