Kusokwelwa Kudi Yoano 3:1-22
3 “Lembela mwikeulu wa kipwilo kya mu Saladise amba: Bino’bi byo byanena yewa udi na mishipiditu isamba-ibidi ya Leza+ ne ñenyenye isamba-ibidi+ amba: ‘Ndyukile bilongwa byobe, amba witwanga* bu mūmi, abe nanshi wi mufwe.+
2 Tadija,+ kadi kankamika bintu bishele’ko byadi kebisa kufwa, mwanda nkitenepo mingilo yobe mingilwe* biyampe ku meso a Leza wami.
3 Nanshi, vuluka nyeke byobya byowatambwile ne byowaivwene, wibilame’nka kwibilama, kadi wisāse.+ Bine shi kubūkilepo, nsa kwiya bwa ngivi,+ kadi kusapo kuyuka nansha dimo nsá mine yonsa kwiya kodi.+
4 “‘Inoko, udi na bantu batyetye* mu Saladise kebasubijepo bivwalwa byabo,+ kadi abo bakananga nami bavwele bitōka tō,+ mwanda i bafwaninwe.
5 Yewa unekenya+ ukavwikwa bivwalwa bitōka tō,+ kadi nkikabulepo* nansha dimo dijina dyandi mu mukanda wa būmi,+ ino nkayukanya dijina dyandi ku meso a Tata ne ku meso a bamwikeulu bandi.+
6 Yewa wa matwi evwane kinena mushipiditu ku bipwilo.’
7 “Lembela mwikeulu wa kipwilo kya mu Filadefia amba: Bino’bi byo byanena yewa ujila,+ wa bine,+ udi na lufungulo lwa Davida,+ aye shi washitula i kutupu muntu ushita, kadi shi washite i kutupu muntu ushitula, amba:
8 ‘Ndyukile mingilo yobe—tala! natūla ku meso obe kibelo kishitule,+ kekikokejapo muntu kushita. Kadi ndyukile amba abe ukidi’ko na bukomo butyetye, walamine binenwa byami kadi kwabepejepo dijina dyami.
9 Tala! boba ba mu shinankonka ya Satana banena’mba i Bayuda abo’ko kwikala Bayuda mpika,+ ino i bambepai—tala! nkebaleta bafukate* ku maulu obe kadi nkebayukija’mba nkusenswe.
10 Mwanda abe walamine myanda ya kūminina kwami,*+ nami nkakulama mu kitatyi kya kutompibwa,+ kisa kwiya pa ntanda yonso ikelwe na bantu, mwanda wa kutompa boba bashikete pa ntanda.
11 Yao ngiya bukidibukidi.+ Kwatyija nyeke kyokya kyodi nakyo, kutyina’mba kwakekala wa kukuyata kilukwa kyobe.+
12 “‘Yewa unekenya—nkamwalamuna ke kikomo mu tempelo ya Leza wami, kadi kakatambe’mopo monka nansha dimo, nami nkamulemba dijina dya Leza wami+ ne dijina dya kibundi kya Leza wami, Yelusalema Mupya+ utūka mūlu utamba kwa Leza wami, ne dyami dijina dipya.+
13 Yewa wa matwi evwane kinena mushipiditu ku bipwilo.’
14 “Lembela mwikeulu wa kipwilo kya mu Laodesea+ amba: Bino’bi byo byanena Amena,+ kamoni+ mukōkele kadi wa bine,+ ngalwilo ya bupangi bwa Leza+ amba:
15 ‘Ndyukile bilongwa byobe, abe udi’tu ku kutalala kwenda ku kukaba kwenda. Nsaka’mba shi wadi nansha ku kutalala nansha ku kukaba.
16 Ino byodi lufufumya ku kukaba+ kwenda ku kutalala+ kwenda, nsa kukulasa mu kyakanwa kyami.
17 Mwanda abe unenanga’mba, “Ami ne mpeta+ kadi namone bya bupeta, kekudipo kyombudilwe nansha kimo,” ino abe kuyukilepo amba wi kimonya-malwa kadi udi bya lusa, mulanda, mpofu kadi udi mutaka,
18 nakudingila’mba umpote olo mikundulwe na mudilo amba wikale mpeta, umpote ne bivwalwa bitōka tō amba uvwale kutyina’mba bumvu bwa mutaka obe bwakamweka patōka,+ umpote ne lawa ya meso ya kwishinga mu meso+ obe amba umone.+
19 “‘Boba bonso bonsenswe kisanso kikatampe, nebadingilanga ne kwibalemununa.+ Nanshi pyasakana, wisāse.+
20 Tala! Yeu ñimene pa kibelo nkōkola. Shi muntu waivwana diwi dyami ne kunshitwila kibelo, nsa kutwela mu yandi njibo ne kudya nandi bidibwa bya kyolwa, aye nandi adye nami.
21 Yewa unekenya+ nkamupa lupusa lwa kushikata nami pa lupona lwami,+ monka monanekenenye nashikata+ na Tata pa lupona lwandi.
22 Yewa wa matwi evwane kinena mushipiditu ku bipwilo.’”
Kunshi kwa Dyani
^ Nansha’mba “utumbile.”
^ Nansha’mba “mivuijibwe.”
^ Kishima pa kishima i, “majina matyetye.”
^ Nansha’mba “nkikafundulapo.”
^ Nansha’mba “bevukwile.”
^ Bibwanika padi i, “walondele kimfwa kya kūminina kwami.”
