Isaya 55:1-13
55 Iyai, banwe bonso badi ne kyumwa,+ iyai ku mema!+
Banwe kebadipo na lupeto iyai, mupote mudye!
Bine, iyai mupote vinyu ne mabele+ kwampikwa lupeto, ku bitupu.+
2 Le i kika kyomwelela lupeto ku kyokya kekidipo bu kyakudya,Kadi i kika kyomujimijija tumweno twenu* ku bintu kebikutwapo?
Ntejei senene, dyai kyokya kiyampe,+Kadi mukaloelelwa* bininge kyokya kya bumeni* bwa binebine.+
3 Tebekai kutwi kwenu mwiye kondi.+
Tejai, amba mukekale* bōmi,Kadi nami nkasamba nenu kipwano kya nyeke bukidi bonka+Mungya bilongwa bya buswe bwa ndamatyidile kudi Davida, bya binebine.*+
4 Talai! Namulongele ke kamoni+ ku mizo,Mutangidiji+ kadi mukatampe+ wa mizo.
5 Tala! Abe uketa muzo okuyukilepo,Kadi bantu ba muzo kebakuyukilepo bakanyemena kodiPa mwanda wa Yehova Leza obe,+ Mwine Ujila wa Isalela,Ke-pantu aye ukakutumbija ntumbo.+
6 Kimbai Yehova pākitanwa.+
Mwitei pākidi pabwipi.+
7 Mubi aleke dishinda dyandi+Nonga-bibi nandi milangwe yandi;Ajokele kudi Yehova, mwine ukamufwila lusa,+Kudi Leza wetu, mwanda ukalekela bya binebine.*+
8 “Mwanda milangwe yami ke milangwe yenupo,+Kadi mashinda enu ke mashinda amipo,” i Yehova unena.
9 “Mwanda monka mwikadile madiulu peulu bininge kupita ntanda,Mashinda ami nao adi peulu bininge kupita mashinda enuNe milangwe yami kupita milangwe yenu.+
10 Mwanda monka munokelanga mvula ne mashika mekwate mūluNe kujokela’mo mpika, enka ne bibomba nshi, byeilengeja ipe bipa ne kumeneja bikunanwa,Ne kupāna nkunwa kudi mukushi ne mukate kudi wa kudya’o,
11 E mukekadila ne kinenwa kitamba mu kyakanwa kyami.+
Kekikajokelapo kondi kulonga kintu mpika,+Ino kikafikidija binebine kyonso kyondoelelwe,*+Kadi kikalonga binebine kyokya kyonekitumine kulonga.
12 Mwanda mukatamba na nsangaji,+Kadi mukajokejibwa mu ndoe.+
Ngulu ne mikuna ikasangala ku meso enu na nsadi ya tusepo,+Kadi mityi yonso ya mu ntanda ikakupila makasa.+
13 Pa kyaba kya bimuna bya miba pakamena mutyi wa jenevidiye,+Kadi pa kyaba kya lusungesunge pakamena mutyi wa milete.
Kadi kino kikatumbija* Yehova,+Kiyukeno kya nyeke kekikonekapo nansha dimo.”
Kunshi kwa Dyani
^ Nansha’mba “lupeto lomususukīle.”
^ Nansha’mba “muya wenu ukaloelelwa.”
^ Kishima pa kishima i, “kinune.”
^ Nansha’mba “myuya yenu ikekale.”
^ Nansha’mba “bikulupilwa; bisumbidilwa.”
^ Nansha’mba “ukalekela na mutyima tō.”
^ Nansha’mba “kiswa-mutyima kyami.”
^ Nansha’mba “kikamulongela dijina.”
