Nkindi 8:1-36
8 Lelo tunangu ketwelangapo lubila?
Le kusansanya kekutululangapo diwi dyako?+
2 Patunduke+ kufula kwa dishinda,Twimene pa mansanka.
3 Kubwipi na bibelo bitwala mu kibundi,Patwelelwa ku bibelo,Twelanga lubila na diwi dikatampe+ amba:
4 “A bantu, i banwe bongita;Natulula diwi dyami kudi muntu ense.*
5 Banwe bampikwa bwino, mwifundei budyumuku;+Banwe babivila, ikalai na mutyima wa ñeni.*
6 Ivwanai, mwanda byonesamba’bi i bya kamweno,Milomo yami īsambanga byoloke;
7 Mwanda kyakanwa kyami kinenanga bubine bityebitye,Kadi milomo yami ishikilwe byobya bibi.
8 Binenwa byonso bya kyakanwa kyami i byoloke.
Kekudipo nansha kimo kinyengakane nansha kikondame.
9 I byoloke ku wa kusansanyaKadi i bilulame ku boba batana buyuki.
10 Tambulai bulemununi bwami pa kyaba kya ndalama,Ne buyuki kutabuka’ko olo milumbuluke mpata,+
11 Mwanda tunangu i tupite buya mabwe a kolaye;*Kadi bintu bikwabo byonso byabilwa kebibwanyapo kudingakanibwa nato.
12 Amiwa, tunangu, ngikele pamo na budyumuku;Natana buyuki ne bukomo bwa kulanga.+
13 Kutyina Yehova i kushikwa bibi.+
Ami nshikilwe kwizunzula ne mitatulo+ ne dishinda dibi ne binenwa bya bupupakane.+
14 Ngidi na madingi mayampe ne tunangu twa kamweno;+Ñeni+ ne bukomo+ i byami.
15 Balopwe babikalanga nami,Kadi bengidi bakatampe ba bulēme nabo baletanga nami mbila ya boloke.+
16 Bamfumu babikalanga nami,Kadi ba bulēme nabo batyibanga nami mambo mu boloke.
17 Ami nsenswe boba bansenswe,Kadi boba bankimba bakantana.+
18 Bupeta ne ntumbo bidi nami,Bupeta bwa myaka na myaka* ne boloke.
19 Bipa byami i bipite olo buya, enka ne olo mikundulwe mine,Kadi bintu byonkupa i bipite buya ndalama milumbuluke mpata.+
20 Ñendanga mu kashinda ka bululame,Umbukata mwa tushinda twa boloke;
21 Mpanga boba bansenswe bupyani buyampe,Kadi ndyujanga bibīko byabo.
22 Yehova wānongele bu ngalwilo ya dishinda dyandi,+Mwingilo umbajinjibajinji mu mingilo yandi ya tamba kala.+
23 Tamba bitatyi bya kala* nātūdilwe’ko,+Tamba ku ngalwilo, ne ntanda mine keyaikele’ko.+
24 Pokwādi kekwaikele mema malamala+ nansha amo, nābutwilwe,*Pokwādi kekwaikele masulo ayula mema bā.
25 Kumeso kwa ngulu kutūlwa’ko,Kumeso kwa mikuna, ami nābutwilwe,
26 Paādi kalongele ntanda ne madimi ayoNansha bibuo bibajinji bya nshi ya ntanda.
27 Paālongolwele madiulu,+ nādi’po;Paāketele mukalo* pa bukata bwa diulu ne dijiba.+
28 Paāshimatyije* makumbi mūlu,Paālongele masulo a nkulwe,
29 Paātūdīle dijiba mbilaAmba mema adyo keafwaninwepo kutabuka kyandi kishima,+Paāshimatyije* byalwilo bya ntanda,
30 Penepo ami nādi pabwipi nandi bu mwingidi mukatampe.+Ami ye mwine waādi usenswe+ bikatampe difuku ne difuku;Nādi nsangala ku meso andi kitatyi kyonso;+
31 Nādi nsangela ntanda yandi ikalwa’po,Kadi nādi nsenswe bikatampe bana ba bantu.*
32 Ino pano, a bami bana, ngivwanei;Bine, ba nsangaji i boba balama mashinda ami.
33 Ivwanai bulemununi+ mwikale ba tunangu,Kadi kemwakasūlai’bo nansha dimo.
34 Wa nsangaji i yewa muntu ungivwanaWiya lubanga bwē ku* bibelo byami difuku ne difuku,Wilaije pabwipi na ñunji ya bibelo byami.
35 Mwanda yewa untana ukatananga būmi,+Kadi witabijibwanga na Yehova.
36 Ino yewa unsūla wisanshijanga aye mwine,*Kadi boba banshikilwe basenswe lufu.”+
Kunshi kwa Dyani
^ Kishima pa kishima i, “bana ba bantu.”
^ Kishima pa kishima i, “ivwana mutyima.”
^ Tala Nshintulwilo ya Bishima.
^ Nansha’mba “Byabulēme bya kupyana.”
^ Nansha’mba “Tamba kitatyi kekivulukwapo.”
^ Nansha’mba “nābutwilwe pamo bwa na bisanso.”
^ Kishima pa kishima i, “kifunda.”
^ Kishima pa kishima i, “Paākomeje.”
^ Nansha’mba “Paātūdile mbila ya.”
^ Nansha’mba “bantu.”
^ Nansha’mba “Ukesha pa.”
^ Nansha’mba “muya wandi.”
