Kupituluka mu Bijila 29:1-29
29 Bino’bi byo binenwa bya kipwano kyobasoñenye Mosesa kudi Yehova kusamba na bantu ba Isalela mu ntanda ya Moabu, kutentekela pa kipwano kyawasambile nabo ku Holeba.+
2 Penepo Mosesa waityija Isalela ense pamo kaebanena’mba: “Mwemwenine byonso byalongele Yehova ku meso enu mu ntanda ya Edipito kudi Felo ne bengidi bandi bonso ne ntanda yandi yonso,+
3 butyibi* bukatampe bwamwene meso enu, byobya biyukeno bikatampe ne bingelengele.+
4 Ino Yehova kemupelepo mutyima wa kwivwanija ne meso a kumona ne matwi a kwivwana, kufika ne dyalelo.+
5 ‘Ponadi nemwendeja mu ntanda mutuputupu myaka 40,+ bivwalwa byenu kebyaonekelepo pa ngitu yenu kadi bikwabilo byenu nabyo kebyaonekelepo ku maulu enu.+
6 Kemwadīlepo mikate, kadi kemwatomenepo vinyu nansha bintu byonso bikolwañana, mwanda wa muyuke amba amiwa ne Yehova Leza wenu.’
7 Mwenda mafuku mwaiya ku kino kifuko, penepo Shihone mulopwe wa Heshebone+ ne Oka mulopwe wa Bashane+ baiya kwitusambakana na bulwi, ino twebanekenya.+
8 Kupwa twayata ntanda yabo, twapa’yo bene Lubeni bu bupyani bwabo, ne bene Ngade ne kipindi kya kisaka kya Manase.+
9 Nanshi, lamai binenwa bya kino kipwano ne kwibikōkela, amba byonso byomulonga byendeke biyampe.+
10 “Banwe bonso mwimene dyalelo dino’di ku meso a Yehova Leza wenu, mitwe ya bisaka byenu, ne bakulumpe benu, ne bemaniji benu, mwana-mulume ense wa Isalela,
11 benu bana, benu bakaji,+ ne mweni wenu wa kibundi+ udi mu bukata mwa nkambi yenu, kushilwila ku yewa wimutyabilanga nkuni kutūla ne ku yewa wimutekelanga mema.
12 Mudi pano mwanda wa kutwela mu kipwano kya Yehova Leza wenu ne mutyipo wandi, kisamba nenu Yehova Leza wenu dyalelo+
13 amba emutūle dyalelo dino’di bu bantu bandi,+ nandi ekale Leza wenu,+ monka mwaemulaile’kyo ne monka mwaatyipīle’kyo kudi bakulutuba benu, ba Abalahama,+ Izake,+ ne Yakoba.+
14 “Nkisambangapo kino kipwano ne uno mutyipo enka na banwe kete,
15 ino i na boba bemene netu pano dyalelo dino’di ku meso a Yehova Leza wetu ne na boba kebadipo netu pano dyalelo.
16 (Mwanda banwe muyukile biyampe motwadi twikadile mu ntanda ya Edipito ne motwapityila mu bukata mwa mizo palapala mu lwendo lwetu.+
17 Kadi mwadi mumona bintu byabo bya munyanji ne bilezaleza byabo bya mukenye*+ bya mityi ne bya mabwe, bya ndalama ne olo, byadi mu bukata mwabo.)
18 Dyumukai kutyina’mba kwakekala mwana-mulume nansha mwana-mukaji, difu nansha kisaka mu bukata mwenu dyalelo dino’di wa mutyima usāsuka kudi Yehova Leza wetu, kaenda kukengidila baleza ba yoya mizo,+ amba kwakekala muji mu bukata mwenu ulupula bipa bya bulembe ne ndulwe.+
19 “Ino shi muntu waivwana bino binenwa bya uno mutyipo kawitumbika mu mutyima wandi amba, ‘Nkekala na ndoe, nansha shi nangile nyeke mu mashinda a mutyima wami,’ konakanya kintu kyonso* mu kashinda kandi,
20 Yehova kaketabijapo kumulekela.+ Ino, bulobo bukatampe bwa Yehova bukadyendyemukila yao muntu, kadi mafingo onso alembelwe mu uno mukanda akamwiila binebine,+ na bubine Yehova ukajimankanya dijina dyandi munshi mwa diulu.
21 Penepo Yehova ukamusansanya na bisaka byonso bya Isalela pa mwanda wa kyamalwa kya mwendele mafingo onso a kipwano alembelwe mu uno mukanda wa Bijila.
22 “Lukongo lwa benu bana bakāya’ko ne mweni wa ntanda ya kulampe pa kumona bipupo bya ntanda, misongo ikaleta’po Yehova—
23 bibidikityi ne mwepo ne kyanga, amba ntanda yayo yonso ileke kukunwa nkunwa ne kushipuka, nansha munamuna kumena’po mpika, pamo bwa kupona kwa Sodoma ne Ngomola,+ Adema ne Zeboyimi,+ baponejibwe na Yehova na bulobo bwandi ne bukalabale bwandi—
24 abo ne mizo yonso bakanena’mba, ‘Mwanda waka Yehova walongele ino ntanda nenki?+ I kika kyakolomwene buno bulobo bukatampe, kadi budyendyemuka?’
25 Penepo bakalondolola’mba, ‘I mwanda balekele kipwano kya Yehova,+ Leza wa bakulutuba babo, kyaasambile nabo paebalupwile mu ntanda ya Edipito.+
26 Ino baenda kebengidila baleza bakwabo ne kwivukwila kobadi, baleza bokebadipo bayukile kadi bakebapelepo lupusa lwa kutōta.*+
27 Penepo bulobo budyendyemuka bwa Yehova bwaakila ntanda’ya, bweiletela mafingo onso alembelwe mu uno mukanda.+
28 Ebiya, Yehova webatukuna pa nshi yabo na bulobo+ ne bukalabale ne kufītwa mutyima kwandi kukatampe, webaselela mu ntanda ingi mobadi dyalelo dino’di.’+
29 “Bintu bifyame i bya Yehova Leza wetu,+ ino bintu bisokolwe i byetu batwe ne lutundu lwetu nyeke, amba tulonde binenwa byonso bya bino Bijila.+
Kunshi kwa Dyani
^ Nansha’mba “matompo.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Kishima pa kishima i, “musangilwe biyampe pamo ne mūmu.”
^ Kishima pa kishima i, “kebebapelwepo.”
