Yelemia 2:1-37
2 Kinenwa kya Yehova kyaiya kondi amba:
2 “Enda ukasapule mu matwi a Yelusalema amba, ‘Yehova wanena namino amba:
“Mvulukile biyampe kwipāna kwa* pa busongwakaji bobe,+Buswe bowalombwele pobadi bakukwatyīle kukusonga,+Mowanondēle mu ntanda mutuputupu,Mu ntanda mwampikwa kukunwa nkunwa.+
3 Isalela wadi ujila kudi Yehova,+ byangulwa bibajinji bya mwangulo wandi.”’
‘Ense umubokota wadi ulambikwa mambo.
Kimpengele kyadi kibaponena,’ i Yehova unena.”+
4 Ivwanai kinenwa kya Yehova, a njibo ya Yakoba,Ne bisaka byonso bya njibo ya Isalela.
5 Yehova wanena namino amba:
“Le bakulutuba benu baumboile kato’ka,+Pobansāsukile kulampe,Kebalonda bilezaleza bya bitupu+ ne abo bene baikala ba bitupu?+
6 Kebaipangwilepo amba, ‘Le Yehova udi kwepi,Mwine wetutambije mu ntanda ya Edipito,+Wetupityija mu ntanda mutuputupu,Mu ntanda mudi zolē+ ne ya bīna,Mu ntanda ya mulanga+ ne mwemba mukatampe,Mu ntanda kemwadipo muntu wenda’mo
Kadi kemwadipo mwikala bantu?’
7 Penepo nemuleta ku ntanda ya bitongo,Amba mudye bipa byayo ne bintu byayo biyampe.+
Ino banwe mwatwela’mo, mwasubija yami ntanda;Mwalongele bupyani bwami ke kintu kya munyanji.+
8 Babitobo kebaipangwilepo amba, ‘Le Yehova udi kwepi?’+
Boba bemanine Bijila kebaundyukilepo,Bakumbi bauntombokēle,+Bapolofeto banenene bupolofeto mu dijina dya Bāla,+Kadi balondele boba kebadipo babwanya kwibaletela kamweno.
9 ‘O mwanda nkalwa nenu monka,’+ i Yehova unena,‘Kadi nkalwa na bana ba benu bana.’
10 ‘Ino abukila ku ntanda ya kwijiba ya* Kitimi+ umone.
Bine, tumana ku Kedala,+ ubandaule senene;Utale shi kintu kya uno muswelo ke kilongeke.
11 Le kashā muzo ke mushinte baleza bao na boba kebadipo bu baleza?
Ino bantu bami abashinta ntumbo yami na kintu kya bituputupu.+
12 A madiulu, talai kino byakanwa pululu;Tetemai luzakalo lukatampe,’ i Yehova unena,
13 ‘Mwanda bantu bami abalonga bintu bibidi bibi:
Abaundeka ami, nsulo ya mema a būmi,+Ne kwikolela* byumbu,Byumbu biladike, kebibwanyapo kulama mema.’
14 ‘Le Isalela i mwingidi’ni nansha i umpika mubutulwe mu njibo?
Penepo mwanda waka wapānwa kudi ba kumutūta?
15 Bantambo bana* bamubuluminanga;+Abatulula mawi abo.
Abaalamuna ntanda yandi ke kintu kya nzuba.
Bibundi byandi bibasōkwa mudilo, ke mutupu mwikadi nansha umo.
16 Bantu ba Nofe*+ ne Tapanese+ badyanga ku nsongo ya mutwe obe.
17 Mwene i abe mwine weletēle kino’kiPa kuleka Yehova Leza obe+Paadi ukwendeja mu dishinda?
18 Penepa i kika kyosakila dishinda dyenda ku Edipito+Mwanda wa kutoma mema a Shihole?*
Le i kika kyosakila dishinda dyenda ku Ashidia+Mwanda wa kutoma mema a Munonga?*
19 Bubi bobe bukakōlola,Kadi kubulwa kikōkeji kobe kukakudingila.
Yuka ne kujingulula mokikadile kibi kadi kisansa+Kuleka Yehova Leza obe;Kwauntyininepo nansha dimo,’+ i Mfumu Mwinē Lupusa Lonso, Yehova wa bibumbo unena.
20 ‘Nalalakenye lupungu lobe tamba kala+Ne kutyumuna nkano yobe ya ku maulu.
Ino abe wanena’mba: “Nkisapo kwingila,”
Mwanda pa mukuna onso mulampe ne munshi mwa mutyi onso muvwambile+Wadi ulēle wibādile, ulonga busekese.+
21 Nakukunine bu muñanza utyila mulumbuluke,+ ao onso nkunwa milumbuluke;Penepo ubaalamuka namani kodi bu mitombo myoneke ya muñanza ungi ku meso ami?’+
22 ‘Nansha shi ōye na makadi ne kwishinga kifula* bininge,Mambo obe akekala’nka bu kitāto kya biko ku meso ami,’+ i Mfumu Mwinē Lupusa Lonso Yehova unena.
