Nkindi 27:1-27
27 Koketumbija pa mwanda wa dya kesha,Mwanda kuyukilepo bikaleta* difuku.+
2 Leka muntu ungi* akutendele, ke kyakanwa kyobepo;Bakwabo,* ke milomo yobepo.+
3 Dibwe dilēmanga ne musenga nao ulēmanga,Ino kulobejibwa na mulembakane kulēmanga kupita bino byonso bibidi.+
4 Bukalabale i bubibubi, bulobo nabo budi pamo bwa dilobe,Ino le i ani ubwanya kukomena mukao?+
5 Madingi a patōkelela atabukile buya buswe bufyame.+
6 Bilonda bikutapile mulunda i bikōkele,+Ino mififyo ya walwana i mingimingi.*
7 Muntu* mwikute umwañanga* būki bwa ku kisá,Ino wa nzala,* enka ne bilula kwandi i bitobala.
8 Pamo bwa koni kasāsuka* ku bunswa bwakoMo mwikadile ne muntu usāsuka kwandi.
9 Māni ne ensense bisangajanga mutyima;Mo mwikadile ne bulunda buyampe butamba ku madingi ampikwa budimbidimbi.*+
10 Kokaleka mulunda nobe nansha mulunda na shobe,Kadi kokatwela mu njibo ya mwanenu mu difuku dya kimpengele kyobe;Mulondakani wa pabwipi i mupite buya mwanenu wa kulampe.+
11 A wami mwana, ikala na tunangu, sangaja mutyima wami,+Amba nondolole yewa unkolomona.+
12 Mukosoke umonanga kibi wefya,+Ino bampikwa bwino bendelelanga’tu ne kwangula bipa bibi.*
13 Yata kivwalwa kya muntu shi waleta kyeya pa mwanda wa mweni;Muyate kyeya shi wekiletele pa mwanda wa mwana-mukaji mweni.*+
14 Shi muntu wesela mukwabo na diwi ditunduke lubanga bwē,Kikamonwa bu mafingo kwadi.
15 Mukaji wa lupotopoto* udi pamo bwa musaka usūma’nka kusūma mu difuku dya mvula.+
16 Yewa ense ubwanya kumukankaja, ubwanya kukankaja kivulaKadi ubwanya kukwata māni na kuboko kwandi kwa lundyo.
17 Enka kyuma mokinonenanga kyuma,Muntu nandi unonanga mulunda nandi.*+
18 Yewa ulama kikuyu ukadya bipa byakyo,+Kadi yewa ulama mfumwandi ukalēmekibwa.+
19 Monka mulombwelanga mema mpala ya muntu,Ne mutyima wa muntu nao ulombolanga wa mukwabo.
20 Kibundu ne kifuko kya bonakani* kebikutangapo,+Ne meso a muntu nao keekutangapo.
21 Monka mwikadile kisuku kya kutōkeja nakyo i kya ndalama, nkelwa nayo i ya olo,+Ne muntu nandi utompibwanga na mitendelo yatendelwa.*
22 Nansha shi utwe mulembakane na mwinshiPamo bwa miseke mitwe mu kinu,Bulembakane bwandi kebukamutalukapo.
23 Ufwaninwe kuyuka biyampe mwikadile luombe lobe.
Lama biyampe* mikōko yobe,+
24 Mwanda bupeta kebulādilangapo nyeke,+Nansha kilukwa* mu nkongo yonsololo.
25 Biyombo bibishi bijiminanga, biyombo bipya byamweka,Kadi munamuna ya mu ngulu ikongakanibwa.
26 Mikōko milume myana iletanga bisandi byobe,Bambuji balume nabo baletanga lupoto lwa budimi.
27 Kadi kukekala mabele mangi a bambuji obe a kudya,A kudisha ba mu njibo yobe, ne kukwasha bengidi bobe bana-bakaji.
Kunshi kwa Dyani
^ Kishima pa kishima i, “bikabutula.”
^ Kishima pa kishima i, “mweni.”
^ Kishima pa kishima i, “Mweni.”
^ Bibwanika padi i, “ya budimbidimbi; ya ku bukomo.”
^ Nansha’mba “Muya.”
^ Kishima pa kishima i, “utyampanga.”
^ Nansha’mba “muya wa nzala.”
^ Nansha’mba “kanyema.”
^ Nansha’mba “butamba ku madingi a muya.”
^ Nansha’mba “mambo.”
^ Nansha’mba “mweni.”
^ Nansha’mba “wa kōminija.”
^ Kishima pa kishima i, “mpala ya mulunda nandi.”
^ Nansha’mba “Sheole ne Abadone.”
^ Nansha’mba “Ne muntu nandi udi mwendele mitendelo yandi.”
^ Nansha’mba “Tūla mutyima obe pa; Tá mutyima ku.”
^ Nansha’mba “nkaka.”
