Nahumi 1:1-15
1 Musapu mubi wa Nineva:+ Mukanda wa kimonwa kya Nahumi* mwine Elekoshi:
2 Yehova i Leza usakanga kulamatwa bunka+ kadi ulubulanga kinongo;Yehova ulubulanga kinongo kadi utengele kulombola bukalabale bwandi.+
Yehova ulubulanga kinongo pa boba bamushikilwe,Kadi ubikīle balwana nandi bukalabale.
3 Yehova wijanga pa kukwatwa bulobo+ kadi udi na bukomo bukatampe,+Ino Yehova kakalekapo nansha dimo kupāna mfuto mifwaninwe.+
Kashinda kandi kadi mu kivula kya bonakani ne kimpumpu,Kadi makumbi i luvumbi lwa maulu andi.+
4 Ufuninanga dijiba,+ wedyūmija;Kadi ūmijanga minonga yonso.+
Ba Bashane ne Kalamela abafumba,+Maluba a Lebanona nao abafumba.
5 Ngulu itenkananga pa mwanda wandi,Mikuna nayo isunguluka.+
Nshi ikafulamunwa pa mwanda wa mpala yandi,Pamo ne ntanda ne byonso bidi’mo.+
6 Le i ani ubwanya kwimana ku meso andi shi wafītwa?+
Ne i ani ubwanya kukomena kyanga kya bulobo bwandi?+
Bukalabale bwandi bukapungululwa pamo bwa mudilo,Kadi mabwe akavingakanibwa pa mwanda wandi.
7 Yehova i muyampe,+ i kifuko kikomejibwe mu difuku dya tusua.+
Aye uvulukile* boba bakimba kunyemena mwadi.+
8 Ukatukija fututu kifuko kyandi* na dilobe dipitula,Kadi fukutu ikalondalonda balwana nandi.
9 Le i kitumba’ka kyomukakutyila Yehova?
Aye utukijanga fututu.
Tusua ketukekala’kopo musunsa wa bubidi.+
10 Mwanda i bekutakanye pamo bwa miba,Kadi badi pamo bwa boba bakolwe mālwa;*Ino bakasōkwa pamo bwa bityakuku byūmu.
11 Kodi kukatamba muntu ukutyila Yehova kitumba kibi,Uleta madingi a bituputupu.
12 Yehova wanena namino amba:
“Nansha byobadi bakomo bininge kadi bangi,Nansha nabya, bakatyumunwa kadi bakapita.*
Nakumwesha* malwa, ino nkikakumweshapo monka malwa.
13 Pano nsa kutyumuna mukabo wandi wa lupungu podi,+Kadi nkatyiba bijimba byobe pabidi.
14 Yehova wasoñanya pa mwanda obe* amba,‘Dijina dyobe kedikendelelapo monka.
Nkatalula bankishi basōnge ne bankishi ba byuma* mu njibo* ya baleza bobe.
Nkakulongela kibundu, mwanda wi wa bituputupu.’
15 Tala! Pa ngulu padi maulu a yewa uleta myanda miyampe,Yewa usapula ndoe.+
A Yuda, soba masobo obe,+ fikidija mpiko yobe,Mwanda muntu wa bitupu kakapitepo mobe monka.
Aye ukonakanibwa bya binebine.”
Kunshi kwa Dyani
^ Ko kushintulula’mba “Musengi.”
^ Nansha’mba “utele mutyima.” Kishima pa kishima i, “uyukile.”
^ Ko kunena’mba, kya Nineva.
^ Nansha’mba “mālwa a ñano.”
^ Bibwanika padi i, “kadi aye ukapita.”
^ Ko kunena’mba, Yuda.
^ Ko kunena’mba, Ashidia.
^ Nansha’mba “bankishi basungululwe.”
^ Nansha’mba “tempelo.”
