Mwendele Mako 8:1-38
8 Mu oa mafuku’a, kwadi monka kibumbo kikatampe kine, ino kebadipo na kintu kya kudya. Penepo waita bandi bana ba bwanga kaebanena’mba:
2 “Nakwatyilwa kibumbo lusa+ mwanda abashikata nami ke mafuku asatu, ino kebadipo na kintu kya kudya.+
3 Shi nebanene bende kwabo na nzala,* nabya basa kupona mpanga mwishinda, kadi bamobamo i batambe kulampe.”
4 Ino bandi bana ba bwanga bamulondolola’mba: “Le kuno kufula namino muntu ukokeja kusokola kwepi mikate ibwanya kwikuta bano bantu?”
5 Byobiya aye webepangula’mba: “Le mudi na mikate inga?” Nabo amba: “Isamba-ibidi.”+
6 Penepo walombola kibumbo kishikate pa nshi. Ebiya wayata mikate isamba-ibidi’ya, wafwija’ko, weityumuna, kape’yo bandi bana ba bwanga’mba babile’yo bantu, penepo baabila’yo kibumbo.+
7 Kadi badi ne na twita twa lui tutyetye, pa kupwa kwesela’to, ne tuno nato webalombola bebape’to.
8 Penepo badya baikuta, kadi baboya bilala bikatampe* bisamba-bibidi biyule bipindi byashele’ko.+
9 Ino, kwadi kintu kya bana-balume 4 000. Ku mfulo webatalula bende.
10 Ponka na ponka waikila mu bwato na bandi bana ba bwanga, waiya ku ntanda ya Dalamanuta.+
11 Penepo Bafadiseo baiya kebepotomeja nandi, bamulomba kiyukeno kya mūlu, mwanda wa kumutompa.+
12 Ebiya weikija bininge mu mushipiditu wandi kanena’mba: “Mwanda waka luno lukongo lukimba kiyukeno?+ Bine nanena’mba, i kutupu kiyukeno kikapebwa luno lukongo.”+
13 Ponkapo webashiya, waikila monka mu bwato, waenda bukila bukwabo.
14 Inoko, baidilwe kusela mikate, kadi kebadipo na kintu mu bwato poso enka mukate umo kete.+
15 Penepo webadyumuna pampikwa kafinda’mba: “Pūtulai meso; kadi dyumukai kiyujo kya Bafadiseo ne kiyujo kya Heloda.”+
16 Ebiya bashilula kwipatanya abo bene na bene pa mwanda wa mikate yokebadipo nayo.
17 Aye pa kujingulula nabya, webanena’mba: “I kika kyomwipatenya pa mwanda wa mikate yokemudipo nayo? Le kemwayukile ne kwivwanija? Lelo mityima yenu ikilēma pa kwivwana?
18 ‘Nansha byomudi na meso, le kemumonangapo; kadi nansha byomudi na matwi, le kemwivwanangapo?’ Lelo kemuvulukilepo
19 ponatyumwine mikate itano+ mwanda wa bana-balume 5 000, le mwakongele’po bilala binga biyule bipindi bā?” Nabo bamulondolola’mba: “Dikumi ne bibidi.”+
20 “Ponatyumwine mikate isamba-ibidi mwanda wa bana-balume 4 000, le mwakongele’po bilala bikatampe* binga biyule bipindi bā?” Nabo bamulondolola’mba: “Bisamba-bibidi.”+
21 Penepo webanena’mba: “Lelo ne pano kemwaivwanije?”
22 Ebiya baiya ku Betesaida. Kwine’kwa bantu bamuletela mpofu umo, kebamwisāshila’mba amutenge.+
23 Nandi wakwata mpofu’wa ku kuboko, wamukokela panja pa kibundi. Ebiya wamupēlela mata mu meso,+ wamutenteka ne makasa kamwipangula’mba: “Le kudi kyowamona?”
24 Muntu’wa nandi watala kanena’mba: “Namone bantu, inoko bamweka pamo bwa mityi yenda.”
25 Watenteka monka makasa pa meso a muntu’wa, ne muntu nandi wamona’tu senene. Meso andi akoma, ebiya kamone kintu ne kintu mokikadile.
26 Ponkapo wamutalula ende kwandi, kamunena’mba: “Kokatwela mu kibundi.”
27 Yesu ne bandi bana ba bwanga bataluka kebenda ku bibundi bya Kesalea Fidipai, penepo mwishinda washilula kwipangula bandi bana ba bwanga’mba: “Le bantu banenanga’mba ami ne ani?”+
28 Nabo bamunena’mba: “Bamo amba, wi Yoano Mubatyiji;+ bakwabo amba, wi Ediya;+ bangi nabo amba, wi umo wa mu bapolofeto.”
29 Ebiya webepangula’mba: “Ino banwe munenanga’mba ami ne ani?” Petelo wamulondolola’mba: “Abe wi Kidishitu.”+
30 Penepo webasoñanya wibakoma’mba kemwakilombolai muntu nansha umo myanda yami.+
31 Kadi, washilula kwibafundija’mba Mwanā muntu ufwaninwe kususulwa masusu mavule ne kupelwa na bakulumpe ne babitobo bakulu ne basonekeji ne kwipaibwa,+ kadi ukasangulwa kupwa kwa mafuku asatu.+
32 Bine, wadi unena bino binenwa patōkelela. Ino Petelo wamukokela kufula, waanza kumufunina.+
33 Nandi wavundamuka, watala bandi bana ba bwanga, kafunina Petelo amba: “Jokela mu nyuma, abe Satana! mwanda abe ulañanga milangwe ya bantu ke milangwepo ya Leza.”+
34 Penepo waityila kibumbo kwadi ne bandi bana ba bwanga kaebanena’mba: “Shi muntu usaka kunonda, nankyo epele aye mwine, asele mutyi wandi wa masusu* kadi anonde nyeke.+
35 Ke-muntu yewa ense usaka kupandija būmi bwandi* ukebujimija, ino yewa ense ujimija būmi bwandi* pa mwanda wa amiwa ne pa mwanda wa myanda miyampe ukebupandija.+
36 Na bubine, i kamweno’ka kamwena muntu mu kunekenya ntanda yonso ne kujimija būmi bwandi?*+
37 Lelo na bubine muntu ukapāna kika kya kwishinta na būmi bwandi?*+
38 Mwanda yewa umfwa bumvu ami ne binenwa byami mu luno lukongo lwa makoji* ne lwa bubi, Mwanā muntu nandi ukamufwanga bumvu+ pakāya mu ntumbo ya Shandi na bamwikeulu bajila.”+
Kunshi kwa Dyani
^ Nansha’mba “bashikilwe na nzala.”
^ Nansha’mba “bilala bya byakudya.”
^ Nansha’mba “bilala bya byakudya.”
^ Tala Nshintulwilo ya Bishima.
^ Nansha’mba “muya wandi.”
^ Nansha’mba “muya wandi.”
^ Nansha’mba “muya wandi.”
^ Nansha’mba “muya wandi.”
^ Nansha’mba “lwampikwa lulamato.”
