Kusokwelwa Kudi Yoano 9:1-21
9 Mwikeulu wa butano wavumija kimpungidi+ kyandi. Ebiya namona luñenyenye lumo lwatamba mūlu lwapona panshi, penepo bamupa lufungulo lwa kibelo* kya lupongo.+
2 Washitula ku kibelo* kya lupongo, ne mwishi keufituka utamba mu kibelo* pamo bwa mwishi wa mu nkelwa mikatampe, dyuba nadyo dyafītyijibwa fututu,+ ne luvula lwine, na mwishi wa mu kibelo’kya.*
3 Kadi njie yatamba mu mwishi keyenda pa ntanda,+ penepo yapebwa lupusa, lupusa lumo lonka ludi na tuminye twa pano pa ntanda.
4 Beilombwele ileke kulonga munamuna ya pano pa ntanda kibi nansha kiyombo kibishi nansha mutyi mwine, poso enka boba bantu bampikwa kiyukeno kya Leza pa mapala abo.+
5 Kadi njie yapelwe lupusa, ke lwa kwibepayapo, aa, ino i lwa kwibamwesha malwa mu myeji itano, kadi malwa abo adi pamo bwa malwa aleñanga kaminye+ shi kabasume muntu.
6 Mu mene mafuku’a bantu bakakimba lufu ino kwilumona nansha dimo mpika, kadi bakabila bininge kufwa, ino lufu alo lukebanyema.
7 Kadi mumwekelo wa njie’ya wadi wifwene tubalwe tulongololwe kukalwa bulwi;+ pa mitwe yayo padi bintu bimweka bwa bilukwa bya olo, kadi mapala ayo adi pamo bwa mapala a bantu,
8 inoko yadi na nywene pamo bwa nywene ya bana-bakaji. Meno ayo nao adi bwa a bantambo,+
9 yadi ne na bilama-kyadi pamo bwa bilama-kyadi bya byuma. Ne lupumo lwa masala ayo lwadi bwa lupumo lwa makalo akokwa na tubalwe tunyemena ku bulwi.+
10 Ne kadi, yadi na minyenze* ne nonga pamo bwa tuminye, kadi mu minyenze yayo mwadi lupusa lwa kusanshija bantu mu myeji itano.+
11 Ayo idi na mulopwe wayo, mwikeulu wa lupongo.+ Mu Kihebelu dijina dyandi i Abadone,* inoko mu Kingidiki udi na dijina dya bu Apodione.*
12 Malwa amo abapite. Tala! Kukidi malwa+ makwabo abidi asa kwiya pa kupwa kwa bino bintu.
13 Mwikeulu wa busamba+ wavumija kimpungidi kyandi.+ Ebiya naivwana diwi dimo ditamba mu masengo a kisōkelo kya olo+ kidi ku meso a Leza
14 dinena mwikeulu wa busamba, wadi na kimpungidi’wa amba: “Kutulula bamwikeulu baná bakutyilwe ku munonga mukatampe wa Ufalete.”+
15 Penepo bamwikeulu baná, badi balongololwe mwanda wa nsá ne difuku ne kweji ne mwaka bakutululwa, mwanda wa kwipaya kipindi kimo kya pa bipindi bisatu bya bantu.
16 Bungi bwa bibumbo bya basola ba pa tubalwe badi tununu makumi abidi a tununu dikumi;* naivwene bungi bwabo.
17 Kadi namino’u e mwadi mwikadile tubalwe tonamwene mu kimonwa ne boba badi batentamine’po: Badi na bilama-kyadi bityila pyā bwa mudilo, bifītuluka bwa yasente, kadi bya mandyano bwa bibidikityi, kadi mitwe ya tubalwe yadi bwa mitwe ya bantambo,+ kadi mudilo ne mwishi ne bibidikityi byadi bitamba mu byakanwa byato.
18 Kipindi kimo kya pa bipindi bisatu bya bantu kyaipailwe na bino bipupo bisatu, na mudilo, na mwishi ne na bibidikityi byatambile mu byakanwa byato.
19 Mwanda lupusa lwa tubalwe ludi mu byakanwa byato ne ku mikila yato, mwanda mikila yato idi bwa banyoka kadi idi ne na mitwe, kadi tuloñanga nayo bantu bibi.
20 Ino bantu bakwabo, boba kebaipailwepo na bino bipupo kebesāshilepo ku mingilo ya makasa abo; kebalekele’byopo kutōta bandemona ne bilezaleza bya olo ne bya ndalama ne bya mikuba ne bya mabwe ne bya mityi, bintu kebikokejapo kumona nansha kwivwana nansha kwenda kwine.+
21 Kadi kebesāshilepo ku kwipayañana kwabo nansha bilongwa byabo bya majende nansha busekese* bwabo nansha bwivi bwabo bwine.
Kunshi kwa Dyani
^ Nansha’mba “kīna.”
^ Nansha’mba “kīna.”
^ Nansha’mba “kīna.”
^ Nansha’mba “kīna’kya.”
^ Nansha’mba “mizenze; mashinka.”
^ Ko kushintulula’mba “Bonakani.”
^ Ko kushintulula’mba “Yewa Onakanya.”
^ Nansha’mba “20 000 misunsa 10 000,” ko kunena’mba, 200 000 000.
^ Mu Kingidiki i, porneia. Tala Nshintulwilo ya Bishima.
