Mwendele Mako 3:1-35
3 Watwela kadi monka mu shinankonka, namo mwadi mwana-mulume umo wa kuboko kūmu.*+
2 Penepo badi bamutala sō bamone shi usa kubelula muntu mu dya Sabato, mwanda wa bamusambile.
3 Ebiya wanena mwana-mulume wa kuboko kūmu* amba: “Imana, iya pa bukata.”
4 Kupwa webanena’mba: “Lelo kitabijibwe mu dya Sabato i kulonga kiyampe’ni nansha i kusanshijañana, le i kupandija būmi’ni* nansha i kwibwipaya?”+ Ino abo bauba’tu nyā.
5 Pa kupwa kwibatala koku ne koku na mutyima fututu, wafītwa bininge pa kumona mityima yabo myūmu,+ kupwa wanena mwana-mulume’wa amba: “Olola kuboko.” Nandi waolola’ko, ne kuboko kwandi nako kwakoma.
6 Papo Bafadiseo baenda, ponka na ponka bashilula kumukadila ñeni na kitango kya balondi ba Heloda,+ mwanda wa kumwipaya.
7 Ino Yesu waenda ku dijiba na bandi bana ba bwanga, penepo kibumbo kikatampe kitamba ku Ngadilea ne ku Yudea kyamulonda.+
8 Enka ne ba ku Yelusalema, ne ba ku Idyumea, ne ba bobwa bukila bwa Yodano, ne ba ku mitamba ya Tyila ne Shidona, kibumbo kikatampe, baiya kwadi pobaivwene bintu bivulevule byaadi ulonga.
9 Penepo walombola bandi bana ba bwanga kwikale kabwato ka aye kwingidija kutyina’mba kibumbo kyakamutyinya.
10 Byaabelwile bantu bangibangi, o mwanda boba bonso badi na misongo mikatampe badi bongwila kwadi amba bamutenge.+
11 Enka ne mishipiditu ya disubi,+ ponso poyadi imumona, yadi ipona ku meso andi ne kwela lubila, keinena’mba: “Abe wi Mwanā Leza.”+
12 Ino weilombwele ukoma misunsa mingi amba keyakimuyukanya ku bantu.+
13 Penepo wakanda ku lūlu, waita boba baadi usakile,+ nabo baiya kwadi.+
14 Ebiya wakongakanya* kisumpi kya bantu 12, baatelele ne bu batumibwa, ba kwenda nandi pamo ne ba kutuma kukasapula
15 ne kwikala na lupusa lwa kupanga bandemona.+
16 Kadi kisumpi kya boba 12+ baakongakenye* i Shimona, wawainikile ne dikwabo dya bu Petelo,+
17 Yakoba mwanā Zebede ne Yoano mwanabo na Yakoba (bano nabo webenikile ne dya bu Boaneje, ko kunena’mba “Bana ba Mukungulo”),+
18 Andele, Fidipa, Balatelemi, Mateo, Tomase, Yakoba mwanā Afesa, Tadeusa, Shimona mwine Kanane,*
19 ne Yudasa Isakadiota, yewa wamwabile mwenda mafuku.
Penepo watwela mu njibo,
20 kadi kibumbo kyebunga monka, bakomenwa’nka ne kudya byakudya.
21 Ino babutule bandi pa kwivwana nabya, batamba kukamukwata, mwanda badi banena’mba: “Ñeni ibamujina.”+
22 Kadi, basonekeji batambile ku Yelusalema badi banena’mba: “Udi na Belezebuba,* kadi upañanga bandemona na bukomo bwa mulopwe wa bandemona.”+
23 Penepo webetyila kwadi, kupwa webanena na byelekejo amba: “Le Satana ubwanya namani kupanga Satana?
24 Shi bulopwe bwilalulule abo bwine, bwabo bulopwe kebukemanapo;+
25 ne njibo nayo shi ilalulule ayo mine, yayo njibo keikokejapo kwimana.
26 Kadi shi Satana etombokele aye mwine ne kwilalulula, nabya kakemanapo ino usa kufika ku mfulo.
27 Na bubine, i kutupu muntu utwela mu njibo ya nkomokomo ubwanya kumwiba bintu byandi shi kabadikilepo bidi kukuta nkomokomo’wa. Penepo katūta bidi mu yandi njibo.
28 I bine nemulombola’mba bintu byonso bikalekelwa bana ba bantu, nansha shi abalonga bubi’ka nansha shi abatukana mitonko’ka.
29 Inoko, yewa ense utuka mushipiditu ujila kakalekelwapo, mhm, nyeke ne nyeke,+ ino wapi mambo a bubi bwa nyeke.”+
30 Wanenene namino mwanda badi banena’mba: “Udi na mushipiditu wa disubi.”+
31 Byobiya inandi ne banababo+ baiya kebemene panja, bamutumina’mo muntu wa kukamwita.+
32 Papo kibumbo kyadi kishikete koku ne koku, penepo kebamunena’mba: “Tala! Inobe ne banabenu aba panja bakukimba.”+
33 Ino aye webalondolola’mba: “Lelo mama ne banabetu i bāni?”
34 Kupwa watala boba badi bashikete koku ne koku bamwelele umbukata kanena’mba: “Monai’po, mama ne banabetu aba kebo!+
35 Yewa ense ulonga kiswa-mutyima kya Leza, yao ye mwanetu mwana-mulume, ye mwanetu mwana-mukaji, kadi ye mama.”+
Kunshi kwa Dyani
^ Nansha’mba “kwa bulebe.”
^ Nansha’mba “kwa bulebe.”
^ Nansha’mba “muya’ni.”
^ Nansha’mba “watonga.”
^ Nansha’mba “baatongele.”
^ Nansha’mba “mupyasakane.”
^ Kitenta kifunkila padi Satana.
