Nehemia 6:1-19
6 Penepo pobalombwele’tu ba Sanabalata, Tobia,+ ne Ngeshema mwine Alabia+ ne balwana netu bakwabo amba naubakulula lubumbu+ ne amba kekudipo kipunzu nansha kimo kishele’ko (nansha mu kine kitatyi’kya byonadi nkyatūdile milango ku bibelo),+
2 ponkapo ba Sanabalata ne Ngeshema bauntumina uno musapu amba: “Iya tutunge kitatyi kya kwitana pamo mu bibundi bya Dilungu dya Musanza wa Ono.”+ Ino badi bakuta nkuku ya kunonga bibi.
3 Ebiya nebatumina mikendi amba: “Ñingilanga mwingilo mukatampe, nkibwanyapo kutūka. Le kimanina mwingilo, neushiye ngiye komudi i kika?”
4 Bauntumina musapu umo onka misunsa iná, nami nebalondolola muswelo umo onka misunsa yonso.
5 Penepo Sanabalata wauntumina mwingidi wandi na musapu umo onka musunsa wa butano, na mukanda muvungulule mu kuboko kwandi.
6 Mwadi mulembe namino amba: “Kyaivwanikilwe mu mizo, kadi Ngeshema+ nandi wanena’kyo, amba abe ne Bayuda mukutanga nkuku ya kutomboka.+ E kyoubakila lubumbu; kadi mungya ino misapu, abe ye usa kwikala mulopwe wabo.
7 Kadi ubatūla bapolofeto ba kusapula myanda yobe mu Yelusalema monso amba, ‘Kudi mulopwe mu Yuda!’ Kadi pano bino bintu bisa kusapwilwa mulopwe. Nanshi iya twisambile pamo.”
8 Ino ami namutumina ano malondololo amba: “I kutupu kintu nansha kimo kyowanena kilongekele; ubafwatakanya’byo’tu.”*
9 Mwanda abo bonso badi basaka kwituzakaja, kebanena’mba: “Maboko abo asa kuzoza mu mwingilo, keusapo kwingilwa.”+ Shi ke pano, nalombela, komeja maboko ami.+
10 Penepo naenda ku njibo ya Shemaia mwanā Delaya mwanā Mehetabela paadi mwishityile mu njibo. Waunena’mba: “Tutunge kitatyi kya kwitana ku njibo ya Leza wa bine, mu tempelo, kadi tushite milango ya tempelo, mwanda basa kwiya kukwipaya. Basa kwiya kukwipaya bufuku.”
11 Ino ami namutentulula’mba: “Le muntu pamo bwa ami ubwanya kunyema? Le muntu pamo bwa ami ubwanya kutwela mu tempelo ekale mūmi?+ Nkisapo kutwela’mo!”
12 Penepo najingulula’mba Leza kamutuminepo, ino Tobia ne Sanabalata+ bamufutyile mwanda wa anene buno bupolofeto pondi.
13 Bamufutyile mwanda wa kunzakaja ne kunongeja bubi, amba bamone bubinga bwa kuñonena ntumbo yami mwanda wa bamfutulule.
14 A Leza wami, vuluka Tobia+ ne Sanabalata ne bino bilongwa bino’bi, kadi ne Noadia mupolofeto mukaji ne bapolofeto bakwabo badi basaka nyeke kunzakaja.
15 Penepo lubumbu lwapwa mu difuku dya 25 dya Elule,* mu mafuku 52.
16 Balwana netu bonso pa kwivwana’tu kino ne mizo yonso itujokolokele pa kumona’kyo, bafwa bumvu bininge,*+ ebiya bajingulula’mba uno mwingilo waingilwe na bukwashi bwa Leza wetu.
17 Mu mene mafuku’a, ba bulēme+ ba Yuda badi batumina Tobia mikanda mingi, Tobia nandi wibalondolola.
18 Bantu bavule mu Yuda batyipile kumukwasha, mwanda wadi muko wa Shekania mwanā Alahe,+ wandi mwana Yehohanana nandi wasongele mwanā Meshulama+ mwanā Belekia.
19 Kadi, badi banombola nyeke myanda yandi miyampe, kupwa bakamusapwila byonadi nena. Penepo Tobia katume mikanda ya kunzakaja.+
Kunshi kwa Dyani
^ Kishima pa kishima i, “ku mutyima obe.”
^ Tala Mbwejo B15.
^ Kishima pa kishima i, “bapona bininge mu meso a abo bene.”
