Yelemia 15:1-21
15 Penepo Yehova waunena’mba: “Nansha shi ba Mosesa ne Samwele badi bemene ku meso ami,+ nkyadipo wa kutōkelwa bano bantu mutyima.* Wibatalule ku meso ami. Wibaleke bende.
2 Ino shi abakwipangula’mba, ‘Le tukenda kwepi?’ ukebalondolola’mba, ‘Yehova wanena namino amba:
“Yewa wa ku kipupo kileta lufu, ku kipupo kileta lufu!
Yewa wa ku kipete, ku kipete!+
Yewa wa ku kipupo kya nzala, ku kipupo kya nzala!
Kadi yewa wa kuselwa bu musungi, ku bu musungi!”’+
3 “‘Nkebatūdila’ko byamalwa biná,’*+ i Yehova unena, ‘kipete kya kwipaya, bambwa ba kubulula, ne byoni bya mūlu ne banyema ba pa ntanda ba kusasamuna ne konakanya.+
4 Nkebalamuna ke kintu kya nzuba ku malopwe onso a ntanda+ pa mwanda wa Manase mwanā Hezekia, mulopwe wa Yuda, pangala pa byobya byaalongele mu Yelusalema.+
5 A Yelusalema, le i ani ukakufwila lusa,Le i ani uketūla pa kyobe kyaba,Le i ani ukaleka kwipangula shi udi biyampe?’
6 ‘Ubandeka,’ i Yehova unena.+
‘Umvundaminanga nyeke.*+
O mwanda nkōlola kuboko kwami podi ne kukonakanya.+
Nakōka kukwivwanina lusa.*
7 Nkebapēpa na lukanya pa bibelo bya ntanda.
Nkebepaila bana.+
Nkonakanya bantu bami,Mwanda abapele kujoka ku mashinda abo.+
8 Bakaji babo ba kishala bakavula ku meso ami kupita musenga wa majiba.
Nkebaletela wa kwibonakanya dyuba mu mitwe, abo, bainabana ne bansongwalume.
Nkebaletela kavutakanya ne luzakalo mu kitulumukila.
9 Mwana-mukaji wabutwile bana basamba-babidi wapungila;Ulwa* na kwesa.
Dyuba dyandi dibapone adyo papo dikidi dyuba,Dibamufwija bumvu ne kumuzobeja.’*
‘Kadi batyetye bashele’ko mobadiNkebapāna ku kipete ku meso a balwana nabo,’ i Yehova unena.”+
10 A mama, malwa ami, mwanda waumbutwile,+Ami muntu wa kupotomejibwa ne kulwibwa na ntanda yonso.
Nkyapwijepo nansha kwapula;Ino abo bonso bamfinga.
11 Yehova wanenene amba: “Bine nkakwingidila’mba umone biyampe;Bine nkakusengela mu kitatyi kya kyamalwa,Mu kitatyi kya tusua kudi walwana.
12 Le muntu ubwanya kutyumuna kyuma bipindibipindi,Kyuma kya kungala, ne mukuba?
13 Nkapāna bupeta ne byabulēme byobe bu bitūtwa,+Ku bitupu, ino i pa mwanda wa bubi bobe bonso budi mu matanda obe onsololo.
14 Nkapāna’byo ku balwana nobeBebiselele ku ntanda yokuyukilepo.+
Mwanda mudilo ubaakijibwa na bulobo bwami,Kadi ubemusōka.”+
15 A Yehova, abe mwine uyukile,Mvuluke ne kunta mutyima.
Lubwila kinongo boba bampangapanga.+
Kokandeka mfwe* mwanda wa kwija koija pa kukwatwa bulobo.
Yuka’mba ntukwanga pa mwanda obe.+
16 Binenwa byobe byatenwe, nami nadya’byo;+Kadi kinenwa kyobe kyaikele kondi ke kusepelela ne nsangaji ya mutyima wami,Mwanda naityīlwe pa dijina dyobe, a Yehova Leza wa bibumbo.
17 Nkishiketepo kwisangaja mu bukata mwa bantu besangaja.+
Kuboko kobe byokudi pondi, nshikete bunka,Mwanda ubaundyuja kufītwa mutyima.*+
18 Mwanda waka misanshi yami i ya nyeke, ne kilonda kyami kukoma mpika?
Kibapele kubeluka.
Le ukekala kondi pamo bwa kibīko kya mema kya kyongoKekibwanyapo kukulupilwa?
19 O mwanda Yehova wanena namino amba:
“Shi ujoke, nami nkakujokeja,Kadi ukemana ku meso ami.
Shi usansanye kya bulēme na kya bitupu,Ukekala pamo bwa kyakanwa kyami.*
Abo bakajokela kodi,Ino abe kukajokelapo kobadi.”
20 “Nsa kukwalamuna kodi lubumbu lwa mukuba lukomejibwe ku bano bantu.+
Bine bakalwa nobe,Ino kebakakunekenyapo,*+Mwanda ami ngidi nobe, mwanda wa kukupandija ne kukukūla,” i Yehova unena.
21 “Kadi nkakukūla ku kuboko kwa babi
Ne kukunyongolola ku makasa a bantu bampikwa kafuku.”
Kunshi kwa Dyani
^ Nansha’mba “muya wami kewadipo wa kwikala na bano bantu.”
^ Bibwanika padi i, “butyibi bwa miswelo iná.” Kishima pa kishima i, “bisaka biná.”
^ Bibwanika padi i, “Ujokanga nyeke kimvunda-nyuma.”
^ Nansha’mba “kwialakanya.”
^ Bibwanika padi i, “Dibafu bumvu ne kukolelwa.”
^ Nansha’mba “Muya wandi ulwa.”
^ Kishima pa kishima i, “Kokangipaya.”
^ Nansha’mba “musapu wa kutulujibwa.”
^ Nansha’mba “Ukekala wa kunenena ami.”
^ Nansha’mba “kebakakushindepo.”