Mwendele Mateo 16:1-28
16 Penepo Bafadiseo ne Basadusea bamufwena, kadi pa kumutompa, bamunena ebalombole kiyukeno kya mūlu.+
2 Nandi pa kulondolola webanena’mba: “Shi kyolwa kibaoloba, munenanga’mba, ‘Kusa kwikala biyampe, mwanda kūlu kubatyile pyā,’
3 lubanga nalo amba, ‘Kusa kwikala mashika, ne mvula dyalelo, mwanda kūlu kubatyile pyā ino ako’ko makumbi fututu.’ Muyukile’ko kushintulula mumwekelo wa kūlu, ino biyukeno bya bitatyi, kubwanya kwibishintulula mpika.
4 Lukongo lubi kadi lwa makoji* lukimbanga nyeke kiyukeno, ino i kutupu kiyukeno kyolukapebwa+ poso’nka kiyukeno kya Yona.”+ Ponkapo wataluka’po, webashiya kaenda.
5 Ebiya bana ba bwanga batyibuluka bobwa bukila kadi baidilwe kusela mikate.+
6 Yesu webanena’mba: “Pūtulai meso, kadi dyumukai kiyujo kya Bafadiseo ne Basadusea.”+
7 Penepo baanza kunena abo bene na bene amba: “Ketuselelepo mikate.”
8 Yesu pa kuyuka kino, wanena’mba: “Banwe ba lwitabijo lutyetye, i kika kyomunenena banwe bene na bene amba kemudipo na mikate?
9 Lelo kemwajingulwile mwanda mwine, nansha kadi le kemuvulukilepo mikate itano yadile boba 5 000 ne bungi bwa bilala byomwaboile’po?+
10 Nansha mikate isamba-ibidi yadile boba 4 000 ne bungi bwa bilala bikatampe* byomwaboile’po?+
11 Le penepo mubakomenwa namani kujingulula’mba nkimunenangapo myanda ya mikate? Ino dyumukai kiyujo kya Bafadiseo ne Basadusea.”+
12 Penepo baivwanija’mba kadipo wisambila pa kudyumuka kiyujo kya mikate, ino i pa kudyumuka bufundiji bwa Bafadiseo ne Basadusea.
13 Yesu pa kwiya ku ntanda ya Kesalea Fidipai, waipangula bandi bana ba bwanga’mba: “Le bantu banenanga’mba Mwanā muntu i ani?”+
14 Nabo banena’mba: “Bamo banenanga’mba i Yoano Mubatyiji,+ bakwabo amba i Ediya,+ bangi nabo amba i Yelemia nansha umo wa mu bapolofeto.”
15 Nandi webanena’mba: “Le banwe nenu, munenanga’mba ne ani?”
16 Shimona Petelo wamulondolola’mba: “Abe wi Kidishitu,+ Mwanā Leza mūmi.”+
17 Penepa Yesu wamutentulula kanena’mba: “Wi wa nsangaji abe Shimona mwanā Yona, mwanda ke mwitapo ne mashi* byakusokwela’kyo, ino i Tata udi mūlu wakusokwela’kyo.+
18 Kadi, nakunena’mba: Abe wi Petelo,+ kadi pa dino dibwe+ nkōbaka’po kipwilo kyami, ne bibelo bya Kibundu* kebikekitādilapo.
19 Nkakupa mfungulo ya Bulopwe bwa mūlu, kadi kyonso kyowakakuta pano panshi kikekala kikutwe kala mūlu, ne kyonso kyowakakutulula pano panshi kikekala kikutululwe kala mūlu.”
20 Ebiya walombola ukoma bana ba bwanga’mba kebakisapwila muntu nansha umo amba aye ye Kidishitu.+
21 Kushilwila penepa, Yesu waanza kulombola bandi bana ba bwanga’mba ufwaninwe kwenda ku Yelusalema, kukasusulwa bininge na bakulumpe ne babitobo bakulu ne basonekeji ne kwipaibwa, kadi mu difuku dya busatu ukasangulwa.+
22 Penepo, Petelo wamukokela kufula waanza kumufunina’mba: “A Mfumwetu, wididile’ko lusa; kino kekikakufikilapo nansha dimo.”+
23 Ino aye wavundamuka, kanena Petelo amba: “Jokela mu nyuma, abe Satana! Wi kikukaja kondi mwanda abe ulañanga milangwe ya bantu ke milangwepo ya Leza.”+
24 Penepo Yesu wanena bandi bana ba bwanga’mba: “Shi muntu usaka kunonda, nankyo epele aye mwine, asele mutyi wandi wa masusu* kadi anonde nyeke.+
25 Ke-muntu yewa ense usaka kupandija būmi bwandi* ukebujimija, ino yewa ense ujimija būmi bwandi* pa mwanda wa amiwa ukebumona.+
26 Na bubine, i kamweno’ka kakamwena’mo muntu shi wanekenya ntanda yonso ino wajimija būmi bwandi?*+ Ne kadi lelo muntu ukapāna kika kya kwishinta na būmi bwandi?*+
27 Mwanda Mwanā muntu ufwaninwe kwiya mu ntumbo ya Shandi na bamwikeulu bandi, kadi ukalubwila muntu ne muntu mwendele mwikadilo wandi.+
28 I bine nemulombola’mba kudi bamo bemene pano’pa kebakafupo poso’nka bamone bidi Mwanā muntu wiya mu Bulopwe bwandi.”+
Kunshi kwa Dyani
^ Nansha’mba “lwampikwa lulamato.”
^ Nansha’mba “bilala bya byakudya.”
^ Nansha’mba “mwanda ke muntupo.”
^ Nansha’mba “Hadese,” ko kunena’mba, kibundu kya bantu bonso. Tala Nshintulwilo ya Bishima.
^ Tala Nshintulwilo ya Bishima.
^ Nansha’mba “muya wandi.”
^ Nansha’mba “muya wandi.”
^ Nansha’mba “muya wandi.”
^ Nansha’mba “muya wandi.”
