Nehemia 1:1-11
1 Binenwa bya Nehemia*+ mwanā Hakadia: Mu kweji wa Kishileve,* mu mwaka wa 20, nadi mu Shushane*+ kibundi kya nsakwa.*
2 Mu kine kitatyi’kya, Hanani+ mwanetu umo wafika na bantu bakwabo batamba ku Yuda, ebiya nebepangula myanda ya Bayuda bashele’ko bapandile ku bu misungi,+ ne myanda ya Yelusalema.
3 Nabo balondolola’mba: “Boba bashele’ko mu ntanda ya bubikavu* bapandile ku bu misungi badi mu byamalwa bikatampe kadi bya bumvu.+ Mumbu ya Yelusalema i mibundulwe,+ kadi bibelo i bisōkwe na mudilo.”+
4 Ponaivwene’tu bino binenwa, nashikata kendila ne kuyoyokota mafuku mavule, nadi nshikilwa na nzala+ nombela ku meso a Leza wa mūlu.
5 Kenena’mba: “A Yehova, Leza wa mūlu, Leza mukatampe ne ulenga nzuba ulamanga kipwano kyandi ne kulombola buswe bwa ndamatyidile ku boba bamusenswe ne balamine mbila yandi,+
6 nakwisāshila, kutwi kobe kuteje kadi meso obe apūtuke mwanda wa kwivwana milombelo ya mwingidi obe yonkulomba dyalelo dino’di, mwinya ne bufuku,+ pangala pa bengidi bobe bene Isalela, koku nsapula bubi bulongele bantu ba Isalela kodi. Twi balonge bubi, ami ne njibo ya tata mine.+
7 Bine tubakulongela bya kiboja+ pa kuleka kulama mbila yobe, misoñanya yobe ne mutyibilo obe wa mambo byowapēle mwingidi obe Mosesa.+
8 “Nakwisāshila, vuluka kinenwa kyowasoñenye* mwingidi obe Mosesa amba: ‘Shi mulonge bintu pampikwa kikōkeji, nkemupalakanya mu bantu.+
9 Ino shi mujokele kondi, mulame mbila yami ne kwiikōkela, nansha shi bantu benu bapalakanibwe bekale ne ku mfulo ya madiulu, nkebakongakanya+ tamba kwine’kwa ne kwibaleta mu kifuko kyonatonga kwikala’po dijina dyami.’+
10 Abo i bengidi bobe kadi i bantu bobe, bowakūdile na bukomo bobe bukatampe ne na kuboko kobe kwa bukomo.+
11 A Yehova, nakwisāshila, kutwi kobe kuteje milombelo ya mwingidi obe ne milombelo ya bengidi bobe baloelelwe kutyina dijina dyobe, kadi nakwisāshila, esela mwingidi obe dyalelo dino’di, kadi uno muntu angivwanine lusa.”+
Mu mene mafuku’a, nadi kaseya wa mulopwe.+
Kunshi kwa Dyani
^ Ko kushintulula’mba “Yah useñanga.”
^ Tala Mbwejo B15.
^ Nansha’mba “Susa.”
^ Nansha’mba “njibo mikatakata; nsakwa.”
^ Nansha’mba “buludiki bwa kipindi kya ntanda.”
^ Nansha’mba “kidyumu kyowapēle.”
