Yelemia 12:1-17
12 A Yehova, abe wi moloke+ kitatyi kyonkutompwela,Kitatyi kyonesamba nobe myanda ya boloke.
Ino, mwanda waka dishinda dya babi dyendeka senene,+Mwanda waka bandalandala kebadipo na malangalanga?
2 Webakunine, kadi abaala miji.
Abatama ne kupa bipa.
Abe udi’tu ku milomo yabo, ino kulampe na milangwe yabo ya munda.*+
3 Ino abe Yehova, undyukile biyampe+ kadi umwene;Ubabandaula mutyima wami, ubeumone amba udi nobe umbumo.+
Wibasañune pamo bwa mikōko ya kutapa,Wibatūle pafula mwanda wa difuku dya kwipaibwa.
4 Le ntanda ikafumba kufika ne kitatyi’kaNe munamuna ya mu madimi onso ikōma kufika ne kitatyi’ka?+
Pa mwanda wa bubi bwa boba bashikete’mo,Banyema ne byoni bibakube.
Mwanda abanena’mba: “Kamwenepo biketufikila.”
5 Shi ubakōka kunyema na bantu ba lwa nshi,Le ukabwanya namani kunyema lubilo na tubalwe?+
Nansha shi udi na kikulupiji mu ntanda ya ndoe,Le ukalonga namani mu bivunda* bijike kufulakufula kwa Yodano?
6 Mwanda nansha ke banabenu, ba mu njibo ya shobe bene,Abakulongela bya bundalandala.+
Abakutulwila diwi dikatampe.
Kokebakulupila,Nansha shi bakunena bintu biyampe.
7 “Naleka njibo yami;+ nashiye bupyani bwami.+
Napāna muswedibwe wami* mu kuboko kwa balwana nandi.+
8 Bupyani bwami bubaikala kondi pamo bwa ntambo mu ditó.
Bubaumbulumina.
O mwanda nebushikwe.
9 Bupyani bwami budi kondi pamo bwa kyoni kipoya kya misombelo mingimingi;*Byoni bikwabo bipoya bikijokoloka ne kwikikwata.+
Banwe banyema bonso ba mu ntanda iyai, mwibungei pamo,Iyai mudye.+
10 Bakumbi bavule abaonakanya budimi bwami bwa mañanza;+Abatyampakanya kipindi kyami kya ntanda.+
Abaalamuna kipindi kyami kilumbuluke kya ntanda ke mu ntanda mutuputupu musalwe.
11 Ibaalamuka ke mu ntanda mutuputupu.
Ibafumba;*Ibasalwa ku meso ami.+
Ntanda yonso ibasalwa,Ino i kutupu muntu nansha umo uta’ko mutyima.+
12 Bañonaona abaiya mu tushinda tonso toneke tupityila mu ntanda mutuputupu,Mwanda kipete kya Yehova kisasamunanga kushilwila ku mfulo imo ya ntanda kutūla ku mfulo mikwabo.+
Kekudipo ndoe ku muntu ense.*
13 Abakune ñano, ino abaangula miba.+
Abepungija, ino kwa kubulwa kamweno nansha kamo.
Bakafwijibwa bumvu pa bipa byaboPa mwanda wa bulobo budyendyemuka bwa Yehova.”
14 Yehova wanena namino ku balondakani nami bonso babi batenga bupyani bwami bonapele bantu bami bene Isalela ke bwabo,+ amba: “Nsa kwibatukuna mu ntanda yabo,+ kadi nsa kutukuna njibo ya Yuda mu bukata mwabo.
15 Ino shi napu kwibatukuna, nkebevwanina monka lusa, ne kwibajokeja muntu ne muntu ku bupyani bwandi ne ku ntanda yandi.”
16 “Kadi shi abayuka biyampe mashinda a bantu bami ne kutyipa mu dijina dyami amba, ‘Bine ne Yehova byadi’ko mūmi!’ enka na mobafundijije bantu bami kutyipa mu dijina dya Bāla, nabya bakashimikwa mu bantu bami.
17 Ino shi abapele kukōkela, nabya nkatukuna ne muzo’wa, kwiutukuna ne kwionakanya,” i Yehova unena.+
Kunshi kwa Dyani
^ Nansha’mba “milangwe mifyame.” Kishima pa kishima i, “mfyo.”
^ Nansha’mba “bifinga.”
^ Nansha’mba “muswedibwe wa muya wami.”
^ Nansha’mba “kya makememakeme.”
^ Bibwanika padi i, “Idilanga madilo.”
^ Kishima pa kishima i, “ngitu yonso.”
