Musapudi 9:1-18
9 Penepo nalamine ku mutyima bino byonso ne kufula ku kunena’mba boloke ne ba tunangu, pamo ne mingilo yabo, badi mu maboko a Leza wa bine.+ Bantu kebajingulwilepo buswe ne mushikwa byaikele’ko kumeso kwabo.
2 Bonso badi na mfulo imo yonka,+ moloke ne mubi,+ ne muyampe ne wampikwa disubi ne wa disubi, boba balambula bitapwa ne boba kebalambulapo bitapwa. Muyampe udi pamo bwa kipya-mambo; yewa utyipa mutyipo udi pamo bwa yewa mukosoke pa kutyipa mutyipo.
3 Kino’ki i kintu kisansa kilongekanga muno munshi mwa dyuba: Bonso byobadi na mfulo imo yonka,+ mutyima wa bantu nao i muyule bubi; kadi mu mutyima wabo mudi bulubi mu būmi bwabo, kupwa bafwa!*
4 Kudi lukulupilo ku yewa ense udi mu bukata mwa bōmi, mwanda mbwa mūmi i mupite ntambo mufwe.+
5 Mwanda bōmi bayukile amba bakafwanga,+ ino bafwe kebayukilepo kintu nansha kimo,+ kadi kebakidipo monka na mpalo,* mwanda kivulukilo kyabo kyonso i kivulaminibwe.+
6 Ne kadi, buswe bwabo ne mushikwa wabo ne mukao wabo ke byoneke kala, kadi kebakilongapo monka kintu nansha kimo mu byobya bilongwa muno munshi mwa dyuba.+
7 Enda, kadye byakudya byobe na nsangaji, kadi katome vinyu yobe na mutyima muyule nsangaji,+ mwanda Leza wa bine i musangele kala mingilo yobe.+
8 Bisandi byobe bikale nyeke bitōka,* kadi kokileka kwishinga māni ku mutwe obe.+
9 Sangela būmi na obe mukaji osenswe+ mafuku onso a būmi bobe bwa bitupu, akupele Leza muno munshi mwa dyuba, mafuku obe onso a bitupu, mwanda kyo kipindi kyobe mu būmi ne mu mwingilo obe mukomo oingila muno munshi mwa dyuba.+
10 Kyonso kibwanya kulonga kuboko kobe, wikilonge na bukomo bobe bonso, mwanda kekudipo mwingilo nansha kufwatakanya bintu, nansha buyuki nansha tunangu mu Kibundu*+ moenda.
11 Namone kintu kikwabo muno munshi mwa dyuba, amba bantu ba lubilo kebawinangapo nyeke mu lubilo, nansha ba bukomo kunekenya bulwi,+ nansha ba tunangu kwikala nyeke na byakudya, nansha ba ñeni kwikala nyeke na bupeta,+ nansha boba ba buyuki kunekenya nyeke,+ mwanda kitatyi ne myanda yampikwa kulaa* bibafikilanga bonso.
12 Mwanda muntu kayukilepo kitatyi kyandi.+ Monka mupilanga mwita wa lui mu bukonde bubi ne mupilanga byoni mu dikinga, ne bana ba bantu nabo bapyanga mu dikinga mu kitatyi kya kimpengele,* shi kibebafikila mu kitulumukila.
13 Kadi namwene muno munshi mwa dyuba kino’ki pa mwanda utala tunangu—kadi kyantulumwije:
14 Kwadi kibundi kityetye kya bantu batyetye; ebiya mulopwe mukomo waiya kulwa nakyo, wekijokoloka ne kwikyubakila bingidilwa bikatampe bya kwikitēkela kasāla.
15 Mwadi muntu umo mulanda aye’ko wa tunangu, wapandije kibundi’kya na tunangu twandi. Ino i kutupu nansha umo wavulukile mulanda’wa.+
16 Penepo kenena ami mwine amba: ‘Tunangu i tupite buya bukomo;+ ino tunangu twa mulanda i tufutululwe, kadi binenwa byandi kebebivwanangapo.’+
17 I kipite buya kwivwana binenwa binena ba tunangu na diwi ditūke kupita’ko mabila a yewa ubikele mu bukata mwa balembakane.
18 Tunangu i tupite buya byabulwi bya divita, ino kipya-mambo umo’tu ubwanya konakanya bintu biyampe bivule.+
Kunshi kwa Dyani
^ Kishima pa kishima i, “kadi kupwa kino—ku bafwe!”
^ Nansha’mba “mfutwa.”
^ Ko kunena’mba, bisandi byeñenya bimwekeja nsangaji, ke bisandipo bya madilo.
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “bīya kumweka mpika.”
^ Nansha’mba “kyamalwa.”