23 Le ubwanya kunena namani amba, ‘Nkīsubijepo.
Nkilondelepo Babāla’?
Tala ku dishinda dyobe mu musanza.
Bandaula byolongele.
Udi pamo bwa ngamedia mukaji mwana wa lubilo,Unyema kinyemenyeme koku ne koku mu mashinda andi,
24 Mpunda wa ntanda wibidile mu ntanda mutuputupu,Ulula luvula na kilokoloko kyandi.*
Le i ani ubwanya kumukankaja kitatyi kyasaka kutentekwa?
I kutupu nansha umo umukimba ukakōka.
Mu kitatyi kyandi* bakamutana.
25 Lama maulu obe kutyina akenda pululuNe mudibu obe wakevwana kyumwa.
Ino abe wanenene amba, ‘I kutupu lukulupilo!+
Mhm! Kendi musanswe beni,*+Kadi nkebalonda.’+
26 Monka mwivwaninanga ngivi bumvu shi abamukwata,Njibo ya Isalela nayo ibafwijibwa bumvu,Abo, balopwe babo ne bamfumu babo,Babitobo babo ne bapolofeto babo.+
27 Banenanga mutyi amba, ‘Abe wi tata,’+Ne dibwe nadyo amba, ‘Abe ye waumbutwile.’
Ino abangela nyuma kadi kebatadidilepo kondi.+
Bakanena mu kitatyi kya kyamalwa’mba,‘Imana witupandije!’+
28 Penepo baleza bobe bowelongēle badi kwepi?+Bemane shi babwanya kukupandija mu kitatyi kyobe kya kyamalwa,Mwanda baleza bobe abavula’nka bwa byobe bibundi, abe Yuda.+
29 ‘Mwanda waka mulwanga nami nyeke?
Mwanda waka banwe bonso mubantombokela?’+ i Yehova unena.
30 Nakupile benu bana bya bitupu.+
Kebaitabijepo kulemununwa;+Kipete kyenu kyasasamwine bapolofeto benu,+Pamo’nka bwa ntambo wa kyonakanya.
31 A lukongo, bandaulai kinenwa kya Yehova.
Le naikala pamo bwa mu ntanda mutuputupu kudi IsalelaNansha bwa ntanda ya fukutu isusulañana?
Mwanda waka bano bantu bami abanena’mba, ‘Tuzeulukanga motusakila.
Ketukāyapo monka kodi’?+
32 Le mujike ubwanya kwilwa byaedyangulanga nabyo,Mutundaile elwe bisandi byandi bya mu kyadi?*
Ino bantu bami abangilwa mu mafuku keabadika.+
33 Bine, abe mwana-mukaji, walongolwele na bwino dishinda dyobe dya kukimba buswe!
Wefundile mashinda a bubi.+
34 Enka ne kunshi kwa kivwalwa kyobe i kulambakane mashi a balanda* bampikwa mambo,+Nansha byonkyeatenepo pobadi batūta njibo;Adi kunshi konso kwa kivwalwa kyobe.+
35 Ino unenanga’mba, ‘Ne wampikwa mambo.
Na bubine bulobo bwandi bubasonsoloka kondi.’
Pano nsa kukutyibila mamboMwanda ubanena’mba, ‘Nkilongelepo bubi.’
36 Mwanda waka usūla dishinda dyobe dishintashinta?
Ukafwa bumvu ne pa mwanda wa Edipito,+Monka mowafwidile bumvu pa mwanda wa Ashidia.+
37 Kadi pa mwanda wa kino’ki ukatamba makasa ku mutwe,+Mwanda Yehova wapele boba bokulupile;Kebakalengejapo bintu bikwendekele biyampe.”
Kunshi kwa Dyani
^ Nansha’mba “buswe bwa ndamatyidile bwa.”
^ Nansha’mba “bisanga bya.”
^ Nansha’mba “kwisōngela,” uyuka i mu dibwe.
^ Nansha’mba “Bantambo bana ba manyenze.”
^ Nansha’mba “Memfise.”
^ Ko kunena’mba, musapa wa Munonga wa Nile.
^ Ko kunena’mba, Ufalete.
^ Nansha’mba “sabuni.”
^ Nansha’mba “kwabila kwa muya wandi.”
^ Kishima pa kishima i, “kweji wandi.”
^ Nansha’mba “baleza ba kungi.”
^ Nansha’mba “lukuka lwandi lwa butundaile?”
^ Nansha’mba “myuya ya balanda.”
