Yelemia 20:1-18
20 Penepo Pashula mwanā Imele, kitobo, kadi mutangidiji mukwashi wa mu njibo ya Yehova, wadi uteja padi panena Yelemia bupolofeto bwa bino bintu.
2 Penepo Pashula wakupila Yelemia mupolofeto kadi wamwela mu bikulo+ byadi ku Kibelo kya Pangala kya Benjemani, kyadi mu njibo ya Yehova.
3 Ino difuku dilonda’ko Pashula pa kutambija Yelemia mu bikulo, Yelemia wamunena’mba:
“Yehova kakwinikilepo bu Pashula, ino wakwinika bu Luzakalo Konsokonso.+
4 Mwanda Yehova wanena namino amba, ‘Nkakwalamuna kodi kintu kya luzakalo kodi abe mwine ne kudi balunda nobe bonso, kadi bakapona ku kipete kya balwana nabo papo meso obe atala;+ kadi nkapāna Yuda ense mu kuboko kwa mulopwe wa Babiloni, nandi ukebaselela bu misungi mu Babiloni ne kwibepaya na kipete.+
5 Kadi nkapāna bupeta bonso bwa kibundi, ne bintu byakyo byonso, ne bintu byakyo bya bulēme, ne byabulēme bya balopwe ba Yuda mu kuboko kwa balwana nabo.+ Kadi bakebatūta ne kwibakwata bende nabo ku Babiloni.+
6 Ino abe Pashula, ne bonso bekalanga mu yobe njibo, mukenda bu misungi. Ukenda ku Babiloni ne kufwila kwine’kwa, kadi ukajīkwa konka pamo ne balunda nobe, mwanda ubanena bupolofeto bwa bubela kobadi.’”+
7 A Yehova, ubandimbe, kadi nami nadimbwe.
Ubaingidija bukomo bobe pondi, kadi ubanekenya.+
Naikala kintu kya kusepwa difuku dyonso;Kemfutululwa na muntu ense.+
8 Mwanda ponso ponesamba, mfwaninwe kwela lubila ne kusapula amba,“Lūma ne bonakani!”
Mwanda kinenwa kya Yehova kibaikala kondi ke pa kuntukila ne pa kumengela difuku dyonso.+
9 Ebiya nanena’mba: “Nkisapo kumutela,Kadi nkisapo kwisambila monka mu dijina dyandi.”+
Ino mu mutyima wami kyaikele pamo bwa mudilo utēma mushityile mu mikupa yami,Kadi nakōkele kwikilamina munda;Nkyadipo nekibwanya kwikyūminina.+
10 Mwanda napupwile myanda mibi mivule;Luzakalo lwanjokolokele.+
“Mutulujei; tumutulujei!”
Muntu ense unsakila ndoe wadi utala kupona kwami+ amba:
“Padi ukalonga kilubo kya bulembakane,Penepa tukamunekenye ne kumulubwila kinongo.”
11 Ino Yehova wadi nami pamo bwa wa bulwi ulenga nzuba.+
O mwanda boba bampangapanga bakakukala kadi kebakanekenyapo.+
Bakafwijibwa bumvu bukatampe, mwanda kebakabwanyapo.
Bumvu bwabo bwa nyeke kebukedibwapo.+
12 Ino abe, Yehova wa bibumbo, ubandaulanga moloke;Umonanga milangwe ya munda* ne mutyima.+
Longa mone kinongo kyobe pobadi,+Mwanda nakutūdila mambo ami.+
13 Imbilai Yehova! Tendelai Yehova!
Mwanda wakūla mulanda* mu makasa a banonga-bibi.
14 Difuku dyonabutwilwe difingwe mafingo!
Difuku dyaumbutwile mama kedyakeselwa dyese!+
15 Afingwe mafingo yewa muntu wasapwidile tata musapu muyampe amba:
“Abakubutwila mwana mwana-mulume!”
Ne kumusangaja bikatampe.
16 Yao muntu ekale pamo bwa bibundi byafulamwine Yehova ne kwialakanya mpika.
Evwane kudila lubanga ne diwi dya kidyumu dyuba mu mitwe.
17 Mwanda waka kaungipailepo mu ndá,Amba mama ekale ke kyami kibunduNe ndá yandi ikale nyeke mimite?+
18 Mwanda waka natambile mu ndáMwanda wa mone malwa ne njia,Ne kufudija mafuku ami bya bumvu?+
Kunshi kwa Dyani
^ Nansha’mba “milangwe mifyame.” Kishima pa kishima i, “mfyo.”
^ Nansha’mba “muya wa mulanda.”
