Nkindi 14:1-35
14 Mwana-mukaji wa tunangu twa bine ūbakanga njibo yandi,+Ino mulembakane utūtanga’yo na makasa andi.
2 Yewa unangila mu boloke bwandi utyinanga Yehova,Ino yewa wa mashinda a buzazangi* umufutululanga.
3 Lusonde lwa kwizunzula ludi mu kyakanwa kya mulembakane,Ino milomo ya ba tunangu ikebakinga.
4 Kokwa kekudipo ñombe nansha umo kidīlo kidi tō,Ino bukomo bwa ñombe mulume buletanga byangulwa bivule.
5 Kamoni mukōkele kakabepapo,Ino kamoni wa bubela ubepanga ponso pafoma.+
6 Wa kibengo ukimbanga tunangu ino kutana’to mpika,Ino buyuki bwiyanga bukidi kudi muntu wa ñeni.+
7 Sonsoloka muntu mulembakane,Mwanda kukatanapo buyuki ku milomo yandi.+
8 Mukosoke wivwanijanga na tunangu dishinda dyaenda’mo,Ino bivila abyo byongolwanga* na bulembakane bwabyo.+
9 Balembakane bakayanga na mambo,*+Ino mu bukata mwa boloke swā, mudi mutyima wa kupwana.*
10 Mutyima uyukile bululu bwao* ao mwine,Kadi i kutupu wa panja ubwanya kusangala nao pamo.
11 Njibo ya babi ikonakanibwa,+Ino pema wa boloke swā ukekala biyampe.
12 Kudi dishinda dimweka kudi muntu bu dyoloke,+Ino ku mfulo ditwala ku lufu.+
13 Nansha ke mu tusepo mutyima ubwanya kusansa,Kadi kusangala kubwanya kufula ku njia.
14 Yewa moneke mu mutyima ukangula bipa bya mashinda andi,+Ino muntu muyampe wangulanga mpalo ya bilongwa byandi.+
15 Muntu mwendalale* witabijanga binenwa byonso,Ino mukosoke ulangulukilanga pa matabula onso.+
16 Muntu wa tunangu i mudyumuke kadi uvundaminanga bibi,Ino kivila kidi na kalengwa* kadi i kīkulupile bipitepite.
17 Yewa uloba bukidi uloñanga bya bulembakane,+Ino muntu ulangulukila* pa bintu i mushikibwe.
18 Mwendalale* ukapyananga bulembakane,Ino bakosoke bapebwanga kilukwa kya buyuki.+
19 Bantu babi bakevukwila ku meso a bayampe,Kadi babi bakevukwila pa bibelo bya boloke.
20 Mulanda i mushikibwe enka ne na balondakani nandi,+Ino balunda ba mpeta i bavule.+
21 Yewa ufutulula mulondakani nandi wapi mambo,Ino yewa ense ufwila mupēlulwe lusa i wa nsangaji.+
22 Lelo boba bakuta kitumba kibi kebakasāsukapo?
Ino boba badi na mutyima wa kulonga biyampe bakatambula buswe bwa ndamatyidile ne bubinebine.+
23 Kudi kamweno mu mingilo mikomo ya miswelo yonso,Ino mīsambo ya bitupu itwalanga ku bufudile.+
24 Kilukwa kya ba tunangu i bupeta bwabo;Ino bulembakane bwa kivila i enka bulembakane.+
25 Kamoni wa bine upandijanga būmi,*Ino ñongojani ubepanga ponso pafoma.
26 Kudi kikulupiji kikomo mu kutyina Yehova,+Kadi kikekalanga kinyemeno kya bandi bana.+
27 Kutyina Yehova i nsulo ya būmi,Mwanda wa kusāsukija muntu ku makinga a lufu.
28 Bungi bwa bantu i bukatampe bwa mulopwe,+Ino mulopwe wampikwa bantu i musadike.
29 Yewa wija pa kukwatwa bulobo udi na kusansanya kukatampe,+Ino yewa wampikwa kitūkijetyima ulombolanga patōka bulembakane bwandi.+
30 Mutyima utalala nyā upanga umbidi būmi,*Ino mukao i bubole ku mikupa.+
31 Yewa udimba mupēlulwe utukanga Mulongi wandi,+Ino yewa ense ufwila mulanda lusa umutumbijanga.+
32 Mubi ukatūkijibwa na bubi bwandi,Ino moloke aye ukanyemena mu bululame bwandi.+
33 Tunangu tushikete talala mu mutyima wa muntu wa ñeni,+Ino mu bukata mwa bivila tukeyukanya’mo ato twine.
34 Boloke buzunzulanga muzo,+Ino bubi i bumvu bwa bantu.
35 Mulopwe uloelelwanga mwingidi ulonga bintu na bujinguludi,+Ino ukalabelanga yewa ulonga bintu bya bumvu.+
Kunshi kwa Dyani
^ Nansha’mba “makondame.”
^ Bibwanika padi i, “bivila byongolanga bakwabo.”
^ Nansha’mba “na kwilemununa.”
^ Nansha’mba “mudi mutyima muyampe.”
^ Nansha’mba “bululu bwa muya wao.”
^ Nansha’mba “wampikwa bwino.”
^ Nansha’mba “i kikalabale.”
^ Nansha’mba “muntu wa bukomo bwa kulanga.”
^ Nansha’mba “Wampikwa bwino.”
^ Nansha’mba “myuya.”
^ Nansha’mba “bukomo.”
