Kupituluka mu Bijila 3:1-29
3 Penepo twaalamuka ketukanda ku Dishinda dya Bashane. Oka mulopwe wa Bashane watamba na bantu bandi bonso kwitusambakana na bulwi ku Edelei.+
2 Ebiya Yehova waunena’mba, ‘Kokimukwatwa moyo, mwanda nkakupa’ye mu kuboko kobe ne aye ne bantu bandi bonso ne ntanda yandi, kadi ukamulonga’nka mowalongele Shihone mulopwe wa bene Amole, wadi ushikata mu Heshebone.’
3 Penepo Yehova Leza wetu wetupa mu kuboko kwetu ne Mulopwe Oka wa Bashane ne bantu bandi bonso, twamwipaya kufika ne byokekwapandilepo muntu wandi nansha umo.
4 Penepa twakwata bibundi byandi byonso. Kekwadipo kibundi nansha kimo kyoketwebayetepo—bibundi 60, ntanda yonso ya Alekoba, bulopwe bwa Oka mu Bashane.+
5 Bino bibundi byonso byadi bikomejibwe na mumbu milampe, ne bibelo, ne mikabo, pamo ne tubibundi tungi twa kunja.
6 Inoko, twebyonakenye fututu+ monka motwalongele Shihone mulopwe wa Heshebone, twaonakanya fututu bibundi byonso, ne bana-balume, ne bana-bakaji, ne bana bene.+
7 Ino twasela bimunanwa byonso ne bitūtwa bya mu bibundi ke byetu.
8 “Mu kine kitatyi’kya, twakwata ntanda ya balopwe babidi bene Amole+ badi mu ntanda ya Yodano, tamba ku Musanza wa Alenona* kufika ne ku Lūlu lwa Helemone+
9 (luno lūlu bene Shidona badi belwita bu Shidione, ino bene Amole badi belwita bu Senila),
10 bibundi byonso bya pa dilungu dya pa mutenta,* Ngileade ense ne Bashane ense kufika ne ku Saleka ne Edelei,+ bibundi bya bulopwe bwa Oka mu Bashane.
11 Mwanda Oka mulopwe wa Bashane ye wadi wa mfulo washele’ko ku bene Lefaime. Butanda bwandi bwa lufu,* bwadi bwa kyuma,* kadi bukidi mu Laba wa bene Amone. Budi na maboko* kitema mu bula, ne maboko aná mu bunkimbwa, mungya kuboko kupiminwanga’po.
12 Mu kine kitatyi’kya twayata ino ntanda: tamba ku Aloele,+ udi dya ku Musanza wa Alenona,* ne kipindi kya ntanda ya ngulu ya Ngileade, bibundi byayo napa’byo bene Lubeni ne bene Ngade.+
13 Kipindi kishele kya Ngileade ne Bashane ense wa bulopwe bwa Oka, napa’byo kipindi kya kisaka kya Manase.+ Ntanda yonso ya Alekoba, mine ya Bashane, yadi iyukene bu ntanda ya bene Lefaime.
14 “Yaila+ mwanā Manase wayata ntanda yonso ya Alekoba+ kufika ne ku mukalo wa bene Ngeshula ne bene Makati,+ kadi wainika bino bibundi bya Bashane dyandi dijina, Havote-Yaile,*+ kufika ne dyalelo.
15 Kadi napāna Ngileade kudi Makile.+
16 Bene Lubeni ne bene Ngade+ nabo, nebapa tamba ku Ngileade kutūla ne ku Musanza wa Alenona,* mukalo wadi pa bukata bwa musanza, kufika ne ku Yaboko, musanza udi bu mukalo wa bene Amone,
17 ne Alaba ne Yodano ne mukalañano, tamba ku Kinelete kutūla ne ku Dijiba dya ku Alaba, Dijiba dya Mwepo,* munshi mwa matēlo a Pisika dya kutunduka.+
18 “Penepo nemusoñenye namino amba: ‘Yehova Leza wenu wemupe ino ntanda kuyata’yo ke yenu. Bana-balume bonso bankomokomo umbukata mwenu bakasela byabulwi ne kwabuka ku meso a banabenu, bene Isalela.+
19 Enka benu bakaji, benu bana ne bimunanwa byenu (ndyukile biyampe amba mudi na bimunanwa bivule) bakashala mu bibundi byonemupa,
20 kufika ne pakapa Yehova banabenu kukōkolokwa, na mwawemupela’ko banwe, kadi bayate ne ntanda ikebapa Yehova Leza wenu bobwa bukila bwa Yodano. Ebiya mukajoka, muntu ne muntu mu ntanda yonemupēle.’+
21 “Mu kine kitatyi’kya nasoñenye Yoshua+ namino amba: ‘Wamwene na meso obe byalongele Yehova Leza obe ku bano balopwe babidi. Yehova ukalonga bintu bimo byonka ku malopwe onso okapita’mo.+
22 Kemufwaninwepo kwibatyina, mwanda Yehova Leza wenu ye wimulwila.’+
23 “Mu kine kitatyi’kya, nazenza Yehova amba,
24 ‘A Mfumu Mwinē Lupusa Lonso Yehova, ubaanza kulombola mwingidi obe bukatampe bobe ne kuboko kobe kwa bukomo,+ mwanda le i leza’ka mūlu nansha panshi ulonga bino bilongwa bya bukomo pamo bwa abe?+
25 Nakwisāshila, ndeke ngabuke, mone ntanda miyampe idi bobwa bukila bwa Yodano, ino ntanda ya ngulu miyampe ne Lebanona.’+
26 Ino Yehova wadi ukidi mundobele pa mwanda wenu,+ kadi kaungivwenepo. Yehova waunena’mba, ‘Lekela’byo papo! Kokesamba nami monka wao mwanda.
27 Kanda pa mutwe wa Pisika,+ utale kushika ne kungala ne kunshi ne kutunduka umone ntanda na meso obe, mwanda kukabukapo Yodano uno’u.+
28 Tūla Yoshua+ bu mwendeji, kadi mukankamike ne kumukomeja, mwanda i aye ukabuka+ ku meso a bano bantu kadi i aye ukebapyanika ntanda yosa kumona.’
29 Bino byonso byalongekele potwadi twikele mu musanza kampalampala na Bete-Peole.+
Kunshi kwa Dyani
^ Nansha’mba “Kinekaneka kya Alenona.”
^ Nansha’mba “nzaba ya peulu.”
^ Nansha’mba “sanduku wa lufu.”
^ Kuboko kumo i masantimetele 44,5. Tala Mbwejo B14.
^ Bibwanika padi i, “dibwe difīta.”
^ Nansha’mba “Kinekaneka kya Alenona.”
^ Ko kushintulula’mba “Bibundi bya Mapema a Yaila.”
^ Nansha’mba “Kinekaneka kya Alenona.”
^ Ko kunena’mba, Dijiba Difwe.
