Madilo 5:1-22
5 A Yehova, vuluka bintu byetufikila.
Tala, umone bumvu bwetu.+
2 Bupyani bwetu bubapebwa beni, mobo etu nao bantu bangi.+
3 Ketudi bana ba nshiye ba kubulwa shabo; bamama abaikala pamo bwa bakaji ba kishala.+
4 Ketupote mema etu a kutoma,+ kadi nkuni yetu ke ya lupoto.
5 Boba betulondalonda badi ku nshingo yetu;Tubakōka, ino ketupelwepo kukōkolokwa.+
6 Tubaolwela Edipito+ ne Ashidia+ kuboko kwetu, mwanda wa kusokola mikate ya kudya.
7 Batata bapile mambo kebakidi’kopo, ino batwe tubasela bilubo byabo.
8 Pano bengidi abetubikala; i kutupu muntu nansha umo wa kwitusompola mu kuboko kwabo.
9 Tutūlanga būmi bwetu*+ mu kyaka pa kusela mikate, mwanda wa kipete kya mu ntanda mutuputupu.
10 Kikoba kyetu kibakabe pamo bwa nkelwa, mwanda wa nzala isansa.+
11 Bakaji ba mu Ziona abafwijibwa bumvu,* bajike ba mu bibundi bya Yuda.+
12 Bamfumu batundikilwe ku kuboko kwabo,+ kadi bakulumpe kebalēmekelwepo.+
13 Bansongwalume baselanga mpelo, banuke nabo bakukala na bīta bya nkuni.
14 Bakulumpe abataluka pa kibelo kya kibundi;+ bansongwalume abaleka komba ñimbo.+
15 Nsangaji ibataluka ku mutyima wetu; luja lwetu lubaalamuka ke madilo.+
16 Kilukwa kibapone ku mutwe wetu. Malwa etu, mwanda tubapi mambo!
17 Mutyima wetu ubelanga pa mwanda wa kino,+Kadi meso etu abaikala na kafi pa mwanda wa bino bintu,+
18 Pa mwanda wa Lūlu lwa Ziona lusalwe;+ pano mikenge izeulukanga’po.
19 Ino abewa, a Yehova, ushikete nyeke pa lupona.
Lupona lobe i lwa ku nkongo ne nkongo.+
20 Mwanda waka ubetwilwa lonso ne kwituleka kitatyi kilampe nenki?+
21 Witujokeje kodi, a Yehova, netu tukajokela kodi bukidi bonka.+
Jokeja mafuku etu enka na moadi ekadile pa kala.+
22 Inoko, ubetwelelela.
Abe ukitulobele bininge.+
