Yelemia 11:1-23
11 Kino’ki kyo kinenwa kya Yehova kyaile kudi Yelemia amba:
2 “A bantu, ivwanai binenwa bya kino kipwano!
“Lombola’byo* bantu ba Yuda ne bekadi ba Yelusalema
3 kadi wibasapwile amba, ‘Yehova Leza wa Isalela wanena namino amba: “Afingwe mafingo yewa muntu kakōkelapo binenwa bya kino kipwano,+
4 byonasoñenye bakulutuba benu difuku dyonebatambije mu ntanda ya Edipito,+ mu nkelwa isungulula byuma+ amba, ‘Kōkelai diwi dyami, kadi longai bintu byonso byonemusoñanya; nabya mukekala bantu bami, nami nkekala Leza wenu,+
5 amba mfikidije mutyipo onatyipīle bakulutuba benu, wa kwibapa ntanda ikuka mabele ne būki,+ na mobikadile dyalelo’di.’”’”
Nami nalondolola’mba: “Amena,* abe Yehova.”
6 Penepo Yehova waunena’mba: “Sapula bino binenwa byonso mu bibundi bya Yuda ne mu bipito bya Yelusalema amba: ‘Ivwanai binenwa bya kino kipwano, mwibilonde.
7 Mwanda nadyumwine bakulutuba benu na kusumininwa difuku dyonebatambije mu ntanda ya Edipito kutūla ne dyalelo’di, nebadyumuna kyaba ne kyaba* amba: “Kōkelai diwi dyami.”+
8 Abo kebaivwenepo nansha kuta kutwi kwabo; ino abo bonso balondele na kibengo mutyima wabo mubi.+ Penepo nebaletela binenwa byonso bya kino kipwano byonebasoñenye kulonga, bine byobapelele kulonda.’”
9 Penepo Yehova waunena’mba: “Bantu ba Yuda ne bekadi ba Yelusalema abakute kitumba.
10 Abajokela ku bilubo bya bakulutuba babo ba pa kala, bapelele kukōkela binenwa byami.+ Nabo abalonda baleza bangi kebebengidila.+ Njibo ya Isalela ne njibo ya Yuda abatyibe kipwano kyonasambile na bakulutuba babo.+
11 O mwanda Yehova wanena namino amba, ‘Nsa kwibaletela kyamalwa+ kyokebakabwanyapo kupanda’ko. Pobakangabija, nkikebevwanapo.+
12 Penepo bibundi bya Yuda ne bekadi ba Yelusalema bakenda ku baleza bobatapilanga bitapwa* ne kwibabija,+ ino kebakebapandijapo nansha dimo mu kitatyi kya kyamalwa kyabo.
13 Mwanda baleza bobe abavula’nka bwa bibundi byobe, abe Yuda, kadi ubashimikila kintu kya bumvu* bisōkelo bivule’nka na mwikadile bipito bya mu Yelusalema, bisōkelo bya kutapila’po Bāla bitapwa.’+
14 “Ino abe* kokalombela pa mwanda wa bano bantu. Kokadila pa mwanda wabo nansha kwibalombelela’ko,+ mwanda nkikevwanapo kitatyi kyobakangabija pa mwanda wa kyamalwa kyabo.
15 Le muswedibwe wami udi na lupusa’ka lwa kwikala mu yami njibo
Shi bantu bavule bafikidija nkuku mibi?
Le bakakankaja kyamalwa na mwita ujila* kitatyi kyokibafikila?
Le ukasepelela mu kine kitatyi’kya?
16 Yehova wakwinikile bu umpafu mudimbile,Mulumbuluke wa bipa bilumbuluke.
Wamwela mu mudilo na lupumo lukatampe,Kadi abatyumuna misambo yao.
17 “Yehova wa bibumbo, Mwine wakukunine,+ wanena’mba kyamalwa kikāya podi pa mwanda wa bibi byalongele njibo ya Isalela ne njibo ya Yuda, baunsanshija pa kutapila Bāla bitapwa.”+
18 Yehova waunombwele amba ndyuke;Mu kine kitatyi’kya abe waunengeje mone byobadi balonga.
19 Nadi pamo bwa kana ka mukōko kakōkele katwalwa ku kutapwa.
Nkyadipo ndyukile amba badi bankutyila nkuku amba:+
“Longa tonakanye mutyi ne bipa byao bine,Kadi tumutyibe’ko ku ntanda ya bōmi,Amba dijina dyandi dileke kuvulukwa monka.”
20 Ino Yehova wa bibumbo utyibanga mambo na boloke;Ubandaulanga milangwe ya munda* ne mutyima.+
Longa mone kinongo kyobe pobadi,Mwanda nakutūdila mambo ami.
21 O mwanda Yehova wanena namino ku bantu ba Anatote+ bakimba kuyata būmi bobe* kebanena’mba: “Kufwaninwepo kunena bupolofeto mu dijina dya Yehova,+ shi bitupu usa kufwila ku kuboko kwetu”;
22 shi ke pano Yehova wa bibumbo wanena namino amba: “Nsa kwibeta beshintulwile. Bansongwalume bakafwa ku kipete,+ kadi babo bana bana-balume ne bana-bakaji bakafwa na kipupo kya nzala.+
23 Kekukashalapo muntu nansha umo mobadi, mwanda nkaleta kyamalwa pa bantu ba Anatote+ mu mwaka obaketwa beshintulwile.”
Kunshi kwa Dyani
^ Mobimwekela i Yelemia obasapwila.
^ Nansha’mba “Mo monka.”
^ Kishima pa kishima i, “nanguka lubanga futwi nebadyumuna.”
^ Nansha’mba “bobafitwilanga mwishi wa bitapwa.”
^ Nansha’mba “leza wa bumvu.”
^ Ko kunena’mba, Yelemia.
^ Ko kunena’mba, bitapwa bitapilwa mu tempelo.
^ Nansha’mba “milangwe mifyame.” Kishima pa kishima i, “mfyo.”
^ Nansha’mba “bakimba muya obe.”
