Kusokwelwa Kudi Yoano 6:1-17
-
Kana ka Mukōko kabalamuna biyukeno bisamba bibajinji (1-17)
-
Wa kunekenya utentamine pa kabalwe katōka (1, 2)
-
Yewa utentamine pa kabalwe katyila pyā bwa mudilo usa kutalula’ko ndoe (3, 4)
-
Yewa utentamine pa kabalwe kafīta usa kuleta kipupo kya nzala (5, 6)
-
Yewa utentamine pa kabalwe katōkoloka witwanga bu Lufu (7, 8)
-
Boba batapwe munshi mwa kisōkelo (9-11)
-
Kutenkana kwa ntanda kukatampe (12-17)
-
6 Kadi namwene palamwine Kana ka Mukōko+ kiyukeno kimo mu byobya bisamba-bibidi,+ kadi naivwene kipangwa kyūmi kimo mu biná’bya+ kyanena na diwi pamo bwa mukungulo amba: “Iya!”
2 Ebiya namwene, na’mba ntale! kabalwe katōka tō,+ kadi yewa wadi utentamine’po wadi na buta bwa miketo; wapebwa ne kilukwa,+ penepo kaenda wenda unekenya ne kuvuija bushindañani bwandi.+
3 Kadi aye pa kulamuna kiyukeno kya bubidi, naivwana kipangwa kyūmi kya bubidi+ kinena’mba: “Iya!”
4 Kwatamba kabalwe kakwabo, katyila pyā bwa mudilo, kadi yewa wadi utentamine’po bamupa lupusa lwa kutalula ndoe pano pa ntanda amba bantu betape abo bene na bene, bamupa ne kipete kikatampe.+
5 Aye pa kulamuna kiyukeno kya busatu,+ naivwana kipangwa kyūmi kya busatu+ kinena’mba: “Iya!” Ebiya namwene, na’mba ntale! kabalwe kafīta fututu, kadi yewa wadi utentamine’po wadi na kipimo kya bulēmi mu dikasa dyandi.
6 Penepo naivwana pamo bwa diwi mu bukata mwa bipangwa byūmi biná, amba: “Litele* umo wa ñano ku ndenadi*+ imo, malitele asatu a mebele a buluba nao ku ndenadi imo; kadi kokilonga māni a mpafu ne vinyu mine kibi.”+
7 Aye pa kulamuna kiyukeno kya buná, naivwana diwi dya kipangwa kyūmi kya buná+ kedinena’mba: “Iya!”
8 Ebiya namwene, na’mba ntale! kabalwe katōkoloka, kadi yewa wadi utentamine’po wadi witwa bu Lufu. Kadi Kibundu* kyadi kimulonda pabwipi. Penepo bapebwa lupusa pa kipindi kimo kya pa bipindi biná bya ntanda, lwa kwipaya na kipete kilampe, na kimpengele kya nzala,+ na kipupo kileta lufu, ne na banyema ba ntanda ba pano panshi.+
9 Aye pa kulamuna kiyukeno kya butano, namwene munshi mwa kisōkelo+ myuya*+ ya boba batapilwe pa mwanda wa kinenwa kya Leza ne pa mwanda wa bukamoni bobadi basapula.+
10 Kebābija na diwi dikatampe, amba: “A Mfumu Mwinē Lupusa Lonso ujila kadi wa bine,+ le i kufika ne kitatyi’ka kyokaleka kutyiba mambo ne kwaluja kinongo kya mashi etu pa boba bekele pa ntanda?”+
11 Penepo umo ne umo bamupa munkukumba utōka tō,+ bebanena belaije’ko bidi bityetye, enka ne bibwana kibalwa kya bapika bakwabo kadi banababo badi kebasa kwipaibwa monka mobaipailwe abo.+
12 Kadi namwene aye pawalamwine kiyukeno kya busamba, penepo kwaikala kutenkana kukatampe kwa ntanda; dyuba nadyo dyafīta fututu pamo bwa sāka mupungwe na myoya,* ne kweji ense nandi waikala’nka bwa mashi,+
13 ñenyenye ya mūlu nayo yapona panshi pamo’nka bwa kikuyu kyatenkanibwa na kivula kikatampe kiponeja bikuyu byakyo bibishi.
14 Kadi ne diulu dyafunduka pamo bwa muvungo obavunga,+ kadi ngulu yonso ne bisanga byonso byatalulwa pa kifuko kyabyo.+
15 Penepo balopwe ba ntanda, ne bengidi bakatampe ba bulēme, ne bakulu ba basola, ne bampeta, ne bankomokomo, ne bapika bonso, ne banapabo bonso bafyama mu mitá ne mu mabwe a mu ngulu.+
16 Kebanena’nka kunena ngulu ne mabwe amba: “Mwituponenei+ mwitufye ku mpala ya Yewa ushikete pa lupona+ ne ku bukalabale bwa Kana ka Mukōko,+
17 mwanda difuku dikatampe dya bukalabale bwabo dibaiya,+ lelo i ani ubwanya kwimana?”+
Kunshi kwa Dyani
^ Kishima pa kishima i, “Kwate.” Tala Mbwejo B14.
^ Kityele kya ndalama kya bene Loma kya bulēme bwa mfutwa ya difuku dimo. Tala Mbwejo B14.
^ Nansha’mba “Hadese,” ko kunena’mba, kibundu kya bantu bonso. Tala Nshintulwilo ya Bishima.
^ Mobimwekela kifunkila pa mashi a būmi bwabo apungulwilwe pa kisōkelo. Tala Nshintulwilo ya Bishima.
^ Kepabulwe i myoya ya mbuji.
