Kusokwelwa Kudi Yoano 21:1-27
21 Kadi namwene diulu dipya ne ntanda mipya;+ mwanda diulu dya kala ne ntanda ya kala bibapu kupita,+ kadi ne dijiba+ dine ke kutupu’dyo.
2 Namwene ne kibundi kijila, Yelusalema Mupya, kitūka mūlu kwa Leza+ kilongololwe bwa mutundaile muneñenibwe mwanda wa mulume wandi.+
3 Penepo naivwana diwi dikatampe ditamba mu lupona kedinena’mba: “Talai! Pema wa Leza udi na bantu, nandi ukekalanga nabo, abo nabo bakekalanga bantu bandi. Kadi Leza mwine ukekalanga nabo.+
4 Kadi ukapampulanga impolo yonso mu meso abo,+ ne lufu kelukekala’kopo dikwabo,+ nansha madilo nansha miyoa nansha misanshi mine keikekala’kopo monka.+ Bintu bya kala bibapu kupita.”
5 Kadi Yewa wadi ushikete pa lupona+ wanena’mba: “Talai! Nalonga bintu byonso ke bipya.”+ Wanena kadi amba: “Lemba, mwanda ino myanda i ya binebine* kadi ya bine.”
6 Ebiya waunena’mba: “Bibalongeka! Amiwa ne Alefa kadi ne Omeka,* ngalwilo ne mfulo.+ Yewa wa kyumwa nkamupanga mema a ku nsulo ya mema a būmi ku bitupu.*+
7 Yewa ense wa kunekenya ukapyananga bino bintu’bi, ami nkekalanga Leza wandi, aye nandi ukekalanga wami mwana.
8 Ino ba moyomoyo ne boba bampikwa lwitabijo+ ne boba ba mukenye mu bya busala byabo ne bantapañani+ ne ba busekese*+ ne boba balonga bya majende ne batōta bilezaleza ne bambepai bonso,+ kyepelo kyabo kikekala mu dijiba ditēma mudilo ne bibidikityi.+ Dino dyelekeja lufu lwa bubidi.”+
9 Mwikeulu umo wa mu boba basamba-babidi badi na ngeso isamba-ibidi’ba, mine yadi miyule’mo mpupo isamba-ibidi ya mfulo,+ waiya kaunena’mba: “Iya, nsa kukulombola mutundaile, mukaja Kana ka Mukōko.”+
10 Penepo waunselela mu bukomo bwa mushipiditu ku lūlu lumo lukatampe kadi lulampe, kaunombola kibundi kijila kya Yelusalema kitūka mūlu kwa Leza,+
11 kikele na ntumbo ya Leza.+ Kukelema kwakyo kwadi pamo bwa dibwe dya bulēme bukatampe, pamo bwa dibwe dya yasepe dyeñenya bwa dibwe dya kidisale* ditōka tō.+
12 Kyadi na lubumbu lukatampe kadi lulampe ne bibelo 12, ne bamwikeulu 12 pa bibelo, kadi pa bibelo’pa padi pandike majina a bisaka 12 bya bana ba Isalela.
13 Kutunduka kwadi bibelo bisatu, kungala nako bibelo bisatu, kunshi nako bibelo bisatu, kushika nako bibelo bisatu.+
14 Lubumbu lwa kibundi’kya lwadi ne na mabwe a kyalwilo 12, kadi padi majina 12 a batumibwa 12+ ba Kana ka Mukōko.
15 Ino yewa wadi wisamba nami wadi ukwete dibungu dya olo, bu kipimo mwanda wa kupima kibundi ne bibelo byakyo ne lubumbu lwakyo.+
16 Kadi kino kibundi kyadi na mitamba iná ya bula bumo, kyadi na bukata bumo mu bula ne mu bunkimbwa. Wapima kibundi na dibungu, kubwipi kwa makilometele 2 220;* bula bwakyo ne bunkimbwa ne bwimwa bwadi muswelo umo.
17 Kadi, wapimine ne lubumbu lwakyo, maboko 144* mungya kipimo kya muntu, e kyonka kipimo kya mwikeulu.
18 Ino lubumbu lwakyo lwadi lūbakwe na yasepe,+ kadi kibundi kyadi kya olo yonkayonka bwa dikalashi ditōka tō.
19 Byalwilo bya lubumbu lwa kino kibundi byadi bineñenye na mabwe malēme a miswelo ne miswelo: kyalwilo kibajinji kyadi kya yasepe, kya bubidi kya safile, kya busatu kya kalesedone, kya buná kya emelode,
20 kya butano kya sadonikise, kya busamba kya saladwane, kya busamba-bubidi kya kisodite, kya mwānda kya bedile, kya kitema kya topaze, kya dikumi kya kisopase, kya dikumi ne kimo kya yasente, kya dikumi ne bubidi kya ametesete.
21 Kadi, bibelo 12 byadi malungo 12; kibelo ne kibelo kyadi kipungwe na dilungo dimo. Kadi kipito kikatampe kya kino kibundi kyadi kya olo yonkayonka, pamo bwa dikalashi dimweka bukila ne bukila.
22 Kadi nkyamwene’mopo tempelo, mwanda Yehova* Leza Mwinē Bukomo Bonso+ ne Kana ka Mukōko yo tempelo yakyo.
23 Kadi kibundi kekyadipo kyokisakila dyuba nansha kweji wa kwikimunikila, mwanda ntumbo ya Leza yadi itōkeja’mo tō,+ ne kinanu kyakyo i Kana ka Mukōko.+
24 Kadi mizo ikanangilanga mu mwinya wakyo,+ balopwe ba ntanda nabo bakaleta’mo ntumbo yabo.
25 Bibelo byakyo kebikashitwepo nansha dimo mu dyuba, mwanda bufuku kebukekala’mopo.+
26 Kadi bakaleta’mo ntumbo ne bulēme bwa mizo.+
27 Ino kintu kyonso kya disubi ne muntu ense ulonga bya mukenye ne bongojani kakatwela’mopo nansha dimo;+ enka boba balembelwe mu muvungo wa būmi wa Kana ka Mukōko bo bakatwela’mo.+
Kunshi kwa Dyani
^ Nansha’mba “ikulupilwa.”
^ Nansha’mba “A kadi ne Z.” Alefa ne Omeka i masomo a mu alufabe ya Kingidiki, dibajinji ne dya mfulo.
^ Nansha’mba “pampikwa lupoto.”
^ Tala “Busekese,” ku Nshintulwilo ya Bishima.
^ Nansha’mba “dya kishimba.”
^ Kishima pa kishima i, “biwanza 12 000.” Kiwanza kimo i mametele 185 (mayo 606,95). Tala Mbwejo B14.
^ Kintu kya mametele 64. Tala Mbwejo B14.
