Musapudi 4:1-16
4 Natele mutyima wami monka ku bilongwa byonso bya kumweshañana malwa bilongwa muno munshi mwa dyuba. Namwene impolo ya bamweshibwa malwa, ino kekwadipo muntu wa kwibasenga.+ Kadi boba bebamwesha malwa badi na bukomo, ino kekwadipo muntu wa kwibasenga.
2 Ebiya naanya bafwe badi ke bafwe kala pa kyaba kya bōmi badi bakidi bōmi.+
3 Ino utabukile buya kupita bonso babidi i yewa kabutwilwe,+ kamwene bilongwa bya malwa bilongwa muno munshi mwa dyuba.+
4 Ne kadi namone bukomo* ne mwingilo wa bwino utamba ku kwitāka kudi mu bantu;+ kino nakyo i kya bitupu, i kupanga luvula.
5 Kivila kipikanga maboko akyo mu kyadi ngitu yakyo papo ishinika.*+
6 Kuboko kuyule kukōkolokwa i kupite buya maboko abidi mayule mingilo mikomo ne kupanga luvula.+
7 Nata kadi mutyima wami ku kintu kikwabo kya bitupu muno munshi mwa dyuba:
8 Kudi muntu udi bunka bwandi, wampikwa mulunda; kadipo na mwana nansha na mwanabo mwine, ino mwingilo wandi onso mukomo keudipo na mfulo. Meso andi keatondwangapo bupeta.+ Ino wiipangulanga’mba, ‘Le i ani oñingidila bininge ne kwisuminwa ami mwine* bintu biyampe’?+ Kino nakyo i kya bitupu kadi i mwingilo wa malwa.+
9 Bantu babidi bapityile buya muntu umo+ mwanda badi na mpalo miyampe* ku mwingilo wabo mukomo.
10 Mwanda shi umo wapone, mukwabo ubwanya kumulangula. Ino le bikekala namani shi yewa udi bunka wapone ino kekudipo wa kumulangula?
11 Ne kadi, shi babidi balāle pamo, bakekala na kyanga, ino le umo ubwanya kwikala na kyanga namani?
12 Kadi muntu ubwanya kunekenya muntu umo kete, ino babidi pamo babwanya kumukomena. Monji wa mpambo isatu keubwanyapo kuketeka bukidibukidi.*
13 Mulanda inoko mwana wa tunangu i mupite buya mukulumpe inoko mulopwe kivila,+ kakidipo na ñeni mibwane ya kwivwana kidyumu.+
14 Mwanda aye* watambile mu kifungo amba ekale mulopwe,+ nansha byawadi mubutulwe mulanda mu bulopwe bwa muntu’wa.+
15 Nalangulukila pa boba bonso bōmi banangakana muno munshi mwa dyuba, ne pa mobyaikadila kudi nkasampe mpingakani wapingakena pa kyaba kya mukwabo.
16 Nansha byokekudipo mfulo ku bonso bamwitabīle, boba bakamulonda’ko kebakamusangelapo.+ Kino nakyo i kya bitupu, i kupanga luvula.
Kunshi kwa Dyani
^ Nansha’mba “mwingilo mukomo.”
^ Kishima pa kishima i, “kadi kidyanga ngitu yakyo.”
^ Nansha’mba “muya wami.”
^ Nansha’mba “kamweno kakatampe.”
^ Nansha’mba “lubilolubilo.”
^ Padi kifunkila pa mwana wa tunangu.
