Kupituluka mu Bijila 8:1-20
8 “Mufwaninwe kuta mutyima mulame mbila yonso yonakupa dyalelo dino’di, amba mwikale nyeke bōmi+ ne kwivudija, mutwele ne kuyata ntanda yobatyipīle bakulutuba benu kudi Yehova.+
2 Vuluka dishinda dilampe dyakwendeje’mo Yehova Leza obe ino myaka 40 mu ntanda mutuputupu,+ mwanda wa kukufundija wikale mwityepeje ne kukutūla pa ditompo+ mwa kuyukila bine bidi mu mutyima obe,+ shi ukalama nyeke mbila yandi nansha shi kukalama’yopo.
3 O mwanda wakufundije wikale mwityepeje ne kukwendeja na nzala+ ne kukudisha māna,+ okwadipo uyukile abe nansha bashobe bene, mwanda wa kukuyukija’mba muntu kekalangapo mūmi na mikate yonka kete mhm, ino muntu wikalanga mūmi na binenwa byonso bitamba mu kyakanwa kya Yehova.+
4 Bivwalwa byomwadi muvwele kebyaonekelepo, nansha binyantyilo byenu kuyula mpika mu ino myaka 40.+
5 Uyukile biyampe mu mutyima obe amba, Yehova Leza obe wadi ukōlola+ enka mōlwelanga muntu wandi mwana.
6 “Shi ke pano ufwaninwe kulama mbila ya Yehova Leza obe na kunanga mu mashinda andi ne kumutyina.
7 Mwanda Yehova Leza obe usa kukutweja mu ntanda miyampe,+ ntanda ya tuminonga twa mema,* masulo a mema ne mema alondomoka* akuka mu dilungu dya musanza ne mu ntanda ya ngulu,
8 ntanda ya ñano ne mebele a buluba, ya bisansa bya mañanza, mityi ya bikuyu, ne mangelenade,+ ntanda ya māni a mpafu ne būki,+
9 ntanda keikasakana’mopo byakudya kadi kukabulwe’mopo kintu nansha kimo, ntanda idi na mabwe adi na byuma kadi mu ngulu yayo ukakola’mo mikuba.
10 “Shi ubadi ubaikuta, ufwaninwe kutendela Yehova Leza obe pa mwanda wa ntanda miyampe yakupa.+
11 Tá mutyima kutyina wakelwa Yehova Leza obe kokomenwa kulama mbila yandi, mutyibilo wandi wa mambo, ne bitungo byandi byonkusoñanya dyalelo dino’di.
12 Shi ubadi ubaikuta kadi ubaubaka mobo malumbuluke koshikete’mo,+
13 shi bañombe bobe ne mikōko yobe bibevudija, ndalama yobe ne olo ibavula, kadi kodi na bintu bingibingi,
14 kokaleka mutyima obe witatule,+ ukulengeje wilwe Yehova Leza obe, wakulupwile mu ntanda ya Edipito, mu njibo ya bupika,+
15 mwine wakunangije mu ntanda mutuputupu+ mikatampe kadi ilenga moyo, idi na banyoka ba bulembe ne tuminye ne nshi myūmu tē yampikwa mema. Aye watambije mema mu dibwe dikomo+
16 kadi wakudishishe māna+ mu ntanda mutuputupu, keadipo ayukile bashobe, mwanda wa kukufundija wikale mwityepeje+ ne kukutūla pa ditompo amba umwene’mo mu mafuku a kumeso.+
17 Shi unene mu mutyima obe amba, ‘Namone buno bupeta bonso’bu ku bukomo bwami ne buninge bwa maboko ami,’+
18 vuluka’mba i Yehova Leza obe ukupa bukomo bwa kumona bupeta,+ amba afikidije kipwano kyandi kyawatyipīle bakulutuba bobe, na mobikadile dyalelo.+
19 “Shi wilwe’tu Yehova Leza obe kolonda baleza bakwabo ne kwibengidila ne kwivukwila kobadi, nasapula bukamoni pomudi dyalelo dino’di amba mukafwa binebine.+
20 Nenu mukafwa pamo bwa mizo yobonakanya kudi Yehova ku meso enu, mwanda kemwivwenepo diwi dya Yehova Leza wenu.+
