Kupituluka mu Bijila 19:1-21
19 “Shi Yehova Leza obe waonakanya mizo ya mu ntanda ikupa Yehova Leza obe, nobe ubebapanga ne kushikata mu bibundi byabo ne mu mobo abo,+
2 ukatūla’ko pafula bibundi bisatu mu ntanda yobe ikupa Yehova Leza obe wiiyate ke yobe.+
3 Ukabanya pasatu kipindi kya ntanda ikupa Yehova Leza obe wiiyate ke yobe, ne kulongolola mashinda amba yewa wipaya muntu anyemene mu kibundi kimo pa bino’bi.
4 “Bikekala namino shi yewa wipaya muntu wanyemena’mo mwanda wa kwipandija: Shi waipaya mukwabo kwampikwa kusaka ne kadipo umushikilwe dibajinji;+
5 shi waenda na mukwabo mwitó kukatyaba nkuni, waolola kuboko kwandi amba atēte mutyi na kasolwa, ino kasolwa kabakonkoka mu umpini, kabakupila mukwabo wafu, yewa waipaya muntu ufwaninwe kunyemena mu kibundi kimo pa bino’bi amba ekale mūmi.+
6 Shi bitupu, pa mwanda wa bulobo bukatampe,* muntu ulubula kinongo kya mashi+ ubwanya kulonda lubilo yewa wipaile muntu, kumukwata ne kumwipaya, ke-pantu kibundi kidi kulampe bininge. Inoko, aye kadipo ufwaninwe kufwa, mwanda kadipo ushikilwe mukwabo’wa dibajinji.+
7 O mwanda nakusoñanya’mba: ‘Tūla’ko bibundi bisatu pafula.’
8 “Shi Yehova Leza obe wabaija ntanda yobe monka mwaatyipīle’kyo bakulutuba bobe,+ kadi wakupe ntanda yonso yawalaile kupa bakulutuba bobe+
9 —wivwane shi ulame na kikōkeji ino mbila yonso yonkupa dyalelo dino’di, usanswe Yehova Leza obe ne kunanga mu mashinda andi+ mafuku onso—nabya ukabweja bibundi bikwabo bisatu ku bino bisatu.+
10 Nankyo mashi ampikwa mambo keakamwangwapo+ mu ntanda yobe ikupa Yehova Leza obe bu bupyani bobe, kadi kukalambikwapo mambo a mashi.+
11 “Ino shi muntu wadi ushikilwe mukwabo+ kadi wadi utengele kumutamba, penepa wamutape* bibibibi wafu, kupwa muntu’wa wanyemena mu kibundi kimo pa bino’bi,
12 bakulumpe ba kibundi kyandi bakamwityija’ko ne kumupāna ku kuboko kwa muntu ulubula kinongo kya mashi, kadi ufwaninwe kufwa.+
13 Kufwaninwepo kumukwatyilwa lusa,* ufwaninwe kutalula mu Isalela+ mambo a mashi ampikwa mwanda, amba bikwendekele biyampe.
14 “Shi ubatambula bupyani mu ntanda ikupa Yehova Leza obe wiiyate ke yobe, kufwaninwepo kutundulula kiyukeno kya mukalo+ wa mulondakani nobe popa patūdile bankambo obe mukalo.
15 “Kamoni umo kabwanyapo kuponeja* mukwabo pa kilubo nansha bubi bwalongele.+ Pa bukamoni bwa* batumoni babidi nansha pa bukamoni bwa batumoni basatu, mwanda’wa uketabijibwa.+
16 Shi kamoni wa nshikani waletela mukwabo bukamoni bubi ne kumulambika mambo a kujilula,+
17 bano bantu babidi bepatanya bakemana ku meso a Yehova, ku meso a babitobo ne batyibi bengila mu mene mafuku’a.+
18 Batyibi bakakimba senene+ mwanda’wa, kadi shi yewa waletele bukamoni i kamoni wa bubela kadi walambikile mwanabo mambo a bubela,
19 nankyo mukamulonga enka mwaadi ukanina kulonga mwanabo,+ kadi ufwaninwe kutalula kibi mu bukata mobe.+
20 Boba bashele’ko bakevwana ne kukwatwa moyo, kadi kebakalongapo monka kibi bwa kino’ki mu bukata mobe.+
21 Kufwaninwepo kumukwatyilwa lusa:*+ Būmi* ku būmi,* diso ku diso, dino ku dino, dikasa ku dikasa, kinyantyilo ku kinyantyilo.+
Kunshi kwa Dyani
^ Kishima pa kishima i, “mwanda mutyima wandi i mukabe.”
^ Nansha’mba “watape muya wandi.”
^ Kishima pa kishima i, “Diso dyobe kedifwaninwepo kumukwatyilwa lusa.”
^ Kishima pa kishima i, “kwimanina.”
^ Kishima pa kishima i, “kyakanwa kya.”
^ Kishima pa kishima i, “Diso dyobe kedifwaninwepo kwibakwatyilwa lusa.”
^ Nansha’mba “muya.”
^ Nansha’mba “muya.”
