Kusokwelwa Kudi Yoano 8:1-13
8 Aye+ pa kulamuna kiyukeno kya busamba-bubidi,+ kwaikele talala nyā momwa mūlu kubwipi kwa kipindi kya nsá.
2 Penepa namona bamwikeulu+ basamba-babidi bemene ku meso a Leza, bapebwa ne bimpungidi bisamba-bibidi.
3 Mwikeulu mukwabo, wadi ukwete kintu kya* ensense kya olo, wafika kaimene ku kisōkelo;+ bamupa ensense+ mingi ya kulambula pamo ne milombelo ya bajila bonso pa kisōkelo kya olo+ kyadi kumeso kwa lupona.
4 Mwishi wa ensense wadi ufituka ku kuboko kwa mwikeulu keukanda pamo ne milombelo+ ya bajila ku meso a Leza.
5 Ino ponkapo mwikeulu wayata kintu kya ensense, wayuja’mo mudilo wa pa kisōkelo kupwa wapungulwila’o pa ntanda. Penepa kwaikala mikungulo ne mawi ne kupena kwa mapeni+ ne kutenkana kwa ntanda.
6 Ebiya bamwikeulu basamba-babidi badi na bimpungidi+ bisamba-bibidi’ba belongolola kuvumija’byo.
7 Kadi mubajinji wavumija kimpungidi kyandi. Ebiya kwaikala mvula wa mabwe ne mudilo bityange na mashi, penepo byaelwa panshi;+ kadi kipindi kimo kya pa bipindi bisatu bya ntanda kyatēma, ne kipindi kimo kya pa bipindi bisatu bya mityi kyatēma, ne munamuna mibishi yonso nayo yatēma.+
8 Mwikeulu wa bubidi wavumija kimpungidi kyandi. Ebiya kintu kimo kidi bwa lūlu lukatampe lutēma mudilo kyaelwa mu dijiba.+ Kadi kipindi kimo kya pa bipindi bisatu bya dijiba kyaalamuka ke mashi;+
9 ne kipindi kimo kya pa bipindi bisatu bya bipangwa byūmi* mu dijiba kyafwa,+ ne kipindi kimo kya pa bipindi bisatu bya byombo kyaoneka.
10 Mwikeulu wa busatu wavumija kimpungidi kyandi. Ebiya luñenyenye lukatampe lutēma pamo bwa kinanu lwapona mūlu, lwaponena pa kipindi kimo kya pa bipindi bisatu bya minonga ne masulo a mema.+
11 Dijina dya luñenyenye’lwa i Ndulwe. Kadi kipindi kimo kya pa bipindi bisatu bya mema kyaalamuka ke ndulwe, ne bantu bangi bafwa na mema’a, mwanda aludile.+
12 Mwikeulu wa buná wavumija kimpungidi kyandi. Ebiya kipindi kimo kya pa bipindi bisatu bya dyuba kyakupilwa+ ne kipindi kimo kya pa bipindi bisatu bya kweji ne kipindi kimo kya pa bipindi bisatu bya ñenyenye, amba kipindi kimo kya pa bipindi bisatu byabyo kifītyijibwe fututu+ ne mwinya ubulwe kitōkeji mu kipindi kimo kya pa bipindi byao bisatu, ne bufuku nabo monka na monka.
13 Kadi namwene, kadi naivwene mukebo wipapa mu bukata mwa mūlu keunena na diwi dikatampe amba: “Malwa abo, malwa abo, malwa abo+ boba bekele pa ntanda pa mwanda wa kuvuma kukwabo kwa bimpungidi bya bamwikeulu basatu kebasa kuvumija bimpungidi byabo!”+
