Nehemia 5:1-19
5 Inoko, kwadi madilo makatampe mu bantu ne babo bakaji pa mwanda wa banababo Bayuda.+
2 Bamo badi banena’mba: “Batwe ne betu bana bana-balume ne bana-bakaji twi bangi. Tufwaninwe kwikala na byakudya amba tudye twikale bōmi.”
3 Bakwabo nabo badi banena’mba: “Tubapāna madimi etu ne madimi etu a mañanza ne mobo etu bu kyeya amba tumone byakudya mu kitatyi kya kimpengele kya nzala.”
4 Ino bangi nabo badi banena’mba: “Tubaapula lupeto ku madimi etu ne madimi etu a mañanza mwanda wa mulambu wa mulopwe.+
5 Pano tudi na ngitu imo yonka ne mashi amo onka na a banabetu,* betu bana badi pamo bwa babo bana; ino tunenwe kumunija betu bana bana-balume ne bana-bakaji bupika, kadi betu bana bana-bakaji bamo badi kala mu bupika.+ Inoko ketudipo na bukomo bwa kukankaja kino’ki, mwanda madimi etu ne madimi etu a mañanza ke a bantu bakwabo.”
6 Ami pa kwivwana madilo abo ne bino binenwa, naloba bininge.
7 Penepo nabandaula bino bintu mu mutyima wami, natopeka ba bulēme ne baledi bampingakani kenebanena’mba: “Banwe bonso mulombanga kamweno* ku banabenu.”+
Kadi, nalongeja kitango kikatampe pa mwanda wabo.
8 Ebiya nebanena’mba: “Twalongele bukomo bwa kukūla banabetu Bayuda badi bapotolojibwe ku mizo; ino pano le musa kupotoloja banabenu,+ ne kadi le tusa kwibakūla monka?” Ponkapo baikala talala, kadi bakomenwa kya kunena.
9 Penepo nebanena’mba: “Byomulonga’byo ke biyampepo. Mubulwepo kunangila mu kityino kya Leza wetu+ amba mizo, balwana netu, baleke kwitutuka?
10 Ne kadi, amiwa ne banabetu, ne bengidi bami twibapujanga lupeto ne byakudya. Nemwisāshila, tulekei kwapuja mwanda wa kumwena’mo.+
11 Nemwisāshila, mwibalwijei enka dyalelo dino’di madimi abo,+ madimi abo a mañanza, bitongo byabo bya impafu, ne mobo abo, ne kipindi kimo kya pa bipindi katwa* kya lupeto, ne miseke, ne vinyu mipya, ne māni byomwibalomba bu kamweno.”
12 Penepa banena’mba: “Tusa kwibalwija bino bintu ne kwibalomba kintu mpika. Tusa kulonga’nka mowanenena’mo.” Ebiya naita babitobo, natyipija bano bantu mutyipo mwanda wa bafikidije byobalaile.
13 Kadi, nakūkula kivwalwa* kyami kenena’mba: “Enka namino’u Leza wa bine nandi akūkule njibo ne bintu bya muntu ense kafikidijapo uno mulao, kadi enka namino’u nandi akūkulwe ne kushala makasa.” Ponkapo kipwilo kyonso kyanena’mba: “Amena!”* Batendela Yehova, kadi bantu balonga monka mobalaile.
14 Ne kadi, tamba difuku dyaantūdile bu mbikavu+ wabo mu ntanda ya Yuda, tamba mu mwaka wa 20+ kutūla mu mwaka wa 32+ wa Mulopwe Alatazelekishishi,+ myaka 12, ne ami ne banabetu ketwadilepo mposo ya bu mbikavu.+
15 Ino bambikavu babajinji bambadikidile batwikile bantu kiselwa kilēma kadi badi bebayata mashekele* 40 a ndalama mwanda wa mikate ne vinyu difuku ne difuku. Kadi, bengidi babo bamwesheshe bantu malwa. Ino amiwa nkyalongelepo nabya+ mwanda nadi ntyina Leza.+
16 Ne kadi, naelele’ko kuboko ku mwingilo wa luno lubumbu, kadi ketwapotelepo budimi;+ bengidi bami bonso bebungile’ko mwanda wa kwingila.
17 Kwadi Bayuda ne baledi bampingakani 150 badi badya ku meza ami, ne boba batambile mu mizo baiya kotudi.
18 Difuku ne difuku badi bantēkela ñombe umo, mikōko milumbuluke isamba, ne toni, kadi musunsa umo mu mafuku dikumi twadi na vinyu mingi ya miswelo yonso. Nansha nankyo, nkyalombelepo mposo ya bu mbikavu, mwanda bantu badi kala balēmenenwe na mingilo.
19 A Leza wami, mvuluke biyampe,* pa mwanda wa byonso byonalongela bano bantu.+
Kunshi kwa Dyani
^ Kishima pa kishima i, “ngitu yetu idi pamo bwa ngitu ya banabetu.”
^ Nansha’mba “kamweno katabuke’mo.”
^ Nansha’mba “kipindi kimo pa katwa,” ko kunena’mba, kweji ne kweji.
^ Kishima pa kishima i, “nakūkula kyadi kyami.”
^ Nansha’mba “Mo monka!”
^ Shekele imo i mangalame 11,4. Tala Mbwejo B14.
^ Nansha’mba “mwanda wa biyampe.”
