Luta 3:1-18
3 Ebiya Naomi inandi muko wamunena’mba: “A wami mwana, mwene mfwaninwe kukukimbila njibo,*+ amba bintu bikwendekele biyampe?
2 Mwene tubutulwanga na Boaza?+ Aye ye mwinē bansongwakaji bowadi nabo’ba. Buno bufuku upēpanga mebele a buluba pa kipūdilo.
3 Shi ke pano oya wishinge’ko ne māni a mananshi; kupwa uvwale biyampe,* utūkile ku kipūdilo. Kokeyukanya kudi mwana-mulume’wa enka ne byapwa kudya ne kutoma.
4 Shi walāla, jingulula pasa kulādila; kupwa wende ukamupūtule ku maulu, nobe ulāle. Usa kukulombola byofwaninwe kulonga.”
5 Nandi walondolola’mba: “Nsa kulonga byonso byowanombola.”
6 Penepa watūkila ku kipūdilo walonga byonso byamusapwidile inandi muko.
7 Mu kine kitatyi’kyo, Boaza wadya watoma, waivwana biyampe ku mutyima. Kupwa waenda kukalāla ku mfulo kwa mulwi wa miseke. Ebiya Luta waiya bityebitye wamupūtula ku maulu nandi walāla.
8 Pa bukata bwa bufuku, mwana-mulume’wa waanza kuzakala, kupwa waalamuka wamona mwana-mukaji ulēle ku maulu andi.
9 Boaza waipangula’mba: “Le wi ani?” Nandi watentulula’mba: “I ami Luta, mwingidi obe. Pūta’ko mwingidi obe kisandi* mwanda wi mukūdi.”+
10 Nandi watentulula’mba: “Yehova akwesele dyese abe wami mwana. Ubamwekeja mpata buswe bwa ndamatyidile uno musunsa wa mfulo kutabuka mubajinji,+ mwanda kulondelepo bansongwalume, ekale balanda nansha bampeta.
11 Shi ke pano abe wami mwana, kokikwatwa moyo. Nsa kukulongela byonso byonena,+ mwanda muntu ense mu kibundi* uyukile amba wi mwana-mukaji mulumbuluke.
12 Shako, na bubine ne mukūdi,+ ino kudi mukūdi omubutulwa nandi bininge kumpita ami.+
13 Ikala pano buno bufuku, shi usa kukukūla lubanga, i biyampe! Muleke akukūle.+ Inoko shi kasakilepo kukukūla, bine ne Yehova mūmi, nsa kukukūla ami mwine. Lāla pano kufika ne ku lubanga.”
14 Penepa walāla ku maulu andi kufika ne ku lubanga, kupwa wabūka kumeso kwa patōke senene bibwanya kujingululwa muntu. Ebiya Boaza wamunena’mba: “Muntu kakayuka’mba kwadi kubaiya mwana-mukaji ku kipūdilo.”
15 Wabweja’ko amba: “Leta kikanzo kyovwele’kyo, wikibāle.” Nandi wekibāla, penepa Boaza wapungulwila’mo bipimo bisamba* bya mebele a buluba, wamutwika’byo, kupwa Boaza waenda mu kibundi.
16 Waenda kudi inandi muko, nandi wamwipangula’mba: “Le byadi namani,* a wami mwana?” Penepa wamulombola bintu byonso byamulongelanga mwana-mulume’wa.
17 Luta wabweja’ko amba: “Wadi wampe bino bipimo bisamba bya mebele a buluba, waunena’mba, ‘Kokenda makasa bitupu kudi inobe muko.’”
18 Penepa nandi wanena’mba: “Shikata pano abe wami mwana kufika ne byoyuka musa kufudila uno mwanda, ke-pantu mwana-mulume’wa kasapo kukōkolokwa enka ne byapwija uno mwanda dyalelo’di.”
Kunshi kwa Dyani
^ Kishima pa kishima i, “kifuko kya kukōkolokwa.”
^ Nansha’mba “vwala bivwalwa byobe bya pangala.”
^ Nansha’mba “milomo ya kivwalwa kyobe.”
^ Kishima pa kishima i, “kibelo kyonso kya bantu bami.”
^ Pakwabo i bipimo bisamba bya sea, nansha kintu kya malitele 44 (makwatyi 40 a byūmu). Tala Mbwejo B14.
^ Kishima pa kishima i, “Le wi ani?”
