Nehemia 2:1-20
2 Mu kweji wa Nisane,* mu mwaka wa 20+ wa Mulopwe Alatazelekishishi,+ vinyu yadi ku meso andi, nayata vinyu napa’yo mulopwe mungya kibidiji.+ Ino kashā nadi nkyamwekele bya bulanda ku meso andi.
2 Ebiya mulopwe waungipangula’mba: “Mwanda waka umweka bya bulanda, ino abe kubela mpika? Bwabo bubwanya kwikala bulanda bwa ku mutyima.” Penepo nakwatwa moyo bininge.
3 Ebiya nalondolola mulopwe amba: “A mulopwe ufwa bununu! Le ndeka kumweka bya bulanda namani, akyo kibundi, kifuko kijīkilwe’mo bakulutuba bami, kisalwe, bibelo byakyo nabyo bisōkwe na mudilo?”+
4 Penepo mulopwe waungipangula’mba: “Le i bika byokimba?” Ponkapo nalombela kudi Leza wa mūlu.+
5 Ebiya nalondolola mulopwe amba: “Shi kibasangaja mulopwe kadi shi ubatōkelwa mwingidi obe mutyima, nankyo ntume ku Yuda, ku kibundi kijīkilwe’mo bakulutuba bami, amba nkekyubakulule.”+
6 Penepo mulopwe, ne wandi mukaji bashikete pamo, waunena’mba: “Le lwendo lobe lukekala lwa mafuku anga, ne ukajoka kitatyi’ka?” Ebiya kyasangaja mulopwe kuntuma,+ nami namulombola kitatyi kitungwe.+
7 Kupwa nanena mulopwe amba: “Shi kibasangaja mulopwe, ampe’ko mikanda ya bambikavu ba ntanda ya Bukila bwa Munonga,*+ amba bampityije biyampe enka ne byomfika ku Yuda,
8 ne mukanda wa Asafa kalama wa Budimi bwa Mityi bwa Mulopwe,* amba ampe’ko mityi ya bibelo bya Nsakwa Mikomo+ ya Njibo,* ne ya mumbu ya kibundi,+ ne ya njibo yonkenda’ko.” Penepo mulopwe waumpa’yo,+ mwanda kuboko kuyampe kwa Leza wami kwadi pondi.+
9 Kupwa nafika kudi bambikavu ba ntanda ya Bukila bwa Munonga, nebapa mikanda ya mulopwe. Mulopwe wantumine ne na bakata ba kibumbo kya divita ne na bakandanga pa tubalwe.
10 Sanabalata+ mwine Holone ne Tobia+ mwingidi wa bulēme mwine Amone+ pa kwivwana’tu uno mwanda, bafītwa bininge pa kumona’mba muntu kampanda waiya kulongela bantu ba Isalela kintu kiyampe.
11 Ku mfulo nafika mu Yelusalema, nashikata’mo mafuku asatu.
12 Nabūka bufuku, ami ne bana-balume batyetye, ino nkyalombwelepo muntu nansha umo kyatūdile Leza mu mutyima wami kya kulongela Yelusalema, kadi nkyadipo na nyema nansha umo poso’nka onadi nkandile’po.
13 Natambila bufuku pa Kibelo kya Musanza,+ napityila kumeso kwa Nsulo ya Nyoka Mukatampe ku Kibelo kya Byala bya Buto,+ natala mumbu ya Yelusalema yadi mibundulwe ne bibelo byandi byadi bisōkwe na mudilo.+
14 Kadi napityila ku Kibelo kya Nsulo,+ ne ku Kijiba kya Mulopwe, kekwadipo kyaba kibwanya kupita’po nyema onadi nkandile’po.
15 Ino nakanda’nka kukanda mu musanza*+ bufuku, ntala lubumbu, kupwa papo netola natwelela pa Kibelo kya Musanza, enka nenki najoka.
16 Baledi bampingakani+ kebadipo bayukile konaendele ne byonadi nonga, mwanda nadi nkyasapwidile Bayuda, babitobo, ba bulēme, baledi bampingakani, ne bengidi bakwabo kintu nansha kimo.
17 Ku mfulo nebanena’mba: “Mumwene malwa makatampe otudi’mo, musadilwe Yelusalema ne mobasōkēle bibelo byandi na mudilo. Iyai tūbakulule mumbu ya Yelusalema, kutyina’mba buno bumvu bwakendaenda.”
18 Penepo nebalombola mwaikadile kuboko kuyampe kwa Leza wami pondi+ ne binenwa byaunenene mulopwe.+ Ponkapo banena’mba: “Twimanei, tūbake.” Enka nenki bekomeja abo bene* mwanda wa mwingilo muyampe.+
19 Sanabalata mwine Holone, ne Tobia+ mwingidi wa bulēme mwine Amone,+ ne Ngeshema mwine Alabia+ pa kwivwana nabya, baanza kwituzawila+ ne kwitufutulula kebanena’mba: “Le i bika byomulonga? Le i mulopwe omutombokela?”+
20 Ino nebalondolola’mba: “Leza wa mūlu ye usa kwitwesela,+ kadi batwe bengidi bandi tusa kwimana tūbake; ino banwe kemudipo na kipindi nansha na lupusa nansha na kivulukilo* mu Yelusalema.”+
Kunshi kwa Dyani
^ Tala Mbwejo B15.
^ Nansha’mba “Bukila bwa Ufalete.”
^ Nansha’mba “ditó dya mulopwe.”
^ Nansha’mba “Tempelo.”
^ Nansha’mba “kinekaneka.”
^ Kishima pa kishima i, “maboko abo.”
^ Nansha’mba “kyepelo.”
